Z wudaća: štwórtk, 22 februara 2018

Budyšin (SN). Wo situaciji w Budyskim wokrjesu stej so dr. Irene Vorholz, při­sydnica Foruma němskich wokrjesow, a Valerie Holsboer, předstejićerka za resursy Zwjazkoweje agentury za dźěło, póndźelu w tudyšim krajnoradnym za­rjedźe wobhoniłoj. Žonje zajimowaštej so wo­sebje za skutkowanje jobcentera, wšako­ je Budyski wokrjes jedyn z tych w Zwjazku, kotryž dołhodobnje bjezdźěłnych po opciskim modelu dohladuje, kaž krajnoradny zarjad informuje.

Krajny rada Michael Harig (CDU) jimaj rozłoži, zo „njewotbłyšuje financne połoženje w našim jobcenteru najebać ho­spo­darsku situaciju woprawdźitosć“. Dale­ a wjac zakładneho zawěsćenja potrěbnych je dołhodobnje bjez dźěła, a to z mnohimi a wulkimi haćidłami. Woni trjebaja wosebitu a intensiwnu podpěru. „Za nich dyrbja jasnje wjace personalnych a financnych resursow nałožić, čemuž pak budgety hižo njewotpowěduja, dokelž njedosahaja.“

Wopyt w Budyšinje bě Forum němskich wokrjesow nastorčił.

Sintojo a Romojo maja mjez štyrjomi připóznatymi awtochtonymi mjeńšinami w Němskej najwjace přisłušnikow. Kak pak su woni do towaršnosće jed­notl­iwych zwjazkowych krajow integro­wani? Prašenje to, kotrež njewurosće jeno­ z fakta, zo je Bayerska nětko z tamnišim krajnym zwjazkom Sintow a Romow statne zrěčenje podpisała.

Mnichow/Heidelberg/Budyšin (SN/at). Bayerska je po Badensko-Württembergskej w lěće 2013 a Hessenskej loni dalši zwjazkowy kraj, kotryž swoje styki z mjenowanej mjeńšinu na zakładźe statneho zrěčenja rjaduje. Wone bu zawčerawšim w Mnichowskim Princa Carlowym pa­laisu podpisane. Centralna rada Sintow a Romow krok wita, wšako stej knježerstwo Horsta Seehofera (CSU) a tamniši krajny zwjazk Němskich Sintow a Romow dotal wobstejacu zhromadnu deklaraciju na kwalitatiwnje nowu runinu pozběhnyłoj. Předsyda centralneje rady Romani Rose rěči wo „přikładnym kroku za škit mjeńšin. Z podpisanjom statneho zrěčenja Bayerska jasnje postaja, zo su bayerscy Sintojo a Romojo dźěl kraja, jeho­ stawi­znow a kultury.“

20 lět je šwarna ličba – wosebje, maš-li z tajkej ličbu zwjazany jubilej. 1. měrca 1998 su w Choćebuzu model Witaj zahajili. Na zakładźe wuspěšneho skutkowanja při zachowanju delnjoserbšćiny, zmužichu so tam wobydlerjo wšelakeho rěčneho pocha­da na eksperiment, a nastało je ži­we­ Witaj-hibanje. Nadobo zajimowachu so za serbšćinu po wšej Łužicy, samo tam, hdźež běchu ju hižo spušćili. A wutworichu mnohe Witaj-skupiny. Mjeztym pak hižo dlěši čas wo załoženju dalšich tajkich skupin ničo słyšeć njeje. Z kotreje přičiny? Hač drje so zajim pozhubja? Nimamy hižo serbske institucije abo tež entuziastow, kaž něhdy Jana Barta, kotřiž pola no­šerjow za Witaj wabja a po wječorach w dźěćacych dnjowych přebywanišćach staršim wo lěpšinach zažneje dwurěčnosće powědaja? Bjezdwěla tajkich mamy! Pobrachuje pak tón abo ta, kiž so za nadawk hori. Milenka Rječcyna

Staw medaljow po 81 ze 102 rozsudow:

złoto slěbro bronza

1. Norwegska  13 11 9

2. Němska  12 7 5

3. Kanada   9 6 7

4. USA    8 7 6

5. Nižozemska   6 6 4

6. Francoska   5 4 5

7. Šwedska   5 4 0

8. Awstriska   5 2 5

9. Južna Koreja   4 3 2

Před štyrjomi lětami bě němski bobowy sport historisku plajtu dožiwił: Na Olympiskich zymskich hrach w Sočiju wosta Němska bjez medalje. To bě zdobom zakład mnohich diskusijow wokoło materiala a wulkeje bjezradnosće.

W Pyeongchangu pak naši atleća swoju rólu jako faworića spjelnjeja. Póndźelu dobyštaj Francesco Friedrich a Thorsten Margis z bobowym dwusydłakom, wčera přesadźištej so Mariama Jamanka a Lisa Marie Buckwitz přećiwo bobowymaj dwójkomaj z USA a Kanady.

