Z wudaća: wutora, 16 apryla 2019

Braniborscy socialdemokraća chcyli na morju wuchowanych přiwzać

Podstupim (dpa/SN). Braniborska SPD so za to zasadźa, zo kraj ćěkancow přiwozmje, kotrychž su na morju wuchowali. Nawodnistwo strony je wot SPD nawjedowane krajne knježerstwo z wčera wozjewjenym wobzamknjenjom namołwjało, wotpowědny krajny program zdźěłać. Runočasnje krajne předsydstwo frakciju SPD w Němskim zwjazkowym sejmje a wšitkich ministrow SPD pohonja so za to zasadźić, zo so zwjazkowe knježerstwo „ze wšej mocu“ wo přiwzaće wuchowanych ludźi stara.

Braniborska SPD chcyła komuny podpěrać, kotrež so we wobłuku iniciatiwy „Mórski móst twori wěsty přistaw“ za dobrowólne přiwzaće migrantow rozsudźa, kaž strona zdźěli. Wot 5. decembra so Podstupim po informacijach iniciatiwy z „mórskim mostom“ solidarizuje.

Štó sej dźensa hišće zwěri so zjawnje za to zasadźić, w Srjedźnym morju wuchowanych ćěkancow přiwzać? Debata wo tym je w dalokej měrje womjelkła, a mam zaćišć, zo je to politiskim stronam cyle lube. Zo so ćěkancy w Srjedźnym morju dale tepja, medije jako krótkopowěsć wotbywaja. Nimo toho hotuja so strony w Sakskej, Braniborskej a Durinskej na wólby krajneho sejma. To je iniciatiwa braniborskeje SPD na dobro w Srjedźnym morju wuchowanych ćim zmužićiša. Wšako towaršojo derje wědźa, zo sej z tajkej iniciatiwu wjele dypkow mjez wolerjemi njezdobudźeš. Popularniša je dźensa debata, kotruž je nowa předsydka CDU Annegret Kramp-Karrenbauer nastorčiła: Kak požadarjow azyla spěšnje zaso wotbudźeš? Brani­borscy socialdemokraća wužiwaja porno tomu argument, kotryž by křesćanskim demokratam derje znaty być dyrbjał: Njeń­dźe wo wulkomyslnosć, ale wo ryzy čłowjeskosć. Marko Wjeńka

Budyšin (TW/SN). Pod hesłom „Wójna abo měr: Ruska a zapad – přibliženje“ wotmě so minjenu njedźelu w Budyskim Kamjentnym domje čitanje z awtoromaj dr. Fritzom Pleitgenom a Michailom Šiškinom. Tema bě wulku kedźbnosć zbudźiła a něhdźe sto zajimcow je přišło. Kniha wobeju wupokazaneju fachowcow – Pleitgen bě korespondent mjez druhim w Moskwje, wuchodnym Berlinje a Washingtonje, Šiškin je jenički ruski spisowaćel, kotremuž su wšitke tři wulke literarne myta Ruskeje spožčili – ma njewšědny zakład. Wobaj rysujetaj swój wid, kotryž bazěruje na swójskich nazhonjenjach. Tak nasta na fasety bohaty wobraz aktualneho połoženja.

Do zahajenja čitanja běštaj wobaj hósć wyšeho měšćanosty Budyšina Alexandera Ahrensa. Wón pokaza jimaj Budyske stare město a wopyta z nimaj mjez druhim wopomnišćo Budyšin II. Po tym zapisaštaj so Pleitgen a Šiškin zhromadnje do čestneje knihi Budyšina.

Po minjenych zymnych dnjach so ludźo wjesela, zo móža swoje dwory a zahrody takrjec na nalětni modus přestajić. Tež Norbert Wahlicht w Pančicach-Kukowje je wčera zahrodowe meble wurjedźił a nastajił. Wosebje rady ma wón drjewjanu ławku, kotruž bě k 30. narodninam darjenu dóstał. Na nju je škitnu worštu napryskał. Foto: SN/Maćij Bulank

W zežiwjenskim a zelowym centrumje w Pančicach-Kukowje su so w zašłosći hižo časćišo z tym zaběrali, zo njesłušeja žiwidła do wotpadkow. Nětko maja tam k tomu wustajeńcu.

Pančicy-Kukow (SN). Za wjetšinu z nas je nakupowanje samozrozumliwe. Husto pak so takrjec sami lepimy, zo smy přewjele kupowali. Hladamy-li potom do chłódźaka abo wjelbika, spóznawamy, zo je tak mjenowana dźeržomnosć toho abo tamneho produkta překročena. Často njeje to zła wola, a přiwšěm mjetamy w Němskej kóžde lěto jědnaće milionow tonow žiwidłow do wotpadkow.

