Prěnja sensacija při WM: Brazilska won
Brazilska je na swětowym mišterstwje kopańcy žonow zwrěšćiła. W skupinskim finalu docpěchu Marta a co. jenož 0:0 přećiwo Jamaice. Seleção skomdźi ze štyrjomi dypkami jako třeći skupiny E kwalifikaciju za wosmifinale. Město toho je nětko Jamaika wutoru (10 hodź.) potencielny přećiwnik němskeho mustwa, jeli němska wubranka hišće skupinu dobudźe. Za Južnoameričanki je to prěni kónc w předkole po 1995. Wot 2003 bě Marta na šěsć swětowych mišterstwach podarmo za titulom honiła, partija w Melbournje móhła jeje poslednja w narodnym trikoće być. Po wustrowjenym zranjenju křižneho paska bě wona wot spočatka turněra jenož jako joker pódla. Tónraz pak hraješe superstar Brazilskeje wot započatka, přiwšěm falowachu ideje. Seleção přewza wočakowanjam wotpowědujo hnydom kontrolu hry, tłóčeše Jamaiku hłuboko do swójskeje połojcy. Prěnje zakónčenje Marty (11.) bu blokowane, potom pruwowaše Luana prěni raz wrotarku Rebeccu Spencer (19.). Cyłkownje pak nastawachu přećiwo ryzy na defensiwu wobmjezowanej wubrance z Jamaiki lědma rumy.
Dobry test přećiwo Wojerecam
Sokoł Ralbicy/Hórki – Wojerowski FC 1:2 (0:1)
Za Ralbicy zasadźeni: Chr. Gloxyn – Matka, Schultz, A. Wałda, Rachela, Šiman, D. Šołta, Kurjat, D. Gloxyn, P. Šołta, B. Bejma, Ričel, Kunze, Budar, Woko
Po serbskim supercupje tydźenja w Njebjelčicach hrajachu chowancy trenarja Tomaša Henčela doma w Ralbicach přećiwo Wojerecam. Tamniši koparski cyłk hraje w krajnej klasy, potajkim ligu wyše hač Sokoljo. Tuž běše jasne, zo změje škit Sokoła tójšto dźěła.
Hižo po pjeć mjeńšinach mějachu hosćo dwójce wulku składnosć k nawjedowanju. Z wjele zbožom pak tomu Sokoljo zadźěwachu. Scyła běše w prěnich mjeńšinach widźeć, zo běchu Wojerowčenjo dobre mustwo. Ralbičenjo dyrbjachu so najprjedy namakać. W 22. min. pak prěni raz klinkaše. Wojerowčan předrě so přez lěwu stronu do šěsnatki a hraješe bul prěki, hdźež Eric Schönfelder přetwori. Sokołam so přewjele njeporadźi, dokelž bul w natwarje přečasto přezahe zhubichu. Škit pak so popadny a wjace wjele njedowoli. Krótko do połčasa pak hosćo znowa rjenje kombinowachu. Wrotar Christoph Gloxyn pak móžeše bul z nohu wotwobarać.
Start za Dynamo so bliži
Mustwo SJ Dynamo Drježdźany je zaso wróćo w Sakskej a krótko před startom do noweje sezony. W poradźenym treningowym lěhwje při Walchowskim jězoru w Awstriskej je mustwo ćežko a wuspěšnje trenowało. Wuspěšny trening bu přez dobyća w testowymaj hromaj wobkrućeny. Drježdźanscy koparjo dobychu lochko z 5:1 přećiwo awstriskemu druhemu zwjazkowemu ligistej St. Pölten. Tež SC Paderborn z druheje Němskeje zwjazkoweje ligi móžachu přewinyć. Kónčny wuslědk rěkaše 2:0 za Dynamowčanow.
