Spěwny Consorcium Seniorow so z publikumom rozžohnował

Budyšin (SN/bn). Kopata połna Röhrscheidtowa bašta tworješe hódny ramik za posledni zjawny a tuž rozžohnowanski koncert lěta 1982 załoženeho Spěwneho Consorciuma Seniorow (SCS). Hišće raz dožiwichu wopytowarjo minjenu sobotu a cappella zanjeseny sep satiriskich, zdźěla friwolnych wobdźěłanjow serbskich wuměłskich a (znajmjeńša dźensa často tak začuwanych) ludowych, hdys a hdys do formy medleyja zlatych spěwow a swójskich kompozicijow, wudospołnjeneho z někotrymžkuli němskim fragmentom. Tadej Nawka wodźeše přinoški ironisce připowědźiwši po programje. „Naše pěsnički su zrawili kaž dobry twarožk. Lěta dołho smy wo prawy wuraz wojowali. Nětko dožiwiće skónčnje derje doležanu serbsku kulturu w šešerjatym płašću. Snano budźeće tam a sem někajke žórło spóznać, ale přisaham, zo poskićamy parodije, nic plagiaty“, wón koncert zahajiwši připowědźi.