„Pisana stwórba Boža“ rěka lětuša tema přebytka dźědow, wowkow a jich wnučkow w Smochčanskim Domje biskopa Bena. Póndźelu je sej tam 61 wobdźělnikow, mjez nimi tójšto serbskich kaž Adelheid Čornakowa (srjedźa), dojěło a mjeztym rjane dožiwje­nja měło. Nawod prózd­ninskeho tydźenja mataj Marja Wjencyna a Ansgar Hoffmann. Wutoru pobychu dźěći, jich wowk­i a dźědojo w Stróžanskim Domje­ tysac hatow, dźensa běchu na „zymskim hribypytanju“. Foto: Feliks Haza

W póstnym času wuhotuja wšelacy orga­nizatorojo jutrowne wiki po cyłej Łužicy. W srjedźišću steja na nich serbske nałožki a tak zdobom w roz­dźěl­nych tradicionalnych technikach debjene jejka. Zazběh budu kónctydźenske jutrowne wiki w Budyšinje.

Gmejna Radwor Rüdigerej Schmidtej zamołwitosć přepodała

Radwor (CS/SN). Radworscy gmejnscy radźićeljo su wutoru na swojim zjawnym posedźenju Rüdigera Schmidta za no­weho gmejnskeho nawodu dobrowólneje wohnjoweje wobory wobkrućili. Dwaj so hłosa wzdaštaj. Po wólbach přepoda wjesnjanosta Wincenc Baberška (CDU) Łupjanej powołanske wopismo. Runje tajke dósta Sandro Jentsch z Chelna, kotrehož su za zastupowaceho gmejnskeho wohnjowoborneho nawodu powołali. Kameradojo pak njemóžachu jeho na hłownej zhromadźiznje dobrowólneje wohnjoweje wobory w Radworju 21. januara oficialnje wuzwolić, dokelž nima hišće trěbnu kwalifikaciju. Jentsch chce ju w meji na kursu wohnjowoborneje šule­ w Narću nachwatać. We wothłosowanju z wokrjesnym wohnjowym mištrom Mafredom Pethranom je hižo wo to postarane, zo jemu městno na dale­kubłanju za wodźace funkcije na mjenowanym kubłanišću přewostaja. Rüdigera Schmidta běchu 26. januara z 53 při­hłosowanjemi a dwanaće napřećiwnymi hłosami za noweho gmejnskeho wohnjowoborneho nawodu wuzwolili.

Budyšin (SN/mwe). Mnohe wokrjesne dróhi Budyskeho wokrjesa su a wostanu tež w přichodnych tydźenjach twarnišćo. Tole wuchadźa z najnowšeho wozjewjenja krajnoradneho zarjada wo wobchadnych wobmjezowanjach, zawčerawšim aktualizowanych. Na mnohich dróhach, kaž mjez Prěčecami a Błohašecami, mjez Kamjenej a Stróžu pola Rakec a w Ho­dźiju na Drježdźanskej dróze, tuchwilu njedźěłaja, dokelž je tam hač do 28. februara zymska přestawka. Wobchadne wobmjezowanja tuž na to pokazuja, zo na twarnišćach měr knježi, dołhož su temperatury a spadki „zymske“.

Na naprašowanje SN nowinski rěčnik Budyskeho krajnoradneho zarjada Gernot Schweitzer zdźěli: „Wokomiknje je zaso zymniše wjedro připowědźene. Tohodla so twarske dźěła dale dlija. Při minusowych temperaturach ze sněhom žana twar­ska firma z dróhotwarom njezapočnje.“

Pytaneju paduchow zajeli

Kamjenc. Policija móžeše tele dny w Kamjencu dweju paduchow na městnje njeskutka zajeć. Mužej w starobje 37 a 46 lět běštaj so wutoru krótko po połnocy na ležownosć firmy na přemysłowej pře­strjeni při Wolacej hórce w Bambruchu zadobyłoj. Tam chcyštaj po wšěm zdaću kolesa a dźěle awtow spakosćić. Kedź­bliwy wobydler pak zawoła policiju. Jako paduchaj policajske awto pytny­štaj, spytaštaj ze swojim awtom ćeknyć. Zastojnicy pak jeju njedaloko městna njeskutka zadźeržachu a zajachu. Při kontroli personalijow zwěsćichu, zo běchu skućićelow hižo dalšich padustwow dla pytali. W awće namakachu rubiznu, kotruž mó­ža­chu njeskutkej w Hessenskej při­rja­dować.

Simson pokradnyli

Mužakow. Mopedy marki Simson z NDRskeje produkcije w Suhlu su chětro požadane, a to, kaž wupada, tež mjez paduchami. Hakle njedawno běchu njeznaći tajki w Mužakowje na Jabłońskej dróze pokradnyli. Kaž policija dźensa zdźěli, su paduši jeničce prědnje koleso mopeda ze zamkom stejo wostajili, wšo dalše pak sobu wzali. Policija nětko přepytuje.

Dźensa w nocy su so Biskopičanske twarske wiki palili. Wohnjowe wobory z města, Geißmannsdorfa a Ramnowa běchu na městnje a wołachu štyri dalše dobrowólne wohnjowe wobory na pomoc, zo bychu wulkowoheń zhašeli. Cyłkownje bě 63 wobornikow zasadźenych. Zawiniła bě woheń wobswětlena reklama na třěše wikow,­ čehoždla tež zeškrěta plasta třěchu a fasadu twarjenja wobškodźi. Spěšneho hašenja dla njemóžachu so płomjenja po cyłej třěše rozpřestrěć. Zbožo w njezbožu zdobom bě, zo je hašenska připrawa twarskich wikow hnydom zaskočiła a tak hišće wjetšej škodźe zadźěwała. Foto: Rocci Klein