Nižozemska a Jendźelska do přichodneho koła zaćahnyłoj
Nižozemjanki su jako dobyćerjo skupiny E do wosmifinala swětoweho mišterstwa kopańcy žonow zaćahnyli. Při jasnym 7:0 přećiwo nowačkej WM Vietnamej docpěchu woni dotal najwyše dobyće swětoweho mišterstwa w Awstralskej a Nowoseelandskej. Nižozemska wotpowědowaše wot spočatka swojej róli faworita. Najebać zmužity start Vietnama trjechi Lieke Martens po ani wosom mjeńšinach z wobhladanja hódnej třělwu k nawjedowanju. Krótko na to zwyši Katja Snoeijs. We 18. min. staji Esmee Brugts mjezywuslědk na 3:0, wulkotna třělwa to wot kromy šěsnatki. Srjedź prěnjeje połojcy bě partija dawno rozsudźena. Něhdyša hrajerka VfL Wolfsburga Jill Roord zasuny k 4:0 (23.). Trenar Vietnama Duc Chung Mai změni krótko na to dwójce, Nižozemska agěrowaše slědujo trochu mjenje aktiwne. Tola krótko do přestawki zapisa so tež hišće Danielle van de Donk do lisćiny třělcow (45.). 5:0 bě zasłužene.
Bičwolejbulisća so wubědźowali
Młodźi rozhłosownicy Radija Satkule běchu póndźelu z hosćom w lěsnej kupjeli w Kulowje. Tam wubědźowaše so 17 wólnočasnych wolejbulowych cyłkow při třećej staciji lětušeje bičwolejbuloweje tury. W finalu přesadźichu so před něhdźe 300 přihladowarjemi Wotrowscy přećiwo mustwu „Syčomłóćawa“. Přichodny tydźeń su Satkularjo potom w Konjecach. Finale wuhraje so 28. awgusta w Miłoćicach.
Foto: Konstantin Hrjehor
Wysoka poražka na spočatku noweje hrajneje sezony
SJ Chrósćicy – Biskopičanske KT II 0:5 (0:0)
Zestawa domjacych: Králíček (46. Škoda) – Mark, Runt (46.Rätze), M. Zahrodnik, Kreuz, Matješk, G. Zahrodnik, Hawš, L. Zahrodnik, Młynk, Paška
Prěni test za přihot noweje hrajneje doby wotmě so za koparjow SJ Chrósćicy pjatk na domjacym trawniku přećiwo rezerwje Biskopičanskeho KT. Dowola a zranjenja dla falowachu mnozy hrajerjo pola SJC. Hosćo běchu w zašłej hrajnej dobje we wokrjesnej wyšej lize druhe městno docpěli a so z wokrjesnym pokalnym dobyćerjom stali.
Wot spočatka wotmě so wotewrjena hra. Domjacy spytachu so přeco zaso přez křidle kombinować a tak k šansam dóńć. Tola spočatnje sej wobaj cyłkaj dobre šansy wuhrać njemóžeštej. Rezerwa Biskopičanow pokaza dobre kombinacije a pytaše tak puć k wrotam. W prěnim połčasu pak přihladowarjo hišće wjele wrotowych situacijow njewidźachu. Najlěpšu šansu za SJC měješe Gabriel Zahrodnik. Tola wrotar hosći bul z dobrym refleksom k róžkej wotwobara.
Hosćićel swětoweho mišterstwa dale sobu hraje
Po tym zo sta so Nowoseelandska njedźelu z přihladowarjom swójskeje party, přetra Awstralska wčera předkoło. Po dobyću 4:0 přećiwo Kanadźe zaćahnychu Awstralčanki na domjacym swětowym mišterstwje kopańcy žonow jako prěni skupiny do wosmifinala. Prašenje wšěch prašenjow wujasni so hižo 60 mjeńšin do zahwizdanja. Jako wozjewichu zestawa mustwa bě jasne, zo nawróći so nošerka Awstralskeje nadźije Sam Kerr do kadra. Ofensiwna hrajerka FC Chelsea sedźeše po wustrowjenym zranjenju bristwow drje jenož na ławce, tola wěstosć, zo móže wona w nuzowym padźe zapřimnyć, pohonjowaše hosćićelki. Hižo w dźewjatej mjeńšinje warješe so stadion prěni raz, jako Hayley Raso z 13 metrow k 1:0 nawjedowanju do dołheho róžka trjechi. Olympiski dobyćer Kanada skutkowaše hnuty a trjebaše někotre mjeńšiny, zo by so wot zažneho šoka zhrabał. Potom pak bě Raso hižo zaso wuspěšna. Tónraz reagowaše wona po róžku a zmylku wrotarki Sheridan, kotraž nimo bula pjasćowaše, najspěšnišo: 2:0 (39.). Krótko do toho běchu Awstralskej pozdatnje korektne wrota minimalneje nimohrě dla wzali.
