Dalše dokumenty Maćicy Serbskeje hišće w USA a Ruskej

Budyšin/Marburg (SN/bn). Bibliotekowe wobstatki Maćicy Serbskeje (MS), kotrež chowachu so minjene lětdźesatki w slědźerskej knihowni Herderoweho instituta za historiske wuchodo-srjedźoeuropske slědźenje w Marburgu (HI), buchu dźensa Serbskemu institutej (SI) přepodate. Při tym jedna so wo 172 knihow a časopisow, kotrež so we wobłuku projekta „Slědźenje wo NS-wurubiznach – Přepytowanje wobstatka něhdyšeho publikaciskeho slědźenišća Berlin-Dahlem“ Němskeho centruma Kulturgutverluste w Magdeburgu „jasnje jako swójstwo Maćicy Serbskeje (MS) identifikowachu. Wjeselu so, zo móžemy je skónčnje naslědnej instituciji prawotneho wobsedźerja wróćić“, zastupowacy direktor HI dr. Jürgen Warmbrunn podšmórny. Zdobom wón wuzběhny, zo „chowa so njeznate mnóstwo dalšich objektow MS w archiwach USA a Ruskeje“, kotrychž restitucija je po jeho słowach „aktualnje dosć njeprawdźepodobna“.