Z wudaća: srjeda, 14 apryla 2021

Drježdźany (dpa/SN). Město Drježdźany je za sobotu planowanu demonstraciju prěkimyslerjow přećiwo naprawam koronawirusa dla zakazało. Postajenje orientuje so mjez druhim na najnowšimaj zarjadowanjomaj hibanja w Stuttgarće a Kasselu z tysacami přiwisnikow, hdźež běchu koronanaprawy kaž tež wukazy policije ignorowali, kaž radnica wčera wječor zdźěli. Dalša přičina je aktualne wuwiće infekcijow z korona­wirusom w sakskej krajnej stolicy. Iniciatiwa bě wulko­demonstraciju při Łobju a alternatiwnje tři mjeńše zarjadowanja w nutřkownym měsće přizjewiła. Tuchwilu pruwuja, hač tež akcije přećiwnych demonstrantow zakazaja abo nic.

Berlin (dpa/SN). Wjetšina wobydlerjow Němskeje prócowanja předsydy bayerskeje CSU Markusa Södera wo kanclersku kandidaturu wita. W reprezentatiwnym naprašowanju slědźenskeho instituta Civey měješe 58 procentow ludźi za prawe, zo je bayerski ministerski prezident swoju zwólniwosć wuprajił, stać so z kanclerskim kandidatom unije. 30 procentow ma rozsud Södera za wopačny, dwanaće procentow je njerozsudźenych.

Wosebje wulka je podpěra za Markusa Södera w lěhwje unije: 86 procentow přiwisnikow CDU/CSU ma jeho kročel za prawu. Tež 50 proc. přiwisnikow Zelenych a 47 proc. wolerjow SPD hódnoći jako pozitiwne, zo chcył Söder nastupić. Lěwica a AfD jeho skerje wotpokazujetej.

Marek Krawc rozprawja za Serbske Nowiny z čěskeje stolicy

Praha. W nalětniku minjeneho lěta, na spočatku cyłoswětoweje koronapandemije, wukaza čěske knježerstwo praktisce přez nóc za wšitkich wobydlerjow kraja winowatosć, w zjawnosći nahubniki wužiwać. Bjezposrědnje po wozjewjenju tajkeho dotal njepředstajomneho postajenja njebě mnohim Čecham scyła móžno, wobstarać sej předpisany srědk w lěkarnjach abo dalšich předawanišćach strowotniskich tworow. Ludźo dyrbjachu tuž sami aktiwni być a sej swójski škit za hubu a nós zhotowić. Tak sta so šijawa z najdrohotnišim domjacnostnym nastrojom, bydlenja přeměnichu so na twornje nahubnikow. Garderobjerki w zawrjenych dźiwadłach a kinach, nadobo bjezdźěłni wuměłcy, rjadniske sotry, samo bywša prěnja dama Čěskeje republiki Dagmar Havlová, wšitcy šijachu za sebje a swojich sobučłowjekow tónle nětko za kóždeho wšědny kruch drasty.

Wo rozsudach kołowokoło koronowych škitnych postajenjow móžeš zawěrno rozdźělneho měnjenja być, někotre pak ja mjeztym woprawdźe hižo njerozumju. We Wochožanskim parku błudźenkow trjebaš negatiwny koronowy test, chceš-li so tam wuchodźować. Park je tak wulki, zo lědma někomu bliže hač dźesać metrow přińdźeš. Kak ma so tam něchtó natyknyć, a to hišće wonka? Wčera popołdnju dyrbjach w Kamjenskim OBIju něšto wobstarać. Nahubnik je tam wězo tež předpisany. Ale hewak? Ludźo chodźa nutř a won, zetkawaja so na chódbach mjez polcami, dadźa so wot předawarjow poradźować a sej pomhać a nastupja so skónčnje jedyn po druhim při kasy. Nic zo mje něchtó wopak rozumi: Wjeselu so, zo je znajmjeńša OBI hišće wočinjeny. Natyknyć pak móžeš so tam zawěsće wjele spěšnišo hač we wulkim parku pod hołym njebjom. Knježerstwo pak nima lěpše ideje, hač zo w nocy dom abo bydlenje wopušćić njesměš. Marian Wjeńka

Bratislava (SŽ/K/SN). Bychu-li so w Słowakskej nětko wólby parlamenta wotměli, wušli bychu wone podobnje kaž lěta 2020, jeno z druhim jasnym dobyćerjom. Z 23 procentami hłosow by z nich młoda strona Hlas něhdyšeho ministerskeho prezidenta Petra Pellegrinija jako najsylniša móc wušła. Lońši dobyćer, OL’aNO (tehdy z 25 procentami) by porno tomu pod skromne dźesać procentow přichilnosće spadnył, docpěwši jenož hišće dźewjeć procentow. Hibanju ekspremiera a nětčišeho ministra za financy Igora Matoviča by tak hakle štwórte městno zwostało. Druhe městno by wobsadźiła strona Sprawnosć a solidarnosć (SaS), nažnjawši 11,2 procentaj, a třeće Smer-Socialna demokratie z 10,9 procentami. Do Narodneje rady bychu hišće štyri dalše politiske strony zaćahnyli: Sme rodina (swójba) ze 7,2 procentomaj, Progresiwne Slovensko (PS) ze 6,2 procentomaj, Krest’anskodemokraticke hnutie (KDH) z 5,7 procentami kaž tež hakle wot njedawna wobstejaca Aliancia z pjeć ­procentami. Tu jedna so wo zhromadźenstwo madźarskeje mjeńšiny. Dotal politisce rozbrojena njebě wona při lońšich wólbach do Narodneje rady za­ćahnyć móhła.

