Z wudaća: wutora, 22 septembera 2020

Miłoćicy (SN/MiR). Z nowym poskitkom chce Njebjelčanske wuměłstwowe a kubłanske towarstwo Kamjenjak swoju lětnju sezonu zakónčić. Tónle pjatk a sobotu, stajnje wot 14 do 17 hodź., přeproša jeje čłonojo zajimcow na prěni dźeń wote­wrjenych duri do Miłočanskeje skały Při Krabatowym kamjenju. Tam móža so zajimcy wobdźělić na dźěłowej skupinje „Sam rězbarić“. Poskitk měri so na dźěći, młodostnych a młodych dorosćenych, kotřiž chcedźa so na tymle wuměłskim polu wuspytać. Předznajomosće ­za to žane trěbne njejsu.

Budyšin. Zhromadnje ze swójskim zawodom za wotstronjenje wopłóčkow a ze zawodom za energiju a wodu chce město Budyšin Paulijowu hasu wutwarić. Tam maja so wodowody kaž tež zastaranje z milinu a pitnej wodu wobnowić. Wulke diskusije zbudźiło pak je, kak ze štomami wobchadźeć, kotrež při dróze steja. Detailowany posudk štomy nastupajo twori nětko zakład namjetowaneho planowanja. 28. septembra chcedźa je měšćanske zarjadnistwo a zawodaj mějićelam ležownosćow na Paulijowej, kotraž leži w tak mjenowanej wilowej štwórći Budyšina, předstajić. Dalši zajimcy su na zarjadowanje, kotrež započnje so we 18 hodź. w Budyskej sukelnicy, witani. Wobmjezowaneje ličby městnow dla je při­zjewjenje pod abo pod tel. čo. 03591/ 534 251 nuznje trěbne.

Magiski próh nimale překročeny

Paducha lepili

Kulow. W Kulowje maja wosebje kura­žěrowanych wobydlerjow. To spózna tež 38lětny muž, kiž bě sej tam zańdźenu sobotu w kupnicy nachribjetnikaj z tworami napjelnił. Na to chwataše z objekta, sydny so na koleso a wotjědźe, bjeztoho zo by něšto z toho, štož bě sej zapakował, zapłaćił. Sobudźěłaćerka wobchoda pak jeho přesćěhaše, při čimž měješe pomoc kuražěrowaneho šofera transportera. Zhromadnje so jimaj poradźi paducha zadźeržeć. Zawołani zastojnicy zwěsćichu pokradnjene twory w hódnoće něhdźe sto eurow. Nětko ma so muž podhlada padustwa dla wusprawnić. Zwotkel měješe wón koleso, dotal tež hišće jasne njeje.

SJ Njebjelčicy – HZ Hórnikečanski jězor 3:3 (1:1)

Zestawa domjacych: Matješk – Kral, Hanuza, Hrjehor (82. Mikławšk), Lejnart, Plaettner, Čornak (73. F. Domš), Pawlik, Ričel, Korjeńk, O. Domš

HZ Hórnikečanski jězor/Ćisk II – SJ Chrósćicy II 1:0 (1:0)

Zestawa hosći: Hejduška – M. Donat, Kl. Mark, Cyž, Schulze (46. Ph. Mark), L. Zahrodnik, G. Zahrodnik, Zynda, Handrik (64. Ki. Mark), Bogusz, J. Donat

Swój druhi hrajny dźeń podachu so koparjo rezerwy Chróšćanskeje SJ do Ćiska. Dokelž bě tamniše mustwo tohorunja z dobyćom do sezony startowało, wočakowaše hosći poměrnje motiwowany přećiwnik. Trenarska dwójka Bosćij Klimant/Maćij Dórnik pak měješe poměrnje wulki wuběr młodych hrajerjow.

„Habemus papam“ – rěka w Romje, hdyž je po wjacorych dołhich posedźenjach konklawy nowy bamž namakany. Tež pola FC Energije Choćebuz je pytanje za naslědnikom dotalneho trenarja Sebastiana Abta trochu dlěje hač wočakowane trało. Nětko pak maja ze 48lětnym koparskim wučerjom Dirkom Lottnerom noweho šefnazwučowarja. Jako kotrenar budźe jemu Tim Kruse poboku.

„W běhu našich rozmołwow je so spěšnje wukopało, zo so mysle a koncepcija Dirka Lottnera k FC Energiji hodźa. Smy wo tym přeswědčeni, zo mamy z nim trenarja, kiž ma nazhonjenja jako kopar zwjazkoweje ligi, ale tež ze swojich dotalnych trenarskich stacijow, a zo móže nas zaso na wuspěšne kolije wjesć“, rjekny sportowy nawoda Choćebuskeho koparskeho kluba Sebastian ­König.