Z wudaća: wutora, 16 julija 2019

Zwjazkowa kanclerka Angela Merkel twornju koncerna Siemens wopytała

Zhorjelc (dpa/SN). Zwjazkowa kanclerka Angela Merkel je wčera twornju koncerna Siemens w Zhorjelcu wopytała. Zhromadnje ze sakskim ministerskim prezidentom Michaelom Kretschmerom (wobaj­ CDU) a nawodu koncerna Joeom Kaeserom je sej wona wjacore stacije zawoda z 800 přistajenymi wobhladała. Je to hłowny centrum Siemensa za produkciju parnych turbinow. Bjezposrědnje do wopyta Merkel bě Siemens ze Sakskej a Fraunhoferskej towaršnosću paket přichoda za Zhorjelc podpisał. Tón před­widźi załoženje inowaciskeho campusa w zawodźe. Po zrěčenju planuja inwesticije něhdźe 30 milionow eurow a sto nowych dźěłowych městnow. Siemens chce zhromadnje z Fraunhoferskej towaršnosću labor za slědźenje z wodźikom natwarić, w kotrymž chcedźa wudobywanje, składowanje a wužiwanje wodźika přepytować.

Ličenje kołpjow su wčera na Themsy we Wulkej Britaniskej zahajili. Na wjacorych wotrězkach ptački registruja a zdodom hladaja, kak so jim dźe. Pjeć dnjow trajacy spektakl w Londonje zahaja a njedaloko Oxforda skónča. „Swan Upping“ je britiska tradicija, kotraž pochadźa z 12. lětstotka. Tehdy běchu słužownicy kralowskeho palasta za kołpjemi pytali, dokelž běchu ptački kruty wobstatk kralow­skeho jědźneho plana.

Škrěkanje dweju papagajow je w Hessenskej zasadźenje policije zawiniło. Pasantka bě w Heppenheimje žałostne wołanje wo pomoc słyšała a na to policiju wołała, měnjo, zo tam někoho zadaja. Zastojnicy móžachu pad spěšnje wu­jasnić. W přitomnosći policistow wšak běštej papagajej skludnej. Jedyn sydny so policistce samo na ramjo, hdźež so hwěžki na uniformje błyšćachu.

Wjace serbskosće w zjawnosći městow a gmejnow je žadanje, kotrež stajnje znowa słyšimy, zwjetša ze serbskeje strony. Nastajić we wobłuku romantiskeje předawanskeje nocy figuriny w serbskej drasće do wukładnych woknow wobchodow je zawěsće jedna móžnosć, tomu wotpowědować. Zo su tajke něšto mjeztym hižo wjacore razy w Budyšinje činili, je derje. Mi so sprawnje prajene krótke serbske napisy a hrónčka na rostlinskich sudobjach abo sedźenskich móžnosćach wosrjedź města lěpje lubja. Štož su na tak mjenowanym staroměšćanskim bulwaru we Wojerecach zwoprawdźili, mam za jara dobru mysličku. Takle tam na jednore, ale mi so zda jara skutkowne wašnje w zjawnosći na serbsku rěč skedźbnjeja. A ćim lěpje, hdyž tajka akcija njeje na jedyn wječor wobmjezowana, ale jako něšto trajne w měšćanskim wobrazu wostanje. Tajkich idejow bychmy wjace trjebali, nic jenož we Wojerecach. Marian Wjeńka

Tysacy zajimcow su kónc tydźenja 18. błótowske rjemjeslniske a burske wiki w Bórkowach přiwabili. Přewažnje němski program na jewišću wobsahowaše drje jenož někotre serbske dypki, kaž pokazku tradiciskich rejow drastoweje a rejwanskeje skupiny Tšupc (Straupitz). Napadnyło pak na wikach je, zo bě nimale kóžde stejnišćo dwurěčnje delnjoserbsce-němsce popisane. Tež mnohe žony a młode holcy běchu serbsku bursku abo swjedźensku drastu woblečene. Jara požadana bě mjez hosćimi dekoracija z drjewa, kajkuž ju Christa a Bernhard Schulze poskićataj. Wšako wu­dźěłki samaj dźěłataj, kaž SN rjeknyštaj. Ze starosću pak zhladujetaj Choćebužanaj do přichoda, dokelž pobrachuja wšudźe rjemjeslnicy. Foto: Janek Wowčer

