Z wudaća: wutora, 28 nowembera 2023

Tel Aviv (dpa/SN). Po podlěšenju přiměra w Gazaskej wójnje wo dalšej dnjej nadźijeja so dale na to, přichodnych zastajencow wuswobodźić móc. Wčera wječor běštej so Israel a Hamas na to dojednałoj, na štyri dny wobmjezowany přiměr hač do štwórtka ranja podlěšić. Na to bě Hamas dalšich jědnaće zastajencow pušćiła, mjez nimi dweju Němcow. Israel je runočasnje 33 Palestinjanow ze swojich jastwow pušćił. Minjenu nóc su israelskemu knježerstwu dalšu lisćinu z mjenami zastajencow přepodali, kotrychž chcychu dźensa pušćić. Medije rozprawjeja, zo jedna so wo dźesać wosobow.

Wot minjeneho pjatka je Hamas 69 ­zastajencow pušćiła. Z israelskich jastwow su 150 palestinskich politiskich jatych pušćili. Najmłódši z nich bě 14 lět. W jastwje sedźachu namócnosćow pře­ćiwo Israelej a jeho wobydlerjam dla.

Kijew (dpa/SN). Ćežke zymske njewjedro je sej w Ukrainje po oficialnych informacijach dotal dźesać smjertnych woporow a 23 zranjenych žadało. Mjez zranjenymi stej tež dwě dźěsći, nutřkowne ministerstwo informuje. Najhórje je połoženje w južno-ukrainskej kónčinje wokoło Odessy. Zymski wichor nad Čornym morjom je ruskeje wójny dla tak a tak hižo ćerpjacu kónčinu Ukrainy wosebje raznje trjechił. Wokoło Odessy bě w stach sydlišćach milina wupadnyła. Na dróhach dyrbjachu z tankami sněh suwać a za­sněžene awta z wějeńcow wućahnyć, mjez nimi busy a chorobne awta.

Berlin (dpa/SN). Zwjazkowy kancler Olaf Scholz (SPD) chce najebać deficit wjacorych miliardow eurow w etaće kraja kurs modernizowanja Němskeje wobchować. By „ćežki a njewodajomny zmylk był, při zmištrowanju wulkich wužadanjow modernizowanje kraja zanjechać“, rjekny Scholz dźensa w swojej knježerstwowej deklaraciji w zwjazkowym sejmje. „Modernizowanje je trěbne a prawe, dokelž twori wuměnjenja za dobre dźěłowe městna a sylne hospodarstwo a je tak zakład přichodneho derjeměća.“

Zwjazkowe wustawowe sudnistwo bě přerjadowanje 60 miliardow eurow srědkow za koronakrizu na dobro klimowych projektow w etaće wotpokazało. Nětko wo tym debatuja, kak móhli pobrachowace srědki wurunać.

Scholz dale na tym wobstawa, Němsku dale wuwiwać. „Chcu, zo je Němska cyle prědku“, wón hladajo na hoberske inwesticije w USA a Chinje rjekny.

Nawoda opozicije Friedrich Merz (CDU) narěč Scholza šwikaše: „Wy nje­jednaće kaž politikar, ale kaž zamkar.“

Nawal zymy w mnohich kónčinach Němskeje wulke problemy zawinił

Offenbach/Berlin (dpa/SN). Nawal zymy je nadróžny wobchad we wjacorych zwjazkowych krajach raznje trjechił a tójšto wobchadnych njezbožow zawinował. Při tym zemrěštej znajmjeńša dwě wosobje. We wokrjesu Schwäbisch-Hall w Badensko-Württembergskej je 71lětny wčera wječor při frontalnej zražce na zasněženej hładkej dróze žiwjenje přisadźił. 54lětna šoferka wosoboweho awta ze­mrě w Porynsko-Pfalcy při zražce na zalodźenej dróze. W mnohich dźělach Němskeje wočakowachu dźensa dalši sněh.

W Hessenskej bě połoženje wosebje napjate. Tam dyrbješe wohnjowa wobora něhdźe sto ludźi z awtow wuswobodźić, kotřiž běchu powalenych štomow dla w swojich jězdźidłach zawrjeni. Jich dowjezechu najprjedy raz do hale.

Krajny rada wokrjesa Rheingau-Taunus, Sandro Zehner (CDU) ludźi namołwješe, doma wostać. „Mój naležny apel: Wostańće wutoru na kóždy pad doma. Prošu njewuchodźujće so w lěsu. Tam wobsteji chutny smjertny strach, dokelž móhli so hałzy mokreho sněha dla wotłamać abo štomy so powalić.“

25. nazymnika 1948 zemrě w čěskim Varnsdorfje serbski narodny wuměłc, mišter serbskeje hudźby a wučer Bjarnat Krawc. Wón bě so ze swójbu w nazymniku 1945 do čěskeho namjezneho města přesydlił, hdźež běchu jim přećeljo bydlenje poskićili. Při bombardowanju Drježdźan 13. februara 1945 bu Krawcec bydlenje a jeho archiw kompozicijow zničenej.

