SLA po lětomaj přestawki Błótowske powěsćowe nocy dale wjedł
Bórkowy (PBe/SN). Kołowokoło hewak skerje měrneje Bórkowskeje Bismarckoweje wěže knježeše minjene tři swjatkowne wječory jara čiłe žiwjenje. Awta z najwšelakorišich kónčin Němskeje, Čěskeje a Pólskeje pjelnjachu poměrnje spěšnje nachwilnje zarjadowane parkowanišća. Po stach ćehnjechu ludźo wječor po wječoru, wuhotowani z přikrywami a zawkami pod pažu, k jewišću pod hołym njebjom blisko Bismarckoweje wěže, dokładnje před lětstotkom postajeneje.
Tola prjedy hač započa so jednanje wo lubosći, rozžałosći a přeradźe, zabawješe skupina Die Folksamen z naročnej delnjoserbskej rockowej hudźbu w bohatej ličbje přichwatany publikum. Wotměnjejo z wuměłcami Choćebuskeho němsko-serbskeho ansambla a Łukowskim Ardanwen-dźiwadłom na konjach wuhotowachu woni spodobny předprogram. Po nim wjedźeše delnjoserbski spěwytwórc Bernd Pittkunings, kiž tež swójske spěwy zanjese.