Z wudaća: srjeda, 08 awgusta 2018

Smjerdźaca (aha/SN). Třeći raz mjeztym je Smjerdźečanske kubłanske srjedźišćo LIPA w lěćnych prózdninach za dźěći wo­čer­stwjace sportowe dny přewjedło. Hižo znatej terminaj stej stajnje do prěnjeho kaž tež do poslednjeho tydźenja prózdnin zapołoženej. Mjeztym zo běchu so spočatk julija pjatnaćo wobdźělili, je jich tele dny 27 dźěći. Přewšo dobreho wothłosa dla njemóžachu hišće wjace přizjewjenjow přijimać.

Kak powjazy nastawaja?

Budyšin. Kaž kóždy štwórtk su zajimcy tež jutře, 9. awgusta, w 12.30 a potom trójce přeco hodźinu po tym na wo­dźenje po Budyskej Schäferec sukarni přeprošeni. W běhu něhdźe 45 mjeńšin zhonja wopytowarjo wjele zajimaweho wo tutym starodawnym rjemjesle.

Benedikcija abatisy

Pančicy-Kukow. Swjatočna benedikcija noweje abatisy klóštra Marijineje hwězdy Gabriele Hesse budźe zajutřišim, pjatk, w 16 hodź. w Pančičansko-Kukowskej klóšterskej cyrkwi. Božu mšu swjeći a swjećiznu abatisy přewozmje generalny abt cisterciensiskeho rjadu Mauro-Guiseppe Leporu z Roma.

Jazz w sotrownjach

Mały Wjelkow. Pjatk, 10. awgusta, su zajimcy w 20 hodź. do Małowjelkowskich sotrownjow na jazzowy wječor přeprošeni. Zahudźić chce tam duwo Florian Poser & Stephan König.

W nadawku telewizijneho sćelaka MDR produkuje entertainowa firma Saxonia tuchwi­lu wusyłanje „Šlagry mojeje domizny – Hornja Łužica“. Mjez starami šlagroweje sceny, kotrychž w Žitawje, Oybinje, Ochranowje, Njeswačidle a Kumwałdźe filmuja­, je tež Uta Brězanec. Spěw „Što by było, hdyž?“ z njej su hakle minjenu njedźe­­lu při Budyskej Starej wodarni natočili. Za hišće rjeńše wobrazy zasadźi­chu kameru z truta (Drohne). Wusyłanje, kotrež Ross Antony tež z najwše­lakorišimi infor­macijemi wo Budyšinje a Hornjej Łužicy moderěruje, móža sej zajimcy pjatk, 24. awgusta, w 20.15 hodź. na MDR wobhladać. Foto: Carmen Schumann

Lawba so wotpaliła

Šěrachow. Na Winterbergskej w Šěrachowje je so wčera popołdnju lawba paliła­. Torhaceho wětřika dla wobsteješe strach, zo płomjenja na susodne ležownosće přeskoča. Tomu pak zamó něhdźe 50 kameradow dobrowólnych wohnjowych woborow mjez druhim ze Šěra­chowa, Korzymja, Rozwodec a Chróstawy kaž tež Budyskeje powołanskeje wobory zadźěwać. Lawba so přiwšěm wotpali.

W lěsu woheń hašeli

Njedźichow. Wohnjowe wobory z Nje­dźi­chowa a wokoliny su wčera popo­ł­dnju při S 92 w lěsu mjez Njedźichowom a Lěsku (Lieske) woheń hašeli. Płonina ně­hdźe 100 króć 50 metrow pak bu zničena.

Sokoł Ralbicy/Hórki – VFB Drježdźany-Hellerau/Klotzsche 4:2 (0:0)

Minjeny pjatk wječor přijědźe do de­lanskeho Stadiona přećelstwa mustwo z Drježdźan, přećiwo kotremuž běchu koparjo Sokoła Ralbicy/Hórki hižo w zymje raz hrali. Trenar Chrystof Gloxyn měješe nimale 20 hrajerjow k dispoziciji a naspomni hišće raz chutny charakter testoweje hry, kotruž chcyše na kóždy pad dobyć. Wobaj cyłkaj dojednaštaj so na to, trójce 30 mjeńšin hrać. Prěnja­ połojca słušeše domjacym, kotřiž pak dwě dobrej składnosći njewužichu. Tak přewzachu Drježdźanjenjo komando, a Sokoljo mějachu swoju lubu nuzu sej scyła bul wuwojować.

