Budyšin (SN/MiR). Jěwa-Marja Čornakec, čłonka předsydstwa Zwjazka serbskich wuměłcow, (ZSW) witaše zašły pjatk šwarnu ličbu hosći na zarjadowanje w rjedźe „trakTare“ do towarstwoweje rumnosće Budyskeje piwarnje. W literarnej rozmołwje zaběrachu so zajimcy tónkróć ze zběrku „Stop a stup“ z pjera Měrany Cušcyneje. Sylwija Šěnowa hódnoćeše z wulkej zahoritosću a sympatiju tworjenje awtorki, kotraž wjedźe čitarjow do rozmyslowanja, sćěhujo situacije, kajkež je žiwjenje rysuje. Kniha je nazymu lěta 2021 wušła. Koronapandemije dla pak njeměješe ZSW składnosć, lubowarjow tekstow wosebje w Serbach znateje Budyšanki na rozjimanje poskitka, kotryž je Ludowe nakładnistwo wudało, přeprosyć. 47 tekstow, kotrež je Cušcyna zhromadnje z lektorku Marku Maćijowej do powědkow, miniaturow a esejow zarjadowała, „njepřeswědča jenož wobsahowje, ale wosebje jich wusahowaceje rěče dla“, rjekny Sylwija Šěnowa. Wona zwurazni, zo awtorka a basnica čitaceho hnydom w prěnich sadach do jednanja sobu bjerje.