Němskej mjeńšinje w Danskej wo Serbach rozprawjeli
Sankelmark (nik/SN/JaW). Hłuboki dohlad do serbskeho žiwjenja je minjeny pjatk předsyda Domowiny Dawid Statnik mjeńšinje Němcow w Danskej dał. Na Akademiji Sankelmark pola Flensburga přednošowaše wón składnostnje nowolětneho zjězda třěšneho zwjazka němskeje mjeńšiny w Danskej, Zwjazka němskich Sewjeroschleswigčanow (BDN), wo stawiznach a aktualnym połoženju Serbow. Zdobom zahajichu tak serbske lěto w Danskej. Z nim chce organizatorka rjadu zarjadowanjow Kristin Heelemanec wědu wo Serbach mjez Němcami w Danskej šěrić.