Z wudaća: štwórtk, 29 apryla 2021

Budyšin. IG twarstwo-agrarne-wobswět wuchodneje Sakskeje žada sej dodźerženje dźěłoškitnych a hygienowych naprawow w ratarstwje. Wulki dźěl žnjenskich pomocnikow wužiwa zhromadne přebywanišća. Tak je riziko, zo so z koronawirusom natyknu, wosebje wulke. Runje tak jich zhromadny transport na pola wohroža. Zawody a zarjady dyrbja wšitko činić, zo njeby so branša korona-hotspot stała. W Budyskim wokrjesu dźěła po informacijach dźěłoweje agentury něhdźe 1 900 ludźi w ratarstwje.

Hałzy a lisćo so palili

Demjany. Zašłu nóc dyrbjachu dobrowólni wohnjowi wobornicy z Demjan, Huski, Drječina/Warnoćic, Hnašec, Dobruše a Noweje Wsy lěsny woheń při statnej dróze S 119 pola Nowych Demjan hašeć. 45 kameradow ze sydom jězdźi­dłami bě zasadźenych. Rozhladujo so wuhladachu woni woheń, kotryž běchu wobydlerjo přizjewili. Běše to njezawěsćeny a nje­hašeny lěhwowy woheń, hdźež bě něchtó lisćo a hałzy zapalił. Wobornicy płomjenja zhašachu. Policija so nětko z padom dale zaběra. Wšako móže tajki kaž wčera spěšnje na wokolne štomy přeskočić.

Spěšnje bě znate, zo je so 25. apryla něhdyši Běłowodźanski ludowy dom wotpalił. Dźěl stawiznow ­a identity města je tak zhubjeny. Dom běše mjez druhim Serbskemu ludowemu ansamblej hódna městnosć za wustupy. Wuměłcy SLA běchu tam hišće w 1990tych lětach dźěći na ptačokwasnych zarjadowanjach zabawjeli.

Běła Woda (AK/SN). Po wohenju w Běłowodźanskim ludowym domje dyrbja nětko přičiny zwěsćić. To praji wyši ­měšćanosta Torsten Pötzsch (Klartext) w swojim stejišću. „Nam ničo njepřinjese tukać, što je k wohenjej wjedło. Prošu wšitkich wobydlerjow, wuslědki přepytowanja wočaknyć. Wěmy wo zadobywarjach do domskeho, wo wandalizmje. Tuchwilu pak njemóžemy tež techniski defekt wuzamknyć“, měšćanosta Běłeje Wody pisa.

Budyšin (SN/MiR). Lětušu 48hodźinsku akciju přewjedźe Budyski wokrjes wot 11. do 13. junija. Kmótřistwo za nju přewzał je krajny rada Michael Harig (CDU). ­Wo­spjet chcedźa młodostni na dobro wobydlerjow na wsach abo w městach něšto zeskutkownić. „Ludźo angažuja so na te wašnje za swoju wjes, za swoje město, swoju wokolinu abo towarstwo. Wotmysł akcije je wurostł ze začuća, sylnić zhromadnosć, sebjewědomje a zwjazanosć z domiznu“, Budyski krajny rada rozłožuje.

Mjez dotal přizjewjenymi su młodźinske wohnjowe wobory Chelno, Hornja Hórka a Ohorn kaž tež młodźinski klub Röhrsdorf, młodźinska měšćanska rada Wojerecy a karnewalowe towarstwo Steinigtwolmsdorf, kotrež so prěni króć na akciji wobdźěli. W zašłych lětach su mjez druhim w Smječkecach, Radworju a Kulowje młodostni něštožkuli zdokonjeli, za čož njeběchu pjenjezy abo kapacity hinašeho razu.

Jědnaće žonow a jedyn muž tworja nowe předsydstwo župy „Michał Hórnik“ Kamjenc

„Kamjenska župa so wobstajnje dale wo­młodźa. A to je derje tak.“ Tole zwěsći Měrko Šmit na hłownej a wólbnej zhromadźiznje župy minjeny pjatk w Chróšćanskej „Jednoće“, hdźež je jako nawoda zhromadźizny delegatow wo přiwzaću dweju młodźinskeju klubow wothłosować dał.

Jednohłósnje su delegaća młodźinskej klubaj Konjecy-Šunow a Pančicy-Kukow jako pjaty a šesty do župy přiwzali. „Smy loni wo přistup k Domowinje prosyli, dokelž smy serbski klub a hajimy serbske nałožki a tradicije. Nimo toho mamy wjacore swójske zarjadowanja w běhu lěta, kaž na přikład swjedźeń němsko-serbskeho přećelstwa DSF-party. Tak dopo­kazujemy, zo móža němscy a serbscy młodostni wuběrnje mjez sobu wuńć“, wujasni zastupnik Konječansko-Šunowskeho kluba Chrystof Hrjehor. Za Pančičansko-Kukowski klub rozłoži Richard Hawš, zo su jón před lětomaj załožili, zo bychu „sylnišu zhromadnosć hajili a čłonow hromadu wjedli. Tak pokazujemy, zo móžemy zhromadnje něšto zahibać.“

W tučasnym lockdownje dyrbja so hólcy a holcy lubych a wužitnych aktiwitow wzdać, štož ma z blakami fatalne sćěhi. Tuž dyrbi so něšto stać.