Z wudaća: srjeda, 14 oktobera 2020

Štóž je sej přichodne dny předewzał swoju zahrodku přeryć, toho drje koza liznje. Wjele dešća, kiž bě za minjenu nóc a dźen­sa připowědźeny, drje by k tomu wjedł, zo čłowjek jenož w błóće tepta. Lisćo hrabać abo mjeztym wuschnyte kwětki zrumować drje při pancatym wjedrje tež žane prawe nazymske dźěło njeje. Snano pak tola wjeselo přewahuje, zo so zaso raz trochu wjace nadešćuje. Přetož hornja woršta pódy drje je nětko dosć włóžna, trochu hłubšo w zemi pak je dale jara sucho. Štož zwostanje, je wuhlad na dalši nazymski čas, hdyž na nas w zahrodce a na zahrodźe přiwšěm dosć dźěła čaka. Za nje móžeš sej tež profesionalnu pomoc tule poručacych so firmow wuprosyć. ­Fachowcy poradźuja zahrodkarjow wo wšelakich družinach štomow, kotrež móžeš nazymu sadźeć. A woni tohorunja wědźa, kotry grat a kotre mašiny su najkmańše. Marian Wjeńka

Ze štyrjomi prapremjerami wot Kocora do přitomnosće a naspjet: Klasiska harmonika a atonalna awantgarda ruku w ruce

„Pućowanje po hudźbnym swěće Serbow“ – tele hesło koncerta za wiolinu a wiolu spočatk oktobra w Budyskim Serbskim muzeju dokładnje wopisuje, što je wopytowarjow wočakowało. Wšako wopřijimaše dramaturgisce wušiknje zestajany program wšitke štyri za tudyše wuměłske stawizny w tym zwisku najwažniše doby wot romantiki hač k nowej hudźbje. A tola zaklinčachu dohromady štyri kruchi prěni raz – dźakowano ma­łemu trikej. „Klasikar serbskeje hudźby“, kaž husler Rostockskeje filharmonije a moderator wječora Malte Hübner Korlu Awgusta Kocora mjenowaše, „wšak nažel­ ničo za wobsadku, kajkuž tu dźensa mamy, skomponował njeje. Tuž je nam Jan Cyž pomhał a po motiwach stare­ho mištra twórbu ‚Dźewjaty dźeń‘ spisał. Słyšiće tuž najstaršeho a naj­młódšeho komponista, potajkim Kocora a Cyža, takrjec simultanje.“ A tomu tež woprawdźe tak bě.

VfB Kśišow

– FC Energija Choćebuz 2:3 (1:1)

Zestawa domjacych: Drangosch – Jesch­ke, Knechtel, Taak, Felgenträger, Hebler, Zurawsky, Lopes (81. Pauling), Dahm (81. Dahm), Gerstmann, Pahlow

zestawa hosći: Stawecki – Pelivan, Jarosch, Storb, Hoppe, Gladrow (85. Ku­jovic), Eisenhuth, Hofmann, F. Geisler (88. N. Geis­ler), Brügmann, Crnički (78. Postelt)

Z napjatosću wočakowany derby we wosmifinalu krajneho pokalneho koła Braniborskeje w jenož 15 km zdalenym Kśišowje mjez tamnišim mustwom a FC Energiju je to spjelnił, štož bě na papjerje přilubił. Hižo tohodla, dokelž wyši ligist swojich hosći skrótka z 1:0 (14.) šokowaše. Choćebuženjo pak namakachu spěšnje swoju liniju, a Felix Geisler wuruna (22.). Energija wotnětka domino­waše. Škit VfB pak bě najprjedy raz njepřewinjomny. Tak dyrbješe pokutny kop pomhać. Mario Crnički bu do jědnatki, kotruž Felix Brügmann přetwori (52.), w šěsnatce połoženy. Nowopřichad Crnički třěli pozdźišo sam 3:1 (75.) a sta so hnydom z „mužom dnja“. Georg Zielonkowski

SJ Njebjelčicy

– HZ Lubuš/Bluń 2:0 (1:0)

Zestawa domjacych: Matješk – Kral, Hanu­za, Šołta, Hoelzel, Haška, Čornak (53. Plaettner), Fl. Domš, Pawlik, Korjeńk (85. Lejnart), O. Domš

Wulke wočakowanja na domjace dobyće su so koparjam Njebjelčanskeje SJ předwčerawšim skónčnje spjelnili. Je to zdobom dotal jenički třidypkowy wuspěch w lěće 2020. Koronapandemije dla su woni doma hakle tři partije wotměli.