Widźał, słyšał, napisał (17.07.23)
,,Što radosć rjeńšu dawa....“, hač měć prózdniny, dowol abo swobodne a směć činić, štož wjeselo čini. Haj, smy wosrjedź lěćnych prózdnin a tež sportowcy maja nimale wšitcy swój dowol abo přihotuja so hižo na nowu sezonu. Ći, kotřiž maja tróšku wjace fenki sebi přihot we wukraju popřeja, ći tamni wostanu doma abo znajmjeńša w bliskosći. Hłowna tema w kopańcy su tuchwilu jednanja, štó budźe w přichodźe w kotrym mustwje hrać, kelko budźe zasłužić a to najwažniše – kelko maš za noweho hrajerja płaćić abo kelko za předateho, snano tež jenož wupožčeneho, hrajerja dóstanješ. A to ći takle ličby wokoło wuši lětaja, wo statysacach eurow lědma hišće něchtó rěči, dźensa dźe jenož hišće wo miliony. A tam njeje žana hranica wjace data ... Koparjo su twora, z kotrejž so wikuje a druhdy maš zaćišć, zo so pomału wid na normalne pozhubi. W awgusće smy mudriši a dajmy so překwapić, w kotrym trikoće toho jednoho abo tamneho potom wuhladamy.
Sport (14.07.23)
Zaso wšědnje wotewrjeny
Fanowy wobchod „Hokejowa liška Łužica“ w Běłej Wodźe je wot spočatk pražnika zaso wšědnje wotewrjeny. Tak hodźa so zaso k znatym wotewrjenskim časam fanowe a sportowe artikle kaž tež lodohokejowy ekwipment kupić. Při tym zahaja so rabatowe tydźenje, wobliča na WARRIOR drastu a ekwipment runje tak kaž na cyły sortiment HUMMEL 20 procentow rabata. Wot 20. julija započnje so předpředań za lisćiki k přihotowanskim hram.
Satkula-bičtura w Jaseńcy
Po zazběhowym bičwolejbulowym turněrje minjenu póndźelu z 15 mustwami we Worklecach budźe tura Radija Satkule póndźelu w Jaseńcy. Cyłki njech so hač do 17.30 hodź. přizjewja. Přichodne stacije:
24.07. Njebjelčicy
31.07. Kulow
07.08. Konjecy
14.08. Nuknica
21.08. Pančicy-Kukow
28.08. Miłoćicy / finale
Přihotowanske koparske hry
Zastupjer krajneje klasy stafla wuchod Rakečanske ST změje dźensa a jutře dwě přihotowanskej hrě zasobu. Prěnju hru w Rakecach sudźi serbska koparska sudnica Lea Krječmarjec. Testowa hra Chróšćanow přećiwo hrajnemu zjednoćenstwu Łaz/Běły Chołmc so njepřewjedźe.
15.07. 13:00 FSC Luckenwalde –
FC Energija Choćebuz
Karjerju zakónčił
Energija ma noweho nadběhowarja
Z 21lětnym němsko-ukrainjanom Aleksanderom Prokopenkom je FC Energija Choćebuz dalšeho hrajerja za nowu sezonu regionalneje ligi zawjazała. Zašły tydźeń přizemi w Němskej rodźeny hrajer pola FCE, hdźež zetka z Dennisom Slamarom a Maksimilianom Oesterwegom stareju znateju z časa pola Carl Zeiss Jeny. „Aleks přinjese enormne tempo sobu, je technisce jara derje wukubłany a třěla z woběmaj nohomaj. To čini našu ofensiwnu hru wariabelnišu a da nam wjace móžnosćow. Wjeselimy so, zo je so za nas rozsudźił“ praji šeftrenar Claus-Dieter Wollitz. Dźensa w Hohenleipischu přećiwo pólskemu prěnjemu ligistej Zaglebie Lubinej budźe Prokopenko prěni raz zasadźeny.
Z tym je FC Energija Choćebuz w přihotach na přichodnu sezonu 2023/2024 swój šesty nowopřichad přez zrěčenje zdobyła. Claus-Dieter Wollitz praji: „Njeje žane potajnstwo, zo chcemy swój kadr wuwaženy nastajić pytajo za hrajerjemi, wo kotrychž smy přeswědčeni, zo naše mustwo dale wjedu a zdobom žadanja rjadowanja předpisow DFB spjelnjeja. Jeho kwality su nam hižo z časa pola FC Carl Zeiss Jena znate.“
Nowe trikoty za Sokołow
Chabłace wukony
K hrajnej dobje 2022/2023 bě so nowe koparske hrajne zjednoćenstwo z druheho mustwa Sokoła Ralbicy/Hórki a z rezerwu SJ Njebjelčicy wutworiło. Wobaj cyłkaj samej njebyštej we wobłuku winowatostnych dypkowych hrow nastupić móhłoj.
