Z wudaća: srjeda, 01 decembera 2021

Skład wurumowany

Dźěžnikecy. Móhłrjec wšo, štož móžachu dosahnyć, su njeznaći w Dźěžnikecach pokradnyli. Tam běchu so minjeny tydźeń na dotal njeznate wašnje do skła­dowanskeje hale zadobyli. Kaž Zhorjelska policajska direkcija hakle nětko zdźěli, spakosćichu z njeje dwě kolesy, telewizoraj, tak mjenowanu soundbaru, hudźbnu připrawu kaž tež wšelki grat za dźěło w zahrodce. Po informacijach policije ma rubizna hódnotu něhdźe 7 000 eurow. Nimo toho načinichu paduši něhdźe 50 eurow wěcneje škody. Zastojnicy zawěsćichu slědy a zhotowichu wotpowědne wozjewjenje. Kriminalna słužba Budyskeho policajskeho rewěra pad nětko dale přepytuje.

Wojerecy (SN/MWj). Zwěrjenc we Wojerecach bě minjene dny hosćićel prěnjeje regionalneje konferency wo plahowanju tak mjenowanych Humboldtowych a nawočowych pinguinow w coowach a zwěrjencach. Zastupjerjo dźewjeć coologiskich zarjadnišćow kaž tež štyrjo fachowcy diskutowachu a wuradźowachu we wobłuku hybridneje konferency, potajkim zdźěla přitomni a zdźěla online, wo wosebitych potrěbnosćach přewšo sen­sibelnych ptakow. „Wjeselu so jara, zo je telko kolegowkow a koleginow moje pře­pro­šenje sćěhowało a zo su zwólniwi sej mysle a nazhonjenja wuměnjeć“, zwura­znja nawoda Wojerowskeho zwěrjenca Eugène Bruins w nowinskej zdźělence.

We Wojerowskej kupjeli maja sobudźěłaćerjo wulke wizije a sadźeja mjez druhim tež na turizm

Při zachodźe stejachu ludźo w dołhich rynkach. Swójby, poriki a mnohe skupiny chcychu spočatk nazymskich prózdnin do Wojerowskeje Łužiskeje kupjele. Přichadźa w prózdninskim času stajnje wjele wopytowarjow? „Poprawom haj“, měni Matthias Brauer, wot lěta 2020 jednaćel kupjele. „Kupjel je skerje warianta za špatne wjedro, ale wona je hišće wjele wjace. Cyłe lěto móža ludźo přińć.“ Lětuše lěćo drje bě trochu přerosćene. Jeničce w awgusće je so tam 18 508 ludźi wočerstwiło, štož bě wot wotewrjenja w lěće 1999 rekord. W dobrych lětach mějachu we Łužiskej kupjeli přerěznje něhdźe 13 600 wopytowarjow wob měsac. „Nutřkokrajny turizm přiběra. Mjeztym přichadźeja ludźo samo ze Sylta abo Garmisch-Partenkirchena, zo bychu so z Łužicu zeznajomili“, Matthias Brauer rozprawja. „Město Wojerecy ma we łužiskej jězorinje najwjetšu dožiwjensku kupjel.“ Cyłkownje maja tam 35 sobudźěłaćerjow, kotřiž najwšelakoriše wobłuki zastaruja.

Na teritoriju Zapadołužiskeho koparskeho zwjazka je sezona za młodźinske mustwa najprjedy raz přetorhnjena. Dypkowe hry njesmědźa žane přewjesć, trenować smědźa jenož hišće hač do sta­roby 16 lět. Do znowa nanuzo­waneje přestawki pak běchu někotre partije přewjedli, tak zo je nam Klaus Heiduschke dźensa prěni přehlad aktualnych tabulkowych stawow podał.

Wosebje napadne w statistice koparskeho dorosta we wokrjesu Budyšin je, zo hraja lědma hišće cyłki samostatnje pod mjenom towarstwa. Wjetšina mustwow w hrajnych zjednoćenstwach (HZ) zhromadnje za bulom honi. Tak je na přikład w starobnej klasy młodźina B we wokrjes­nej lize-stafla 1 z cyłkom Módro-běłych Kulow jenož hišće jedyn, kotryž njeje so z dalšim abo dalšimaj zjednoćił. K tomu težhišće přińdźe, zo někotre mustwa na wulkim polu zasadnje z dźewjećomi město jědnaćomi nastupja, dokelž nimaja dosć koparjow. W tajkim padźe hraja na skrótšenym polu wot šěsnatki k šěsnatce.

młodźina A, wokrjesna liga

1. TSV Połčnica 1920 7 41 : 11 19

2. Póst Germania Budyšin 7 38 : 9 18

3. Arnsdorfske KT 8 33 : 18 18

4. HZ ST 1922 Radwor 8 28 : 19 16

5. HZ SJ Chrósćicy 1981 7 25 : 8 15

6. HZ Hnašecy-Dobruša 4 23 : 4 12