Na kromje Varnsdorfa bu sławny hudźbnik w swójbnym rowje pochowany. Jeho mandźelska Alma bě hižo lěto do njeho tule pochowana. Pozdźišo namakaštej tež jeho dźowce, dźiwadłowa spěwarka Marka Krawcec-Rawpowa 1947 a młódša, grafikarka Hanka Krawcec 1990 tule swój wěčny wotpočink.

Zymske wjedro a zasněžene puće su so dźensa w Hornjej Łužicy wo wobchadne poćežowanja starali. Ćežke wobchadne njezbožo sta so krótko do 8 hodź. na statnej dróze S 101 při wotbóčce do Jědlicy. Tam stej BMW a Škoda do so zrazyłoj. Dwě zranjenej wosobje dowjezechu do chorownje. Po wšěm zdaću bě njepřiměrjena spěšnosć na zalodźenym puću přičina zražki. Foto: Rocci Klein

Lědma zo su w Kulowje 11. nowembra lětušu 318. karnewalowu sezonu zahajili, su tam na dwěmaj zarjadowanjomaj w sportowni nowy princowski por a jeho dwórskeho maršala předstajili.

Kulow (MKl/SN). Runje tak kaž 18. nowembra je so minjenu sobotu dalši kapičkowy wječor Kulowskeho karnewaloweho towarstwa w tamnišej sportowej hali wotměł. Hosćom poskićichu tři hodźiny trajacy wotměnjawy jewišćowy program. Lětsa akterojo na jewišću předewšěm wjele wo tuchwilnej nutřkownej politice w Němskej žortowachu a njedostatki na swoje wašnje pošwikachu. Wulki aplaws žněješe mjez druhim double Ericha Honeckera, kiž něhdyšeho předsydu statneje rady NDR z gestiku a hłosom awtentisce napodobni.

Z pilotowym projektom móža mnohim pacientam spěšnišo pomhać

Wojerecy (SN). Wo projekće „Region žiwjenskich wuchowarjow“ je so tele dny sakski nutřkowny minister Armin Schuster (CDU) we Wojerowskej integrowanej wuchowanskej dispatcherni wuchodneje Sakskeje informował. Projekt zwjazuje wukubłanych prěnich pomocnikow z dispatchernju a je prěni pilotowy pospyt tajkeho razu w Sakskej.

Budyšin. Smolerjec kniharnja w Budyšinje přeprosy na knižnu premjeru. Štwórtk, 30. nowembra, w 19 hodź. prezentujetaj přełožowarka Dorotheja Šołćina kaž tež přełožowar a wudawaćel Benedikt Dyrlich knihu „Posledni sněh/Der letzte Schnee“. Awtor knihi, kotraž je w nakładnistwje Pop w Ludwigsburgu wušła, je nakładnik a basnik Traian Pop Traian.

Na institutny dźeń

Budyšin. Serbski institut přewjedźe jutře, srjedu, wot 14 do 17 hodź. swój institutny dźeń w Budyskim Serbskim domje. Po powitanju přez Hauke Bartelsa porěči Edmund Pjech na temu „Mjez kooperaciju a konfrontaciju. Jan Skala (1889–1945) a jeho skutkowanje w Zwjazku narodnych mjeńšin Němskeje“. W 14.40 hodź. pledujetaj Lutz Laschewski a Julija Běrinkowa pod hesłom „100 000 serbsce powědacych hač do 2100“ za daloko sahace rěčne planowanje. Wo wužadanjach a namakankach při zawěsćenju awdiowizuelneho kulturneho herbstwa porěčitaj w 14.55 hodź. Wito Bejmak a Měrćin Brycka. Dale předstajeja Jana Šołćina, Leńka Šołćic a Jan Bogusz w 16 hodź. ­wuslědki ewaluaciju koncepta 2plus.

Přednošuje wo Wendlandźe

Hižo krótko do adwentneho časa je Złyčinske towarstwo camprowarjow dźěći ze wsy na zhromadne pječenje poprjančkow přeprosyło. Tele dohodowne zarjado­wanje je kóžde lěto kruty termin w protyce towarstwa. Wothłós bě tak wulki, zo ­dyrbjachu samo blida přistajić, zo bychu wšitcy dosć městna za přihotowanje ćěsta, wukałanje a wudebjenje poprjancow měli. Při wšitkich jednotliwych dźěłach starši małym wopytowarjam tohole popołdnja pomhachu. Runje tak kaž poprjančki su tón dźeń w drjewowej pjecy towarstwa tež wosušk pjekli. Te su myslene za adwentničku wuměnkarjow Złyčina a Bjedrichec. Foto: Hans-Jürgen Menges