Domjace hry prěnjeje połserije přewjedźechu so najprjedy w Ralbicach. Mjez sobu so namakać a zeznajomić běše wažny cil. Městno trenarja přewza nazhonity Beno Šram ze Smječkec. W prěnjej hry dobychu domjacy tež hnydom přećiwo hrajnemu zjednoćenstwu z Radworja a Wulkeje Dubrawy. K njedźelnišim hram stejachu tež přeco dosć hrajerjow k dispoziciji. Sobotu wupadaše to nažel hinak. Tak njenastupichu w Lubušu a dypki běchu preč. Sćěhowaše chłostanje. Wulke manko běše w prěnjej połseriji, zo woni přemało wrotow docpěchu. Na tamnym boku pak steješe škit dosć solidnje. Wrotowy poměr wučinješe 13:12. Z třomi dobyćemi, štyrjomi njerozsudnymi rezultatami a dwěmaj poražkomaj wotzamkny mustwo z 13 dypkami na dobrym pjatym městnje wot cyłkownje dźesać mustwow.
Bičwolejbulowa tura zahajena
Dorostowe koparske turněry na jubilejnym kóncu tydźenja
We wobłuku 100lětneho wobstaća su Sokoljo z Ralbic před něšto dnjemi hnydom štyri dorostowe koparske turněry přewjedli. Hižo pjatk, 30. junija, hrajachu na jednej połojcy hólcy młodźiny D Sokoła Ralbicy/Hórki přećiwo serbskej wubrance samsneje starobneje klasy. Wokrjesny mišter z Delan so w tutej hrě ze 4:2 přesadźi. To pak njebě jenički dorostowy sportowy podawk.
Runočasnje kopachu pjatk popołdnju na tamnym polu najmłódši koparjo do bula, tak mjenowane bambinije. Do Ralbic běštej dwě mustwje z Njebjelčic a jedne z Pančic-Kukowa přijěli. Sokołki a Sokoljo wutworichu tři domjace cyłki. W tak mjenowanym funino-modusu hrajachu potom stajnje třo přećiwo třom a to sydom mjeńšinow dołho. Potom hraješe kóždy přećiwo kóždemu a z tym běchu mali koparjo chětro hordźi na swójski wukon. Tuž sej wšitcy rjanu 100lětnu medalju zasłužichu, kotruž je Dawid Statnik, předsyda Domowiny, jako kmótr tutoho turněra wobstarał.
Wubědźowanje starobneje klasy młodźina E
100 lět sport w Delanach z čěskimi hosćimi
„Konečně a skónčnje!“, běštej najhusćišo wužiwanej čěske a serbske słowo w Ralbicach, jako zetkachu so tam nimale 50 čěskich sportowych přećelkow a přećelow z runja telko serbskimi a němskimi towarškami a towaršemi na sportowu wuměnu.
Na tutu dyrbjachu w Delanach štyri lěta čakać. W minjenych 48 měsacach drje běchu so jednotliwcy k najwšelakorišim składnosćam sami we Łužicy abo w Plzenskim kraju zetkali. Ale nětko bě sportowa wuměna mjez sportowymaj towarstwomaj Sokoł Ralbicy/Hórki a TJ Spálené Poříčí zaso raz móžna. Tuž bě wjeselo nad zasowidźenjom we wobłuku swjedźenskeho tydźenja „100 lět sport w Delanach“ wosebje wutrobite a wulke.
Hnydom do swójbow abo na swjedźenišćo
Po witanju a prěnim čěskim piwkom podachu so hosćićeljo ze swojimi hosćimi domoj, hdźež hač do nocy zhromadnje bjesadowachu. Někotři z hosći pak podachu so hnydom zaso na diskoteku do Ralbičanskeho stadiona, kotryž rěkaše pjatk wječor hišće „Stadion Přećelstwa“. Dźeń pozdźišo bu wón na „Stadion Jurja Frencla“ přemjenowany.
Poliwanc w Róžeńće woptali
Kader Energijeso znowa měša
Po wulkim přesłapjenju zwrěšćenja w relegaciji do 3. ligi dla je pola FC Energije zaso wšědny dźeń zaćahnył. Při čimž so w tydźenjach hač k zazběhej sezony wjele hiba.
