Serbske Nowiny namołwjeja swojich čitarjow pod nadpismom „Wostanjemy doma!“ dopisować, što za čas koronakrizy takle doma abo w zahrodce činiće. Kak kreatiwni sće a što wam k přeprěčenju tohole ćežkeho časa takle do mysli přińdźe, z čim móhli so zaběrać? Pisajće nam na . K tomu podajće prošu hesło „Wostanjemy doma!“ Čakamy na waše dopisy, wobrazy a rysowanki a wuprajamy hižo nětko wutrobny dźak. Sonja Krječmarjowa z Budyšina je so pjera jimała a piše:
Tež mój z mandźelskim smój potrjechenaj wot koronawirusa. Běchmoj na dowolu w Egyptowskej. Wróćolět bě hižo mały dyrdomdej. Dyrbjachmoj štyri dny zašo wróćo hač planowane, a potom su zabyli nas informować, hdy bus na lětanišćo wotjědźe. Dyrbjachmoj tuž 40 kilometrow z hotela do Hurghady z taksijom jěć. Lětanišćo bě kopate połne, lětadło hotowa katastrofa (stare a wuske), ale běchmoj najebać to wjesołaj, jako w Lipsku přizemichmoj – byrnjež naju awto na Drježdźanskim lětanišću stało.
Kreatiwne ideje pytane
Worklecy. Dekanatne dušepastyrstwo za dźěći a młodźinu pyta za formami, kak móhli pod tučasnymi wuměnjenjemi swoju wěru wuznawać, martrowny tydźeń wopominać a radosć zrowastanjenja wozjewjeć. Zapodajće swoje ideje hač do srjedy, 1. apryla, w 19 hodź. přez Instagram, Facebook abo z mejlku na .
Njewotknihuja pjenjezy
Budyšin. Wot 1. apryla 2020 Budyske měšćanske zarjadnistwo staršiski pjenjez hižo njewotknihuje. Starši, kotřiž popłatk hewak sami přepokazuja, su namołwjeni to w aprylu wostajić. Tym, kotřiž su jón hižo zapłaćili, chce město popłatk spěšnje wróćić. To płaći tež za te dźěći, kotrež tuchwilu nuzowje zastaruja.
Woheń wulku wěcnu škodu načinił
Šěrachow. Wčera dopołdnja stej so na Chróstawskej dróze we Wurbisu bróžnja a domske paliłoj. Po wšěm zdaću bě woheń z tony za wotpadki wuchadźał. Wjacore wohnjowe wobory běchu zasadźene. Wěcna škoda wučinja 100 000 eurow.
Předjězbu njewobkedźbował
Budyšin. Na křižowanišću Mužakowska/Krakečanska w Budyšinje sta so njedźelu wječor wobchadne njezbožo. Wosobowe awto marki Seat Leon bě z Delnjeje Kiny přijěło, bjeztoho zo by 21lětny šofer předjězbu małotransportera marki Opel Morena wobkedźbował. Tón přijědźe ze směra Budyšin-Bórk a zajědźe do sćežora ample. 47lětna wodźerka Opela a 20lětna sobujězdźerka Seata so zraništej. Wěcna škoda wučinja něhdźe 25 000 eurow.
ST Hnašecy-Dobruša
– Sokoł Ralbicy/Hórki 1:8 (1:2)
Zestawa hosći: Pilc – Rychtar, Zynda, Matka, M. Žur, Šołta, Obst (60. Brězan), Lulak, Čornak, Serbin, Brückner
Spočatk měrca běše koparski swět hišće w porjadku a koparjo Sokoła Ralbicy/Hórki wuchadźachu z toho, zo so winowatostne hry starych knjezow 14. měrca z pokalnej hru zahaja. Zo bychu prawje přihotowani byli, zorganizowachu sej partiju na kumštnym trawniku w Dobruši. Mustwje njeběštej do toho ženje přećiwo sebi nastupiłoj.
Pola Sokołow bul k zadźiwanju jara derje běžeše. Nowy trawnik a dobra motiwacija k tomu přinošowaštej. Tak wuhrachu sej prěnje składnosće, kotrež pak wrotar hosćićela znješkódni. W 20 min. pak běše bjezmócny, jako Daniel Brückner nawjedowanje docpě. Druhe wrota běchu kuriozne. Bosćij Lulak, znaty za daloke zamjety, ćisny bul hłuboko do šěsnatki, wrotar chwataše hrajnemu nastrojej napřemo, so jeho hišće z rukomaj dótkny, tola bul kuleše so do wrotow. Do połčasa zawinowachu Sokoljo jědnatku, kotruž domjacy wěsće přetworichu.
W socialnych syćach běchu minjene tydźenje wobrazy serbskeju triatletow a dalšich triatletow widźeć, kotřiž trenuja we wukraju. Mjez nimi bě tež Marian Žur z Lejna. Kilian Hrjehor je so z nim rozmołwjał.
Knježe Žuro, mjez wjacorymi triatletami w treningowej skupinje sće tež Wy na wobrazach w Facebooku, na Instagramje abo we WhatsApp-statusach widźeć był. Što bě to do skupiny?
M. Žur: Běchmy skupina sportowcow z Riesy, Budyšina a Lejna. Treningowe lěhwo přewjedźechmy hišće do zakaza treninga w skupinach.
Hdźe sće trenowali a kak dołho sće tam byli?
M. Žur: Přebywachmy cyłkownje tydźeń na španiskej kupje Mallorca. Mějachmy tam jara dobre wuměnjenja za treningowe lěhwo, běchmy płuwać a z kolesami po puću. Tež wutrajnostny běh steješe na dnjowym porjedźe.
Kajka bě tam situacija koronawirus nastupajo?
M. Žur: Tež tam bě wirus dźeń a bóle tema. Policija je samo k nam do hotela přišła a rjekła, zo hotel zawru, nichtó njesmě wjac hotel wopušćić kaž tež do kupjele płuwać hić. Tež kolesowanje běše zakazane, kompletnje wšitko su zawrěli.
Wolejbulisća Serbskeho gymnazija Budyšin (SGB) běchu so spočatk januara wuspěšnje na regionalnym finalu šulerskeho wubědźowanja „Młodźina trenuje za olympiju“ wobdźělili. Tak zastupowachu woni SGB srjedź nalětnika na sakskim krajnym finalu starobneje klasy II w Dippoldiswaldźe.
Wubědźowanje, na kotrymž so šěsć mustwow wobdźěli, přewjedźechu w dwěmaj staflomaj. W skupinje SGB běštej hišće wyšej šuli z Kamjenicy-Šunowa a z Třělanow (Strehla).
Serbski gymnazij Budyšin – Wyša šula Kamjenica-Šunow 2:1 (20:25, 25:20, 15:10)
W prěnjej hrě přećiwo Kamjeničanam namakachu so serbscy gymnaziasća jeno ćežko do trěbneho hrajneho rytmusa. Tak přěhrachu prěnju sadźbu 20:25. W dalšimaj sadźbomaj pak přesadźichu so z 25:20 a 15:10.
Serbski gymnazij Budyšin – Wyša šula Třělany 2:0 (25:16, 25:23)