Z wudaća: pjatk, 06 septembera 2019

Lepjeny paduch so wobarał

Kamjenc. Cuzy muž bě předwčerawšim w zawodźe w zapadnym dźělu Kamjenca. Wón poda so do přestawkoweje rumnosće a přepyta tam toboły sobudźěłaćerjow. Nimo toho w předrasćerni do wšitkich kamorow pohlada a spakosći tam pakćikaj kofeja a EC-kartu. Při tym jeho sobudźěłaćerjej zawoda lepištaj, na čož chcyše paduch ćeknyć. Přistajenaj pak jeho kruće dźeržeštaj. Byrnjež so muž wobarać spytał, měještaj jeho zmužitaj dźěłaćerjej tak dołho w horšći, doniž policija njepřijědźe a 38lětneho njezaja. Wón změje so nětko rubježneho padustwa dla zamołwić. Kaž w nowinskej zdźělence Zhorjelskeje policajskeje direkcije rěka, so policija sobudźěłaćerjomaj za jeju zmužite zasadźenje dźakuje.

Lětsa zhladujemy na 30. róčnicu powalenja murje a tak na towaršnostny přewrót w Němskej. Kóždy je chětro napjaty čas hinak dožiwił. Napisajće nam tuž swoje dopomnjenki, kak sće wy, lubi čitarjo, přewrótowy čas dožiwili a posrědkujće je nam. Zawěsće namakaće tež hišće historiske foto, kotrež so k tomu hodźi. Pósćelće nam wšitko za wozjewjenje hač do 1. oktobra pak postalisce na: Serbske Nowiny, Sukelnska 27 (Tuchmacherstr. 27), 02625 Budyšin pak elektronisce na: . Jako hesło podajće prošu „Róčnica“. Wutrobny dźak! Redakcija Serbskich Nowin

Młodźinski kofej

# zeznaj młodźinske kluby a cyłki

ze swojeje wokoliny a wuměnjej sej mysle

z nimi!

# wothłosuj swoje terminy za młodźinsku

protyku 2020 z druhimi!

# informuj so wo aktualnych móžnosćach

podpěry a spěchowanja za twoje/waše

aktiwity!

>>> Přińdź sobotu, 7. septembra, wot 15 hodź. na kofej

a rozmołwu do młodźinskeho kluba w Nowej Wjesce!

wjace informacijow: socialna dźěłaćerka Marija Koklina

mobil: 01520 7273806

Hižo 27. raz wotmě so wjesny swjedźeń w Serbskich Pazli-

cach. Zahajił běše so tón kaž přeco pjatk z natočenjom piwa. Mało ludźi dla pak njemóžachu lětsa z tradiciju pokročować, zo hraja najprjedy žony přećiwo sebi kopańcu a po tym mužojo (horni dźěl wsy přećiwo delnjemu). Najebać to bě nalada dobra, wšako zahraštaj Melodia-­di­skoteka­ a DJ Lehmens.

Sobotu steješe kopańca na dnjowym porjedźe. Pjeć mustwow z wokolnych wsow Serbskopazličenjo na turněr witachu. Dobyli su jón Wotrowčenjo. Wulki dźak słuša wšěm sponsoram za podpěru. Wječor pokazachu młodostni swój talent na jewišću. Lětuši program jednaše wo bajce, w kotrejž princesna a princ z města na wjes ćehnjetaj. Hač do ranja piskaše DJ Roman k rejam.

Njedźelu k rańšemu piwku hudźeše kapała Horjany, kotraž je tež tój­što ludźi zwonka gmejny přiwabiła. Po programje dźěći a młodost­nych dachu Serbskopazličenjo rjany kónc tydźenja při piwje a praženej

kołbasce wuklinčeć. tekst a foto: Jakub Langa

Hižo něšto lět jězdźi Michał Cyž, nawoda Budyskeho SAEK-studija, za čas serbskeho rěčneho lěhwa do Wodowych Hendrichec, tak tež lětsa zaso. Za štwórtk, 25. julij – to bě mjeztym šesty dźeń prózdnin­skeho lěhwa –, běše sej mjenujcy zaso raz wosebity interaktiwny parcours ze wšelakimi stacijemi wumy­slił. Kaž bě to hižo hdys a hdys činił, chcyše tež lětsa zaso modernu technologiju geocachinga sobu zatwarić. Při tym pytaja hrajerjo z pomocu geotechni­skich nastrojow za wěstymi koordinatami. Su-li městnosć namakali, dó­sta­­nu tam při­chod­ne koordinaty a tak dale.

fota: elias bětkaElias Bětka z Drježdźan bě sej w aprylu ze swojim kumplom spektakularny són spjelnił. Z wulkim ekwipmentom podaštaj so ekstremnaj sportowcaj na kolesu z Drježdźan do Alpow. ­Jeju­ cil: we wšěch sydom krajach Alpow na naj­wjetšu horu krosno­wać. W dźens­­nišim a při­chodny­maj wudaćomaj Młodźiny móže­će čitać, hač je so jimaj to pora­dźiło!

D ypkownje 1. apryla šwiknychmoj so na koleso

 a po­dachmoj so do směra na Čěsku. Tamniša lochka hórska krajina bě nam sćoplenje za wulke předewzaće. Při Děčínskim Sněžniku prěni raz pytnych­moj, zo njebudźe z ćežkim kolesom runje lochko wulke hory přeprěčić. Přez Čěsku jěć bě dobry spočatk: rjana krajina a přijomni domoródni. Nimo trójneje pany na kolesu běchmoj poměrnje spěšnje w Aw­striskej. Něhdźe 120 kilometrow wob dźeń jědźechmoj.

Prěnje małe přesmyki dyrbjachmoj tam přeprěčić, ­prjed hač dźěše do słowjenskeho městačka Mojstrana. To bě wucha­dźišćo za postup na naju prěni wjeršk Triglav.

Wabjace hoberske žołmy a jasna ­woda­

Wid na Kelingking ­Beach –

kupa Nusa Penida

Přestawka

na pućowanju

k wulkanej

Rochony – hoberske ­elegantne­ čorne mórske zwěrjataDowol ze serbskej přećelku Juliju a Paolu z Ekuadora

Z přećelkomaj

na Nusy Perida

Hižo dołho mějach Indonesku na swojej lisćinje krajow, kotrež chcych na kóždy pad raz wopytać. Najznaćiša kupa Indoneskeje drje je Bali – rjany to dowolowy cil a zdobom tež mój startowy dypk za 30dnjowske pućowanje po kraju. Indoneska je chětro wulki kraj z mnohich kupow, a tón chcych sebi hromadźe ze serbskej přećelku Juliju kaž tež Paolu z Ekuadora wotkryć.