Z wudaća: srjeda, 08 julija 2020

Budyšin. Z kolesom so na puć podać je zaměr akcije, kotruž Budyski krajnoradny zarjad přewjeduje. Hač do 26. julija móža so sportowcy na akciji wobdźělić. Kilometry zapisaja online abo tež po GPS-datach do wosebiteje „Stadtradel“-app. Dalše informacije namakaće pod www.stadtradeln.de. Z kolesowanjom zběraja teamy kilometry za cyłkowne hódnoćenje wokrjesa w přirunanju z wobdźělnikami ze wšeho swěta.

Zaso sportować

Budyšin. Budyske sportowe towarstwo lochkoatletow Čerwjeno-běli 90 je tribunowy běh iniciěrowało. Přewjesć chcedźa jón pjatk, 10. julija, na Młynkec łuce.

Konop plahowali

Budyšin. Podhlada ilegalneho plahowanja konopje dla podachu so policisća póndźelu wječor do bydlenja dweju 26lětneju muži w Budyšinje. Tam wuhladachu na balkonje dwě konopjowej rostlinje, w bydlenju hišće wjacore diwersne utensilije, někotre titki z njejasnym wobsahom a rozbuchadło.

Polo so paliło

Ćisk. 13 wohnjowych wobornikow je na polu njedaloko Ćiska woheń zhašało. Palił njebě so lěs, kaž běchu wobydlerjow informowali, ale dohromady 250 kwadratnych metrow wotžnjateho pola.

Wojerecy (KD/SN). Wjeršk kóždolětneho lěćneho programa Wojerowskeje Kulturneje fabriki (Kufa) je nadróžne dźiwadło na Piwarskej hasy. Na lětušu pomjeńšenu wariantu minjenu njedźelu popoł­dnju přichwata tójšto ludźi do Kufa, hdźež hudźeše orchester Tango Misterio. Rejwali su k tomu pory, kotrež tam kursy wopytuja. Tež Anke a Olaf Kühn běštaj mjez nimi a wjesołaj, zo móžeštaj po dołhej přestawce zaso k argentinskej hudźbje swoje koła wjerćeć. Tři měsacy dyrbještaj zwisk k přećelam tango-hudźby přez telefon abo z mejlkami wudźeržować. Na parkowanišću Kulturneje fabriki lubješe so ludźom program amerisko-němskeho duwa „Bobarino a knježna Döpp“. Dale překwapi skupina Tridocoulus z Berlina ze spěwom, breakdanceom a akrobatiku. Semion Bazavlouk rozkładowaše princip beatboxinga, kak je móžno z hubu bijadło abo perkusijowe instrumenty imitěrować. Trójka Tridocoulus je so Helze Kopischke z Wojerec najlěpje lubiła. Jako młoda žona dźě běše wona sama artistka a měnješe, zo ma „tele zarjadowanje za žiwjenski eliksěr“.

Hižo wot apryla nawjeduje Alexander Kühne wobłuk hospodarskeho spěchowanja města Wojerec. Poprawom bě rodźeny Wojerowčan powołanje fyzioterapeuta nawuknył, je jako tajki tež někotre lěta dźěłał a so zesamostatnił. Po studiju zjawneho hospodarstwa na Budyskej powołanskej akademiji bě wón sydom lět projektowy manager Wojerowskeho Łužiskeho technologijoweho centruma Lautech tzwr. Z bywšej hospodarskej spěchowarku města Franzisku Tennhardt je wón wšelake iniciatiwy kaž „hospodarsku snědań“ sobu or­ga­nizował. Wo nowym dźěle, wo wužadanjach struktur­ne­je změny kaž tež wo hospodarskich wizijach města a wokoliny je so z nim Andreas Kirschke rozmołwjał.

Čehodla trjeba město Wojerecy hospodarskeho spěchowarja?

W Němskim koparskim zwjazku (DFB), w Sakskim koparskim zwjazku (SFV) a na najnišej runinje Zapadołužiskeho koparskeho zwjazka (WFV) njejsu w času­ koronapandemije lěnjeho pasli. Maksimilian Zahrodnik je někotre měnje­nja k dźěłu runje mjenowanych zwjazkow w rjadach Sportoweje jednotki Chrósćicy nazběrał.

Józef Donat: Jako přiwisnik kopańcy sym wězo wjesoły, zo su sezonu na profijowej runinje dohrać móhli. Tak mějach zaso kónctydźensku zaběru. Po mojim zdaću tróšku njefairne pak bě, zo mějachu tam naraz pjenjezy a srědki za testy. Porno tomu je we wjetšich zetkawanskich centrach, ale tež w šulach přeco hišće­ wobćežne so dosć testować dać. Zapadołužiski koparski zwjazk je to po mojim měnjenju derje činił. Wot tydźenja k tydźenjej su tam roz­sudźeli, a, bě-li trje­ba, hry wotprajili. Na kón­cu cyły zbytk sezony 2019/2020. Wězo njejsu na tej­ ru­ninje móžnosće date, zo by so dale hrać hodźało. Sym pak wje­soły, zo směmy mjeztym zaso trenować a zo je start přichodneje sezony tak daloko zrjado­wany. Tak so jako koparski lajk na hraj­nu dobu 2020/2021 wjeselu.