Njebjelčicy (JK/SN). Burski statok na Njebjelčanskim Lipowym puću bě Julia Wroblewscyna ze swójbu loni přewzała. Zo by wjesnjanam a dalšim zajimcam pokazała, što je so tam w běhu lěta wšo změniło, bě wčerawši dworowy swjedźeń dobra móžnosć za rozmołwu a zabawu. Přeprošenje běchu mnozy, wosebje swójby z dźěćimi sćěhowali. Kaž awtowe čisła před dworom přeradźichu, běchu zajimcy samo z Braniborskeje a Drježdźan přichwatali.
Trjebin (AK/SN). Gmejna Trjebin je w prěnjej połojcy lěta 2018 „we wšěch wobłukach zlutniwje hospodariła. Spóznajomne je to mjez druhim na wudawkach wohnjowych woborow a pěstowarnje. To je přikładne“, podšmórny komornica Carmen Petrick na zašłym posedźenju gmejnskeje rady. K tomu poda přehlad etata gmejny ze stawom 30. junija 2018. Pozitiwnje wuwiwaja so dotal dawkowe dochody. Cyłkownje planuje gmejna lětsa 580 000 eurow dochodow. Zapisanych ma dotal 398 000 eurow. Nastupajo ležownostny dawk za ratarske a lěsniske płoniny je 6 200 eurow planowanych, 5 700 eurow hižo na konće je. Za dawki wobtwarjenych a wobtwarjenskich ležownosćow planuja 93 000 eurow dochodow. Hač do kónca junija bě hižo 92 900 eurow dóšło. Aktualne wuwiće přemysłoweho dawka hišće bóle zwjesela. Planowane ma komuna tam 150 000 eurow dochodow, přepokazanych na gmejnske konto je 201 000 eurow.
Mužej randalowałoj
Wojerecy. W někotrych Wojerowskich domjacnosćach njemóžachu wobydlerjo w nocy na njedźelu woměrje telewiziju hladać. Přičina běštaj młodaj mužej, kotrajž na Hasy Käte Niederkirchner při satelitowej připrawje telewizijneho poskićowarja randalowaštaj a tak přijimowanje myleštaj. Kedźbliwy wobydler bě jeju wobkedźbował a policiju zazwonił. Zastojnicy lepichu tam mužej w starobje 32 a 20 lět. Wonaj běštaj na techniskej připrawje něhdźe 1 000 eurow škody načiniłoj. Alkoholowy test wunjese pola njeju 1,08 resp. 2,08 promilow alkohola w kreji. Wonaj změjetaj so nětko wobškodźenja wěcow dla zamołwić.
1. septembra 1963 stejachmy z cokorowymi titami napřećo Wotrowskej šuli na brjoze, zo bychu nas 26 dźěći z Wotrowa a Njebjelčic składnostnje šulskeho zastupa fotografowali. Lětsa, 15. septembra, so znowa tak zestupachmy – běchmy pak jeničce štyrnaćo.
Po 55 lětach bě witanje do něhdyšeje šule a rjadownje jara jimace. Spominachmy na njeboh wučerja Jana Meškanka, kiž bě štyri lěta naš rjadowniski wučer. Nawučił je nas pisać a ličić, mějachmy pola njeho rysowanje a sport. Na hornjej łubi spěwachmy – wučer bě knjez Cyril Nawka. Spěw „Hory módre, ja was znaju“ hišće wšitcy znajachmy a smy sej jón tež tónkróć zhromadnje zanjesli.
Na lětušim Budyskim běhu z wutrobu je so nimale 2 000 šulerjow a wučerjow wobdźěliło. Zhromadnje naběžachu na Budyskej Młynkec łuce 25 600 eurow za dobry zaměr.
