Saksko-pólski projekt „Kulturni partnerojo II“ kónc lěta wuběži
Budyšin/Jelenia Góra (SN/bn). Projekt „Partnerzy z kulturą II – Kulturni partnerojo II“, spěchowany ze srědkami Europskeho fondsa za regionalne wuwiwanje we wobłuku kooperacije „Interreg Pólska-Sakska“, kónc lěta wuběži. Po słowach z Budyskeje strony za njón zamołwiteho Paula Fischera je so projekt ze „stołpom mjezyměšćanskeho partnerstwa Jeleniogórskeho Centruma kultury (JCK) a Kamjentneho domu stał“. Wot lěta 2019 buchu w tym zwisku něhdźe 70 dźěłarničkow, koncertow, inscenacijow a dalšich zarjadowanjow zwoprawdźenych, na kotrychž zličichu dohromady wjace hač 5 000 wobdźělnikow resp. wopytowarjow. „Profilomaj wobeju zarjadowaceju institucijow wotpowědujo smy jednotliwe naprawy po třoch dźěłowych wobłukach hudźba, reja kaž tež kulturna animacija a ekologiske kubłanje rozrjadowali“, Fischer na nowinarskej konferency minjeny pjatk w Budyšinje rozłoži.