XI. mjezynarodny folklorny festiwal wčera w Chrósćicach wuspěšnje zakónčeny
Na tradicionalnym finalu na wulkim jewišću pod Fulkec hórku w Chrósćicach su so přihladowarjo z wukrajnymi ćělesami kaž tež z hosćićelskimaj cyłkomaj XI. mjezynarodneho folklorneho festiwala – Serbskej rejwanskej skupinu Smjerdźaca a Serbskim folklornym ansamblom Wudwor – rozžohnowali. Štyri dny bě dwurěčna Łužica wokno do swěta. Pjaty raz pobychu skupiny pjatk w Hochozy. Wjeršk bě znowa sobotny wječor w Chrósćicach, hdźež su ludowi wuměłcy ze swojimi poskićenjemi hosći na sydom statokach wokřewili. Nimale 20 000 ludźi je swjatk ze 700 sobuskutkowacymi po informacijach organizatorow dožiwiło. Předsyda Domowiny Dawid Statnik dźakowaše so wčera w mjenje třěšneho zwjazka wšěm tym, kotřiž běchu na najwšelakorišich městnach wuspěšny wotběh festiwala zaručili.