„Jedenáctka, to je moje místo!“, rjekny mi njedawno přećelny rentnar z Českich Budějovic. Tuž hnydom stanych a so zamołwich. Wobaj smój mjenujcy načolnu hru druheje čěskeje koparskeje ligi mjez Dynamom České Budějovice a mustwom FK Ústí nad Labem wopytałoj a běchmoj mjez nimale 2 000 přiwisnikami. Běch tři tydźenje w stolicy južnych Čech a wobdźělich so tam na rěčnym kursu. Hnydom prěni tydźeń dóstach z Łužicy pokiw, zo wočakuje w koparskim stadionje Střelecký ostrov (kupa třělcow) třeći prěnjeho tabulki. Šansu, šlagrowu partiju widźeć, nochcych wězo zapasć.
Kopańca, wokrjesna liga stafla II
1. ST Lubuš 6 15 : 5 13
2. HZ Łaz/Běły Chołmc 6 14 : 6 13
3. ST Marijina hwězda 5 12 : 4 12
4. ST Ćisk II 5 11 : 4 12
5. Traktor Malešecy 5 11 : 5 12
6. Wojerowski FC II 5 11 : 6 11
7. ST 1896 Wulka Dubrawa 5 13 : 8 8
8. SJ Njebjelčicy 6 6 : 8 8
9. HZ Wulke Ždźary 5 6 : 4 7
10. SV Haselbachtal 5 7 : 10 6
11. FSV Łuty 5 6 : 7 5
12. SJ Chrósćicy II 5 6 : 8 4
13. HZ Rakecy II/Šćeńca 6 5 : 16 3
14. ST Nadrózna Hrabowka 5 3 : 16 0
15. ST Mały Wosyk 6 5 : 24 0
Traktor Malešecy – SJ Njebjelčicy 2:0 (0:0)
Zestawa domjacych: Lehmann – Meier, Swakon, Krygar, Günther, Handrik, Benad, Metasch (58. Hoferichter), Seiler (80. Schmidt), Schwurack, Bolz
Zestawa hosći: Hahn – Haška (70. Čornak), Wagner, Plaettner, Šołta, Lejnart (62. Cyž), Korjeńk, Hrjehor, Pawlik, Domš
Posledni raz zetkaštej so koparskej mustwje w Malešecach před dwanaće lětami, a to we wobwodnej klasy, a hraještej tehdy 0:0. Nětko pak steještej sej z womłodźenymaj zestawomaj znowa napřećo. Wobě koncentrowaštej so w prěnich mjeńšinach na škit swójskich wrotow, čehoždla njedowolištej žane wulke šansy. Hosćo mějachu w 7. min. prěnju składnosć, ale domjacy wrotar třělwu wuspěšnje wotwobara. Na tamnej stronje třěli Metasch swobodnje stejo bul snadnje nimo (13.). W 25 min. pospyta so Njebjelčan Korjeńk z dalokotřělwu, kotraž pak dźěše wyše łaty. Swoju najlěpšu šansu měješe Wagner za hosći, kiž z dobreje pozicije bul snadnje nimo zhłójčkowa (39.). Malešenjo mějachu přez Metascha (40.) a Benadu (42.) dalšej móžnosći, ale wobaj hrajerjej njemějštaj wuspěch. Tuž so prěni połčas ze sprawnym 0:0 skónči.
Nowa Cala (B/SN). Kónc awgusta załoži skupinka cisterciensow, pochadźacych z klóštra K swjatemu křižej blisko Wiena, w braniborskej Nowej Cali swój priorat. Hinak hač dotal předwidźane, njebudu mniša w starych klóšterskich murjach bydlić, ale chcedźa sej w bliskosći nowy klóšter natwarić. „Smy mniša 21. lětstotka“, praji abt Maximilian. „Chcemy wutworić oazu, hdźež móža ludźo mocy čerpać a hdźež čuja so cuzy přiwzaći.“ Mnich Maximilian wěri do toho, zo móže centrum zetkawanja z Bohom cyły region wožiwić. Braniborska ministerka za wědomosć, slědźenje a kulturu Martina Münch (CDU), zdobom předsydka Załožby Nowa Cala, rozsud mnichow witaše a rjekny: „Wjeselu so, zo su štyrjo cisterciensojo w 750. jubilejnym lěće wobstaća klóštra priorat w Nowej Cali załožili.“
Połoža zakładny kamjeń