Budyšin (SN/MG). Kak wobchadźeja Serbja ze swojim kulturnym herbstwom? Kak posylnja jeho widźomnosć? Štó ma nadawk, tute herbstwo zběrać a wot koho dóstanje nadawk za to? – To běchu najwažniše prašenja, kotrež spyta wčera wječor digitalne rozmołwne koło z temu „Register za daty serbskeho kulturneho herbstwa“ wotmołwić. Přeprošenju projekta załožby Digiserb, Serbskeho instituta a kulturneho wuběrka Domowiny bě někak 20 wosobow sćěhowało.

Po witanju přez kulturneho referenta Domowiny, Clemensa Škodu, předstaji dr. Robert Lorenc, jedyn ze zamołwitych za digitalny register, dotalny staw planowanja kaž tež fazy přewjedźenja. Po jeho informacijach je projekt tuchwilu hišće w pilotowej fazy. Zaměr je, w jutrowniku 2024 prěni prototyp registra wozjewić. W nim chcedźa wobstejace zběrki kulturneho herbstwa Serbow mjez sobu zwjazać, nic a je na centralnym městnje składować. To su zamołwići jako to najwažniše wuzběhowali.