Po połčasu pak Ralbičenjo tempo po­wjet­­šichu a přez dwoje wulkotnje wuhrate wrota Stefana Bjeńša spěšnje nawjedowachu. Po zmylku hosćićelskeho wrotarja a z hłójčku pak Drježdźanscy koparjo wurunachu – to bě wjac hač njetrjebawše a zbudźi wulke mjerzanje Sokołow. Tola krótko do kónca so Pětr Domaška wo dobyće postara. Najprjedy wón z krótkeje distancy zwyši a w poslednjej mjeńšinje z rjanej třělwu do hornjeho třiróžka partiju ze 4:2 doskónčnje rozsudźi.

Prěnje koparske mustwo Módro-běłych Kulow zahaji nowu hrajnu dobu we wokrjesnej wyšej lize ze sćěhowacym mustwom­: zady wotlěwa trenar Detlef Scholze, Paul Graf, Jan Pfennig, Bjarnat Korch, Lukas Koplanski, Felix Brückner, Michael Piatza, Marco­ Bulang, Benjamin Pohl; prědku wotlěwa Simon Katzer, Steve Bergmann, Frank Popjela, Paul Korch, Christian Adler,­ Maik Nicolaides, Frank Wittek, Norbert Kubaink. Na wobrazu pobrachuja Lucas Franz, Felix Scholze, Paul Kockert, Simon Kubaink, Andreas Korch, Nico Hantschke, Tino Schapals, Tobias Pohl, Michael Biallas, Johannes Wehlan, Franz Alfred Wiedemann. Módro­-běłych wopušćili su Pascal Budar (Ralbicy), John Pascal Streicher (Trjebin), Martin Sauer (LSV Nowe Město), Alexan­der Lohan (kónc karjery), Mario Korch (stari knježa) a Christoph Rettig (Jednota Kamjenc). Nimo Brücknera, kiž je z Hórnikec přišoł, su­ tamne nowopřichady Koplanski, Scholze, Franz, Hantschke, Katzer, Paul Korch, Biallas, Wehlan, Wiedemann wšitke ze swójskeho dorosta. Foto: Werner Müller

Kapitan Radworskeho koparskeho mustwa­ Paul Zimmermann zakónči po wja­corych ćežkich zranjenjach swoju­ aktiwnu hrajnu karjeru, a to z runje­ 26 lětami(!). Matej Wjeńka je so z nim rozmołwjał.

Sy so lětsa rozsudźił swoju aktiwnu ka­rjeru zakónčić. Zranjenja dźě su Će přeco zaso trapili, tak tež 2012 na europeadźe we Łužicy. Jako jedna z wulkich nadźijow sy za Serbow do turněra startował, dyrbiš pak hižo tak młody přestać.

Minjenej měsacaj je so w koparskich mustwach tójšto změniło. Někotre cyłki­ su w přihotach na nowu hrajnu dobu samo połojcu kadra wuměnili. Kilian­ Hrjehor je za někotre cyłki wotchady a přichady zezběrał.

FC Energija Choćebuz

přichady: Abdulkadir Beyazit (ST Babelsberg 03), Daniel Stanese (VfR Aalen­)

wotchady: Benjamin Förster (VSG Altglie­nicke), Christos Papadimitriou (Mauerwerk, Awstriska), Gabriel Boakye (1. FC Köln II), Alexander Siebeck (Karlsruheski SC)

Budissa Budyšin

přichady: Alexander Schidun (Jednota Kamjenc), Marcel Bär (Dynamo Drjež­dźany U19), Eric Merkel (Biskopičanske KT 08), Stefan Richter (trenar wrotarjow), Philipp Dartsch (SpVgg Bayern Hof), Marek­ Langr (Jednota Kamjenc), Christopher Schulz (SpVgg Bayern Hof), Mateusz­ Ciapa (U 19 1. FC Magdeburg), Michael Schlicht (1. FC Schweinfurt 05), Niclas Treu (Lüneburger SK Hansa)