Serbske cyłki tež chětro wuspěšne
Po tym zo wozjewichu so před dwěmaj tydźenjomaj wšitke zakónčace koparske tabulki muži minjeneje hrajneje doby 2022/2023 na wokrjesnej runinje, je sportowa redakcija Serbskich Nowin na přeće wjacorych čitarjow sportowych stron tež hišće raz wšitke dorostowe tabulki zestajała. Z nich je wuwidźeć, zo běchu tež serbscy koparjo chětro wuspěšni. Tak wudoby sej we wokrjesnej lize młodźiny B w stafli 1 hrajne zjednoćenstwo Radwor/Wulka Dubrawa titul a tež młodźina C hrajneho zjednoćenstwa Chrósćicy/Ralbicy bě z druhim městnom w stafli 3 chětro daloko prědku zaměstnjena. Dokelž je to cyłkownje 23 tabulkow, dźěli so wozjewjenje do dweju dźělow.
wokrjesna liga młodźina A
1. TSV Połčnica 1920 20 84:24 47
2. Rakecy/Njeswačidło 20 74:32 47
3. Natw. Němske Pazlicy 20 57:46 41
4. HZ Bukecy 20 88:45 40
5. Kinspork/Łužnica 20 58:37 31
6. Arnsdorfske KT 20 58:63 31
7. HZ Drohotka Ramnow 20 48:66 20
8. HZ Chrósćicy/Njebjelčicy/
Pančicy-Kukow 20 47:63 17
9. ST Porchow 20 45:73 16
10. HZ ST 1922 Radwor 20 39:75 14
11. HZ Großnaundorf 20 41:115 10
wokrjesna liga młodźina B, stafla 1
1. HZ ST 1922 Radwor 16 128:14 45
2. HZ Malešecy/Budyšink 16 65:19 37
3. ST Póst Germ. Budyšin 16 68:28 31
4. ST Horni kraj Sprjewja 16 51:31 29
5. HZ ST Hodźij 04 16 57:57 25
6. HZ SZ Wjelećin 16 37:61 21
7. HZ Chrósćicy/Njebjelčicy/
Pančicy-Kukow 16 44:61 19
Wuspěšna premjera
HZ Sokoł Ralbicy/Hórki II / ST Marijina hwězda II – SG Frankenthal II 3:1 (1:0)
Za hrajne zjednoćenstwo zasadźeni: Jakubaš – Čornak, Zynda, Kocor, Hantsch, Budar, Mjechela, Lešawa, Materna, Seiler, Hübner, Ladewig, Zimmermann, Kubic, Čórlich, Bjeńš
Nowowutworjene koparske zjednoćenstwo druheho zastupnistwa Sokoła Ralbicy/Hórki a rezerwy ST Marijineje hwězdy testowaše njedźelu prěni raz. Cil běše so zahrać a so mjez sobu zeznajomić. Mustwo běše derje měšane a so tež jara spěšnje do hry namaka.
Domjacy dachu bul rjenje w swojich rjadach běžeć a mějachu wjac hrajnych podźělow. Po foulu połoži sebi nazhonity Stefan Bjeńš z něhdźe dwaceći metrow kulowatu kožu k wólnemu kopej a jón k nawjedowanju přetwori. Po rjanych kombinacijach měješe Nick Lešawa dwójce šansu rezultat zwyšić, tola wrotar stajnje sylnje dźeržeše. Tež Bjeńš by dyrbjał krótko do połčasa składnosć wužić, ale třěli hrajny nastroj wyše wrotow.
