Merkel zawod Trumpf wopyta
Wjazońca. Zwjazkowa kanclerka Angela Merkel (CDU) wopyta 16. awgusta wysokotechnologijowy zawod Trumpf we Wjazońcy. Sakski ministerski prezident Michael Kretschmer (CDU) ju přewodźa, informuje Sakska statna kenclija. Politikarjej chcetaj so z tamnišimi sobudźěłaćerjemi rozmołwjeć. Dialog steji w srjedźišću wopyta, rěka z Drježdźan.
Drohotnu pistolu pokradnyli
Wojerecy. Drohotnu pistolu su njeznaći z wustajeńcy we Wojerowskim měšćanskim muzeju pokradnyli. Kaž Zhorjelska policiska direkcija wčera zdźěli, su skućićeljo witrinu z namocu wočinili a bróń ze zažneho 19. lětstotka sobu wzali. Po wšěm zdaću sta so njeskutk hižo w juliju, policija pak je hakle wutoru wo tym zhoniła. Pistola je nimale 900 eurow hódna.
Spěchuja rěč
Budyšin (SN/bn). Woblubowana a wuspěšna serbska popowa skupina JANKAHANKA chce swoje skutkowanje „w dotalnej formje na najprjedy raz njewobmjezowany čas na lód połožić“, kaž spěwar a gitarist kapały Józef Brězan na naprašowanje zdźěli. Nastupajo přičiny za přestawku pak wzda so kóždehožkuli komentara. Hač a na kotre wašnje jednotliwi instrumentalisća sami abo zhromadnje dale hudźa, tuchwilu jasne njeje.
Worklecy (SN/MiR). Serbske a serbšćinu wuwučowace zakładne šule witaja sobotu šulskich nowačkow.
Na Worklečanskej zakładnej šuli „Michał Hórnik“ póńdźe 35 dźěći do dweju rjadownjow 1. lětnika. Šulerjo z Worklec a wsow, přisłušacych tamnišej gmejnje, změja Luciju Wajdlichowu za rjadownisku wučerku, kotraž budźe 20 šulerjam zhromadnje z Gabrielu Róblowej poboku. 15 dźěći z Njebjelčanskeje gmejny, přewozmje jako rjadowniska wučerka Regina Lanzyna. „Rady bychmy tež nowu wučerku abo wučerja na našej šuli witali“, tak Sabina Hejdušcyna wuswětla, „tola tajkich lětsa nimamy.“
Kamjenski wyši měšćanosta Roland Dantz (njestronjan) kandiduje třeći raz za tele komunalne zastojnstwo. Jeho mjeno pak budźe jeničke na hłosowanskim lisćiku stać, hdyž wola wobydlerjo Lessingoweho města 23. septembra nowu měšćansku hłowu.
Kamjenc (SN/at). Wozjewjenje wólbneho wuběrka z 20. julija samo čoło radnicy překwapja: Jedyn jenički kandidat nastupi k wólbam wyšeho měšćanosty w Kamjencu, a to mějićel zastojnstwa sam. Při dotalnymaj kandidaturomaj 2004 a 2011 měješe Roland Dantz stajnje třoch kontrahentow. Zdawa so, zo je jeho skutkowanje na dobro Lessingoweho města tak spomóžne, zo bě stronam a wolerskim zjednoćenstwam w komunje ćežko, runohódnych wužadarjow nańć a namjetować.
Drježdźany (SN/bn). Towarstwo Stup dale je na swojej wurjadnej zhromadźiznje wčera kandidataj za Serbski sejm wuzwoliło. Za wólby namjetuja Jadwigu Pjacec a wjelelětneho předsydu towarstwa dr. Andreasa Klugu. Tele dny chcedźa tuž wólbnemu wuběrkej wotpowědne podłožki přepodać.
„Nimo toho smy wo tym wuradźowali, hač tež zajimcam, kotřiž njejsu z čłonom Stup dale, kandidaturu přez naše towarstwo zmóžnimy. Jedna-li so wo kmane, mysl sejma podpěrace wosobiny, jich rady zapřijamy. Mějachmy tójšto naprašowanjow wot ludźi, kotřiž bychu so rady angažowali, štož pak w jich, nažel Domowinskich strukturach njemóža“, dr. Kluge rozłoži.
Dalšej dypkaj dnjoweho porjada běštej rozprawa – mjez druhim mjenowaše dr. Kluge „Łobjowy swjedźeń wulki wuspěch, z kotrymž je so nam poradźiło, łužiske žiwe žiwjenje a politiske hibanje Serbow zjawnosći sposrědkować“ – a planowanje zarjadowanjow za nowe šulske lěto. Tak chcedźa so wo měsačny poskitk kaž na přikład dźiwadłowe předstajenje abo ptačokwasny swjedźeń starać.
Jakarta (dpa/SN). Při zemjerženju na indoneskej dowolowej kupje Lombok je njedźelu znajmjeńša 227 ludźi zemrěło. Tole zdźěli dźensa tamniši zarjad za katastrofowy škit. Přiwšěm móhła ličba hišće dale stupać. Na pódlanskej kupje Bali je so dźensa rano znowa zemja ze sylnosću 6,2 třasła. Twarjenja so sypnychu. Hač je tam smjertnych woporow abo zranjenych, dotal znate njeje.
Połoženje dale njerozrisane
Berlin (dpa/SN). Zdźěla dramatiske połoženje přemało wučerjow na mnohich šulach, předewšěm w zwjazkowych krajach na wuchodźe Němskeje, njeje tež k zahajenju noweho šulskeho lěta rozrisane. Tole zdźěli dźensa prezident Němskeho wučerskeho zwjazka Heinz-Peter Meidinger powěsćerni dpa. „Tola tež w Bayerskej, Badensko-Württembergskej, Delnjej Sakskej a Sewjerorynsko-Westfalskej je zastaranje wučby na mjezy móžneho“, wón rozkładźe. Wučerjo faluja předewšěm na zakładnych, spěchowanskich a bywšich hłownych šulach.
Ma USA za policajski stat
Wosebite wochłódźenje swinjam je nětko wohnjowa wobora na awtodróze blisko Lipska zmóžniła. Tam bě so Lkw, ze swinjemi nakładowany, skóncował a stejo wostał. Zo bychu wobornicy zwěrjata na připowěšaku při najwjetšej horcoće wochłódźili, popryskachu je na cyle njekomplikowane wašnje ze zymnej wodu.
Přežadana listynošerka w Horbje blisko Stuttgarta njeje cyle jednorje sta listow roznošowała. Pad bu wujasnjeny, dokelž bě dalša žona njewočinjene listy w kontejneru za staru papjeru našła. Policija tuž přepytowaše a zdźěli, zo bě přistajena póšty jeničce w juliju něhdźe 340 listow wotbyła. Jako zastojnicy jeje bydlenje přepytowachu, namakachu 117 dalšich. To wšak njeje jenički tajki pad. Hižo loni w februaru bě lištonoš priwatneho předewzaća něhdźe 400 listow w lěsu wotbył, dokelž měješe rozkoru ze šefom.