Praha (dpa/SN). Čěski wonkowny minister Tomáš Petříček je ze zastojnstwa pušćeny, kaž rěčnik prezidenta Miloša Zemana w Praze zdźěli. Hač k powołanju naslědnika ma socialdemokratiski kolega Petříčeka, nutřkowny minister Jan Hamáček, ministerstwo nawjedować. „Wopušću zastojnstwo z čistym swědomjom. Sym so stajnje za proeuropske a prozapadne wusměrjenje Čěskeje republiki zasadźał“, rjekny 39lětny Petříček.

Poł lěta do wólbow parlamenta w Čěskej so tak zwada w nawodnistwje strony socialdemokratow (ČSSD) přiwótřa, kotřiž su dźěl mjeńšinoweho knježerstwa. Petříček bě so wospjet kritisce nastupajo wobdźělenje na knježerstwje populista Andreja Babiša wuprajił. Při wólbach noweho předsydy ČSSD minjeny kónc tydźenja njemóžeše so wón ze swojim kursom jako přećiwny kandidat přećiwo ­Hamáčekej přesadźić.

K wjelelětnym kritikarjam Petříčeka słušeše tež prezident Miloš Zeman. 76lětny bě so hinak hač Petříček za to wuprajił, zasadźić ruske šćěpiwo Sputnik V a wobdźělić ruske firmy na twarje jadroweje milinarnje Dukovany.

Na twarnišću noweje Gołkojčanskeje pěstowarnje chcedźa jutře zběhanku swjećić. ­Korony dla wšak budźe wona jenož w małym ramiku, kaž z gmejnskeho zarjadnistwa rěka. Z nowotwarom reaguja na přiběrace ličby dźěći w gmejnje a podpěruja wobstejace pěstowarnje, kotrež su wućežene. Na 1 146 kwadratnych metrach nastawa po informacijach gmejny moderne přebywanišćo za 80 dźěći a 13 kubłarkow. Twarjenje ma jenož jedyn poschod a je tuž bjez zadźěwkow. Pěstowarnja změje tři skupinske a jednu wjacezaměrowu rumnosć, kotrež budu ze zemskej ćopłotu tepjene. Nowotwarej su 2,82 milionow eurow spěchowanskich srědkow přewostajili. Foto: Michael Helbig

Kaž nawróćace so baćony a žołte narcisy słuša tež podlěsk do nalětnich dnjow. Njewuhladaš jón jenož we Łazkowskim lěsu abo w Lipju w Pančicach-Kukowje, ale runje tak w parku Smochčanskeho kubłanišća swjateho Bena. Nalětnje přechodźowanje so potajkim tež tam zadani, ćim bóle, hdyž budźe zaso trochu ćoplišo. Foto: SN/Hanka Šěnec

Sportowe a kulturne towarstwa su wažny stołp towaršnostneho žiwjenja kóždeje komuny. Toho su sej tež we Łazowskej gmejnje wědomi a spytaja tuž tajke cyłki podpěrać.

Łaz (AK/SN). Zaměrnje spěchować chce gmejna Łaz přichodnje swoje sportowe a dalše zjednoćenstwa. Jednohłósnje wobzamknychu radźićeljo na swojim wčerawšim posedźenju wustawki wo spěchowanju sporta a towarstwoweho žiwjenja. „Runje towarstwa wukonjeja wažne dźěło za sport, za hladanje dźěći a młodostnych kaž tež za zachowanje kulturneho žiwjenja“, podšmórny wjesnjanosta Thomas Leberecht (CDU). „Tónle angažement chcemy hódnoćić.“ Zakład je sprawne a wuwažene spěchowanje. Na te wašnje chce Łazowska gmejna čiłemu towarstwowemu žiwjenje přinošować.

Swojim wobydlerjam puć do Lubijskeho centruma zalutowali

Slepo (CK/SN). Swój najrjeńši narodninski dar mjenowaše starša rentnarka minjenu njedźelu šćěpjenje přećiwo koronje w Slepjanskim Serbskim kulturnym centrumje (SKC). Tónle dźak wuži tamniši wjesnjanosta Jörg Funda (CDU) na wčerawšim posedźenju gmejnskeje rady za prěni rezimej.