Z wudaća: štwórtk, 26 januara 2023

W Slepjanskim Serbskim kulturnym centrumje je so takrjec hižo dojutrowny čas započał. Tam maja nětko wosebitu stwu, hdźež móža wopytowarjo z přihotowanym gratom wobstajnje jutrowne jejka debić. Nawodnica Silwija Panošina so na prawje wjele zajimcow wjeseli. Wobswětlene wutřihanki Jörga Herrmanna z jutrownymi motiwami staraja so wo trěbnu atmosferu. Foto: Joachim Rjela

Rowno (JoS/SN). Po dworowym swjedźenju je swinjorězanje druhe najwjetše zarjadowanje na Rownjanskim Njepilic statoku w běhu lěta. Minjeny kónc tydźenja su je 23. raz přewjedli. Dwě lěće dyr­bjachu zajimcy na tónle podawk čakać. Nětko móžachu zaso mnohich wopytowarjow bjez wobmjezowanjow witać a jim cyłu šěroku paletu wudźěłkow swinjorězanja poskićeć. Cyły tydźeń bě wšědnje něhdźe 30 čłonow spěchowanskeho towarstwa při dźěle a wšitko přihotowachu. Zo bychu kołbasa, połćik, šmałc a wšitke druhe wěcy ze zašłych lět zwučeny słód měli, złožowachu so znowa na recepty, kotrež je bywši čłon towarstwa Dieter Redo zawostajił. Bjez dźiwa, zo so wopytowarjo zdźěla w dołhich rynkach nastupachu, zo móhli sej wob­lubowane wudźěłki sobu domoj wzać. Mnozy tež na městnje powobjedowachu.

W Brězanec bróžni 25. Jolku z pisanym programom a hosćimi dožiwili

Jolka spočatk noweho lěta je w Ruskej a dalšich wuchodnych krajach jedyn z najwoblubowanišich swjedźenjow. Byrnjež w Němskej skerje mało znaty był, proša zarjadowarjo „serbskeje jolki“ kóždolětnje na zabawny wječork do Brězanec bróžnje w Nuknicy. Po dwěmaj lětomaj, w kotrymajž móžachu zymski kulturny wjeršk jenož w digitalnym formaće přewjesć, tam lětsa skónčnje zaso hosći witachu. Organizatorojo z Nuknicy, Prawoćic a Kopšina, tak mjenowani „Nu-Pra-Ko“, wupyšichu bróžeń po starodawnym wašnju temje programa wotpowědujo. Lětsa bě hesło „Bermuda – hłódny mužonač a čorna dźěra“. Pódla wulkich plakatow z mórskimi scenarijemi pak sy lětsa tež najšikwańše rekwizity zašłych programow wuhladał. Jolka w Nuknicy wšak swjećeše minjenu sobotu swój 25. jubilej. „To ći sylzy přińdu“, hódnoćeše moderator wječorneho programa, braška Marko Jurk, w swojej zawodnej narěči. Wón so nadměru wjeseleše, zo smědźeše po dwulětnej přestawce zaso live před publikumom stać a na swoje njezaměnjomne wašnje po programje wjesć.

Heilbronske Sokoły –

Łužiske lodohokejowe liški 5:6 p.p. (1:3, 2:2, 2:0 - 0:1)