Z wudaća: pjatk, 04 oktobera 2019

Tekst a Foto: Marcel Brauman

Serbske dźěćace towarstwo Ćisk je ze swojim nowym pro­gramom njedawno publikum na Ćišćanskim dworowym swje­dźenju zahoriło. Wobydle­rjo a jich hosćo móžachu na sydom stato­kach a w parku wosrjedź wsy při naj­rjeńšim wjedrje swjećić a su sej wot pjatka wje­čora hač do njedźele wjele po­skitkow, mjez druhim tež wja­core serbske kulturne, lubić dać.

Před třomi lětami su nowu pěstowarnju „Chróšćan kołć“ wo­te­wrěli. Na won­kownej ležownosći běchu pak hišće kućiki, kotrež mě­jachu so porjeńšić. Z teje při­činy požada so staršiska přirada wo budget za spě­cho­wanje čestnohamt­skeho dźě­ła w Budyskim wokrjesu z pro­jektom pod hesłom „dźěći a starši porjeńšeja zhro­madnje areal pěsto­warnje“ a dósta pjenježne srědki. Za nje kupi wšelake kerki a štomy. Před tydźenjomaj bě tak dalo­ko. Wjac hač 15 swójbow je so gratu při­mało a zhromadnje z kubłarjemi a při­sta­jenymi gmejny kerki a štomy sadźało. Tež cyłkownu ležownosć su porjeńšili a pěsk do kašćikow nawozyli. Zhromadna akcija je wšitkim wulke wjeselo wobradźiła. Tekst a foće: Katharina Jurkowa

Foto: Silke RichterZmije maja lětać. To sej kóžde dźěćo nazymu přeje. W tymle počasu słuša to hižo k tradiciji. Tajki zmij hodźi so tež twarić, štož je swójbam dobra přiležnosć swój čas zhromadnje wužiwać a po rjanym dožiwjenju so z polow a łukow nawróćić. Njedawno přeprošachu w Tornowje wulkich a małkich zajimcow na zmijowy swjedźeń, hdźež poskićachu organizatorojo nimo toho samo hišće jabłučkowy tykanc a hudźbu. Tak zahudźi Marion Gebhardt zhromadnje z  wnučku na akordeonje. A na kóncu dnja wuzwolichu Emmu Engmann za kralownu jabłukow. Dźěći pak zawjeselichu staršich, dźědow a wowki z programom. Najebać to, zo bě pobrachowaceho wětřika dla ćežko zmijam lětać dać, je so swjedźeń poradźił. Tež  nawodnica Tornowskeje pěstowarnje Veronika Freiberger bě wjesoła. Silke Richter