Hodźij (UM/SN). Třo horliwcy su minjeny štwórtk swoje nowozałožene towarstwo „1. łužiski dudowy orchester“ zjawnje předstajili. Nětko pytaja za dalšimi čłonami.

„Chcemy orchester wutworić, kotryž so po wašnju hercowskeho ćaha na ludowych swjedźenjach a podobnych zarjadowanjach wo dobru naladu stara“, rozłoži městopředsyda towarstwa Handrij Henčl z Pančic-Kukowa. Profesionalny hudźbnik je spěwar chóra Serbskeho ludoweho ansambla a bě skerje připadnje k dudam přišoł. „Naš tehdyši soloklarinetist wědźeše, zo tež ja na tymle instrumenće hraju. Tak stłóči mi jednoho dnja dudy do rukow a namołwi mje, prosće hrać započeć. To sym činił a hač do dźensnišeho při tym wostał.“