Njeswačidło (ML/SN). Towarstwo pčołarjow Njeswačidło „Nad Čornicu“ swjeći lětsa swoje stote wobstaće. W domizniskim muzeju wsy wotewrěchu 4. jutrownika wosebitu wustajeńcu wo pčołarstwje w gmejnje a wokolnych wsach, wo čimž Serbske Nowiny 5. apryla hižo wobšěrnje rozprawjachu. Přewšo zajimawe je sćěhować wuwiće pčołarskeho towarstwa, wo kotrymž staj Serbskim Nowinam tež nětčiši předsyda Křesćan Budar a jeho předchadnik Eckehard Hübner, kiž ma 16 pčołarskich ludow, powědałoj.
Před sto lětami přisłušeše towarstwu, wo kotrehož załoženju běchu Serbske Nowiny 1. awgusta 1922 pisali, 18 čłonow. Woni wobsedźachu tehdy 130 ludow pčołkow. Tole swědčeše wo čiłym zajimje ludźi z Njeswačidła a wokoliny za pčołarstwo. Předsyda towarstwa bě wučer Jan Koškar, kotrehož su bórze po tym za nawodu cyrkwinskeje šule Njeswačidło powołali. To bě zdobom dopokaz, zo časćišo wučerjo, haj samo fararjo we Łužicy rady pčoły plahowachu.