Na wjacorych městnach we Wojerowskim starym měsće wuhladaš móžnosće k posydnjenju a rostlinowe sudobja ze serbskim napisom. Te běchu we wobłuku staroměšćanskeho bulwara nastajili a při tym tež na dwurěčnosć dźiwali. A tak móžeš nětko na meblach­ a sudobjach hrónčka, powitanje a podobne tež serbsce čitać. Foto: Gabriela Linakowa

Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo zetkawachu a rady pobjesadowachu. W našej lětnjej seriji na něhdyše wjesne wobchody dopominamy.

Dźensa: Njeswačidło (5)

Sportowski zadobywar bjez rubizny

Wojerecy. Chětro sportowski bě zadobywar w nocy na póndźelu we Wojerecach. Na fasadźe produkciskeje hale krosnowaše wón štyri metry dowysoka, wočini tam wokno a zalězewši přez nje nutřka zaso dele krosnowaše. W hali wón wšitke kamory a polcy přepyta, powšěm zdaću pak ničo kmaneho njenamaka. Tuž wón přez wokno w přizemju zaso ćekny. Wěcna škoda wučinja přiwšěm 500 eurow.

Na kóncu wólbneje doby pokiwy a ideje za přichodne dźěło dali

Ralbicy (JK/SN). Komunalne wólby w meji su so w mnohich gmejnach wo změnu w zestawje gmejnskeje rady postarali. Po lětnej přestawce so nowe wjesne parlamenty konstituuja a swoje dźěło zahaja. Tež w gmejnje Ralbicy-Róžant budu so radźićeljo w nowej zestawje k wuradźowanju zetkać, a to 12. septembra. Na poslednim posedźenju dotalneje rady jimaštaj so radźićelej słowa, zo byštaj na něšto skedźbniłoj, štož měło so na kóždy pad w nowej radźe hinak abo lěpje činić.

Prjedy hač smě něchtó twarić, sej archeologojo městnosć bliže wobhladaja a za zajimawostkami pytaja. W Slepom, hdźež ma Nowy Miłoraz nastać, woni tójšto namakachu.

Slepo (CK/SN). Zbytki wudobywanja železoweje rudy z bywšich lětstotkow namakachu při wurywanjach na sewjernej kromje Slepoho. Archeologojo krajneho zarjada wuslědźichu nimale sto pjecow, kotrež běchu něhdy zwjetša po rynku natwarjene. To rěči za industrielne wužiwanje. „Slepo bě něhdy industrijowy centrum“, zwěsća nawoda wurywanjow Olaf Ullrich. Rudu wudobywachu něhdy při wjesnej hrjebi, něhdźe 200 metrow zdalene wot městna, hdźež chcedźa Miłoraz přesydlić.

Stajnje zaso je statna dróha S 111 mjez Budyšinom a Wósporkom městno ćežkich wobchadnych njezbožow. Najnowše sta so wčera nawječor. Wodźerka Forda chcyše přijěducy z Wósporka nalěwo do směra na Droždźij (Drehsa) wotbočić. To wodźer dalšeho Forda po wšěm zdaću přewidźa a z wotmachom do před nim wotbočaceho awta zrazy. Při tym so wodźerka prěnjeho jězdźidła snadnje zrani, w tamnym pak so muž a dźěćo ćežko zraništaj. Wodźerja dyrbjachu z helikopterom do chorownje dowjezć.­ Wobchadna njezbožowa słužba Zhorjelskeje policajskeje direkcije nětko za dokładnej­ přičinu njezboža slědźi. Foto: Jens Kaczmarek