Nic z pozběhnjenym pokazowakom, ale na jara zajimawe a multimedialne wašnje rozestaja so wot Bayerskeho kompetencneho centruma za zežiwjenje wuwita wustajeńca „Bjez zbytkow derje jěsć“ z hódnotu žiwidłow. Přehladka budźe prěni raz w nowych zwjazkowych krajach wot 28. apryla w zežiwjenskim a zelowym centrumje Křesćansko-socialneho kubłanskeho skutka w klóštrje Marijinej hwězdźe widźeć.

Njeswačanska gmejna steji před wažnym rozsudom pěstowarnje dla

Njeswačidło (JK/SN). Podobnje kaž mnohe druhe gmejny ma so tež Njeswačanska z dale a wjetšej ličbu dźěći a jich zastaranjom zaběrać. Tamniša pěstowarnja w nošerstwje Čerwjeneho křiža (DRK) je na swoje hranicy storčiła, štož nastupa kapacitu. Hižo loni je gmejna hromadźe z nošerjom zarjadowała dwě móžnosći za dnjowe maćerje, kotrejž staratej so kóžda wo pjeć do šěsć dźěći. To pak situaciju jenož přechodnje wolóža. Wostanje dale prašenje, pěstowarnju rozšěrić abo nowu twarić. Inženjerski běrow tuchwilu wobě warianće wobliči.

Ćisk (JT/SN). Wokoło Serbskeho dźěćaceho towarstwa Ćisk je w minjenymaj lětomaj trochu woćichło. Po lońšim nowym starće z halloweenskej party pak so dźěći z dorosćenymi nětko zaso tydźensce zetkawaja, zo bychu paslili, sej přirodu wotkryli a serbske nałožki pěstowali. Na nastork bywšeje kubłarki Brunhildy Richteroweje připrawichu tele dny na kromje parka dźěćacych štomow pasmo, na kotrymž maja dźiwje kwětki kćěć. Tak chcedźa sobu pomhać dźiwje pčołki zachować, kotrymž maja kćenja picu skićić.

Na wot młodźinskeho kluba spřihotowanym pasmje su dźěći symjo wusyli a čakaja nětko žadosćiwje na prěnje kćějace kwětki.

Paduši ćežku techniku wužiwali

Bart. 500 kilogramow ćežku zhusćensku mašinu su njeznaći minjeny kónc tydźenja z twarnišća w Barće pokradnyli. Dokelž bě wona mjez bagrowymi łžicami takrjec zatłusnjena, drje wužiwachu paduši ćežku techniku. Policija pyta swědkow, kotřiž su něšto wobkedźbowali.

Łaz (AK/SN). Farski dom Łazowskeje ewangelskeje wosady ma lětsa zbrašenym wotpowědowacy zachod dóstać. Kaž Günter Wjenk z wosadneje cyrkwinskeje rady informuje, dóstachu tele dny přizwolenje za spěchowanske srědki sakskeho socialneho ministerswa. Za 23 500 eurow ma před zachodom skłonina nastać. Nimo toho zatwarja durje, kotrež hodźa so elektrisce wočinić.

Změja serbsku zamołwitu

Rakecy. Přichodne posedźenje Rakečanskeje gmejnskeje rady je jutře, srjedu, w 17 hodź. w zetkanišću při Nowowjesnjanskej dróze. Wuradźować chcedźa tam mjez druhim wo pomjenowanju ­zamołwiteje za naležnosće Serbow w gmejnje. Dale póńdźe wo zhromadne dźěło mjez Rakečanskej a Njeswačanskej gmejnu.

Ze wšitkich dojutrownych wikow Hornjeje a srjedźneje Łužicy drje maja te w Brězowce najswójbniši charakter. Minjenu njedźelu su dźěći hromadźe ze staršimi a dźědami­ a wowkami na tamnišej starej šuli demonstrowali, kak wušiknje jutrowne jejka pisanja. Mjez druhim móžachu wopytowarjo Bartschec a Beesdowec swójbje při debjenju přihladować. Wšitke holcy běchu narodnu drastu Slepjanskeho regiona­ woblečene. Wo wobrubjenje wšelakoreho razu postarachu so Serbski dźě­ćacy a młodźinski ansambl Slepo, małe rjemjeslniske wiki a tykancowy bazar. Foto: Jost Schmidtchen