Podstupim (dpa/SN). Dźěłarnistwa a Zwjazk zastojnikow chcedźa hladajo na tarifowe jednanja za přistajenych zjawneje słužby ćišć na dźěłodawarjow zwyšić, zo bychu zastatk w zasłužbje wurunali. „Koleginy a kolegojo maja woprawdźe wjele pary w kotole“, rjekny zwjazkowy předsyda zwjazka zastojnikow Ulrich Silberbach nowinarjam. „Nochcemy zwisk k powšitkownemu wuwiću mzdow zhubić. Tule ležimy štyri procenty wróćo.“ Tarifowe jednanja za něhdźe milion přistajenych zjawneje słužby su wčera w Podstupimje w druhim kole zahajili.
Mjaso wjewjerčkow poskićuja wot najnowšeho w hosćencu w Londonskej korčmowej štwórći Borough Market. Hosćenc „Native“ spřihotuje hosćom nimo lokalnych jědźow tež lasanju z ragoutom wjewjerčkoweho mjasa. Na taler přińdźe pak jenož mjaso šěrych wjewjerčkow. Zwěrjata běchu kónc 19. lětstotka z Ameriki přiwjezli. Mjeztym wohrožuja wone populaciju čerwjenych wjewjerčkow na britiskej kupje. Ludźom su wone kwakla.
Preč ćisnjena seks-klanka je na awtodróhowym parkowanišću w Posaarskej zasadźenje policije zawinowała. Naha klanka ze zawjerćanymaj rukomaj a nohomaj wupadaše w ćmě woprawdźe kaž čłowjeske ćěło, policija zdźěli. Wotpowědnje wustróžana reagowaše žona a zawoła policiju. Prjedy hač zastojnicy přijědźechu, móžeše žona zhromadnje ze šoferom nakładneho awta „kriminalny pad“ rozrisać.
Budyšin (CS/SN). Njewěstosć je wulka a mnozy so prašeja, što poprawom směmy hišće jěsć. Kompetentnje wotmołwi na to Drježdźanska poradźowarka za zežiwjenje Tessa Rehberg minjenu póndźelu na čitanju rjada „Budyska akademija“ na žurli statneje studijneje akademije Budyšin. Hnydom na spočatku wona lapidarnje rjekny, zo njech kóždy to jě, štož znjese. Přiwšěm pak je ličba alergikarjow a ludźi, kotřiž wěste žiwidła njeznjesu, w zašłych lětach přiběrała.
Alergije su „nadměrne reakcije imunostneho systema na poprawom nješkódne přirodne maćizny“. Často wustupitej rozdźělnej alergiji paralelnje. Tak reaguja na přikład na kćenjowy próšk brězy čućiwi tohorunja špatnje na sad. Potrjecheni měli tuž płody warić, dokelž horcota alergene rozpači. Tessa Rehberg w tym zwisku nimo toho wuzběhny, zo njeje sad zasadnje strowy, mnozy fruktozu njeznjesu. W tajkim padźe měli ludźo wjace zeleniny konsumować abo sad z njewobdźěłanym joghurtom kombinować. Industrielnje produkowane měšeńcy toho razu pak wona njeporuča.
Wojerecy (SN). Zwěrjenc a hród we Wojerecach zličištej w lěće 2018 tójšto wjace wopytowarjow hač w lětach do toho. Dohromady witachu 125 629 hosći. To je najlěpši wuslědk wot toho časa, zo wjedu zwěrjenc a hród pod režiju Wojerowskeje zwěrjencoweje, kulturneje a kubłanskeje towaršnosće. Přirunujo z lětom 2017 rozrosće ličba wopytowarjow wo něhdźe 20 procentow. Najwažniša přičina je, zo stej hród z měšćanskim muzejom runje tak kaž zwěrjenc atraktiwnišej dyžli do toho, zdźěli Stefanie Jürß w nowinskim wozjewjenju towaršnosće.
Wot lońšeho so hród po wobšěrnych inwesticijach wonkownje kaž tež nutřkownje w nowym błyšću prezentuje. Po prěnim dźělu w lěće 2016 su loni w juniju druhi dźěl nowowuhotowaneje stajneje wustajeńcy wotewrili. W nimaj móžeš so tež interaktiwnje na napjatu jězbu přez měšćanske stawizny podać. Na te wašnje so poradźi, nowe skupiny wopytowarjow witać. Přidatnje přiwabiła je wosebita wustajeńca k 750. róčnicy města „75 x Wojerecy“, kotraž z 75 wubranymi eksponatami wo měšćanskich stawiznach informowaše.
Trjebin (AK/SN). Gmejna Trjebin je dale w jara ćežkim pjenježnym połoženju. Dwójny hospodarski plan 2019/2020 móža jeno z wulkimi zalutowanjemi a z njelubowanymi naprawami nastajić. To podšmórny wjesnjanosta Waldemar Locke (CDU) na wčerawšim posedźenju gmejnskeje rady. „Jeli nětko njereagujemy, změjemy w lěće 2022 deficit 1,2 milionaj eurow“, wón podšmórny. „Přičina je, zo žane klučowe připokazanja Swobodneho stata Sakskeje njedóstanjemy. Bjez kredita tuž njepóńdźe, jeli chcemy wažnej předewzaći, mjenujcy wopłóčkowy koncept za Trjebink a wutwar šěrokopasmoweje syće w swojej gmejnje zwoprawdźić“, tak wjesnjanosta. Gmejna a gmejnscy radźićeljo dyrbja nětko wšě móžnosće zalutowanja pruwować. Na wurjadnym posedźenju 13. měrca chce parlament dwójny etat 2019/2020 wobzamknyć.
Křesło na awtodróze
Budyšin. Z njewšědnym zadźěwkom dyrbjachu so šoferojo zawčerawšim popołdnju na awtodróze A 4 mjez woběmaj Budyskimaj wotbóčkomaj bědźić. Do směra na Drježdźany ležeše mjenujcy křesło na lěwej jězdni. Wodźer Mercedesa bě je runje hakle kupił, ale na připowěšaku prawje njepřipasał, tak zo so wone dele suny. Dwě jězdźidle móžeštej jeno z nahłym spinanjom zadźěwać, zo do mebla njeprasnyštej. Kuražěrowani wodźerjo nakładnych awtow sćahnychu křesło na nakromne pasmo. 30lětny zawinowar podawka so k městnu wróći, swój zmylk mjeztym přichwatanej policiji přizna a křesło sobu wza. Kak wone potom wupadaše, bohužel znate njeje.