Maas na wopyće w Moskwje
Berlin (dpa/SN). Konfliktaj na Ukrainje a w Libyskej stejitej w srjedźišću dźensnišeho wopyta zwjazkoweho wonkowneho ministra Heika Maasa (SPD) w Ruskej. Dalšej temje zetkanja z ruskim wonkownym ministrow Sergejom Lawrowom w Moskwje stej wobchadźenje z Iranom a zhromadne dźěło z Ruskej w Bjezstrašnostnej radźe UNO. Energijowe zastaranje Němskeje a zapadneje Europy a najnowše hroženja USA přećiwo zamołwitym přistawa w Sassnitzu-Mukranje, hdźež składuja roły za nowy płunowód Nord Stream 2, chcyštaj politikarjej tohorunja rozjimać. Społnomócnjeny zwjazkoweho knježerstwa za styki k Ruskej Dirk Wiese (SPD) je sej dźensa w rańšim magacinje sćelaka ZDF tajke hroženja zakazał.
Po krótkowopyće w Moskwje pojědźe Maas dale do Pětrohrodu, hdźež wotměja so wopomnjenske zarjadowanja za wopory blokady města w Druhej swětowej wójnje. Tehdy zahiny wjace hač milion ludźi, dokelž je němska Wehrmachta Pětrohród wuhłódnić dała.
Tichanowskaja Běłorusku wopušćiła
Minsk (dpa/SN). Po prezidentskich wólbach w Běłoruskej je kandidatka opozicije Swjetlana Tichanowskaja kraj wopušćiła a přebywa w čłonskim kraju EU Litawskej. 37lětna je nětko wěsta, zdźěli litawski wonkowny minister Linas Linkevicius w interneće. Minister bě wčera wječor swoje starosće hladajo na namóc w Běłoruskej a na wěstotu maćerje dweju dźěsći zwuraznił. Tichanowskaja bě njedźelu na nowinarskej konferency rjekła, zo chcyła w kraju wostać a zo ma so za dobyćerku njedźelnych prezidentskich wólbow. Wona pak čuješe so masiwnje wohrožena, předewšěm wot wěstotnych mocow awtoritarneho prezidenta Aleksandera Lukašenka. 65lětny bě hrozył wójsko zasadźić, zo by swoju móc po 26 lětach za dalšu dobu zaručił.
W Běłoruskej su tež wčera wječor přećiwo znowawuzwolenju Aleksandera Lukašenka protestowali. Při tym dóńdźe k zražkam mjez demonstrantami a policiju. W stolicy Minsku je jedyn demonstrant pod dotal njewujasnjenymi wobstejnosćemi žiwjenje přisadźił.
Söder: Za wólbny bój přezahe
Rozdźělne reakcije na nastajenje Olafa Scholza za kanclerskeho kandidata SPD
Berlin (dpa/SN). Nominacija financneho ministra Olafa Scholza za kanclerskeho kandidata SPD ke klětušim wólbam zwjazkoweho sejma je najrozdźělniše reakcije zbudźiło. Prezidij a předsydstwo strony běštej Scholza wčera jednohłósnje pomjenowałoj.
W rjadach SPD reaguja pozitiwnje. Rěča wo wuskim mustwje strony, frakcije, knježerstwa a kandidata, kaž generalny sekretar Lars Klingbeil potwjerdźi: „Smy zwólniwi, a mam wulki lóšt na wólbny bój.“ Manuela Schwesig, ministerska prezidentka Mecklenburgsko-Předpomorskeje pokaza na wulke zasłužby, kotrež je sej Scholz w koronakrizy zdobył.
Mětopředsyda FDP Wolfgang Kubicki je sej porno tomu wěsty, zo rozsud na dobro Scholza socialdemokratam skerje škodźi. „Nawodnistwo strony dyrbi rozkłasć, čehodla měli ludźo w kraju Scholza wolić, hdyž wón ani sam njezdokonja, zo swójscy towaršojo jeho za předsydu strony wuzwola“, rjekny Kubicki powěsćerni dpa.
Pompeo w Čěskej
To a tamne (11.08.20)
Noweho štyrikolesateho kolegu maja wot najnowšeho sobudźěłaćerjo Rahlstedtskeho kěrchowa w Hamburgu. Roboter „Rainos“ jězdźi kóždu nóc z 200litrowskim tankom wody po kěrchowje, zo by rowy krjepił. Jězdźidło ma wjacore miliony měrjenskich dypkow składowane, zo móhło so na kěrchowje orientować. Poprawom maja sobudźěłaćerjo 2 500 rownišćow jědnaće króć wob lěto krjepić. To mjeztym dawno wjac njedosaha.
Z dołhim jědźnym štabikom fararka w Jendźelskej za čas koronapandemije wěriwym woblatka wudźěla. Mnozy wosadni běchu so natyknjenja z wirusom bojeli, rjekny duchowna Eileen Harrop we wuchodojendźelskim Winstonje. Tuž jej do mysli přińdźe, štabiki z chinskeje kuchnje wužiwać a ludźom prawy chlěb město woblatka do ruki dać. Zhromadne piće wina pak je dale zakazane.
Do šule z nahubnikom abo nic
W dalšich zwjazkowych krajach podawaja zaso prawidłownu wučbu
Podstupim (dpa/SN). Ze škitnymi naprawami přećiwo koronawirusej su dźensa w třoch dalšich zwjazkowych krajach nowe šulske lěto zahajili. Po tym zo běchu so minjeny tydźeń šulerjo w Mecklenburgsko-Předpomorskej a Hamburgu nawróćili, wot dźensnišeho tež na šulach Schleswigsko-Holsteinskeje, Berlina a Braniborskeje zaso žiwjenje knježi.
W Schleswigsko-Holsteinskej chcedźa po móžnosći wšitkim z 363 000 šulerjow prezencnu wučbu poskićeć. Kubłanska ministerka Karin Prien (CDU) rěči wo znowazahajenju prawidłowneje wučby pod wuměnjenjemi korony. Ministerstwo šulerjam a wučerjam nuznje radźi, prěnjej tydźenjej w šuli škit za hubu a nós wužiwać – tež we wučbje. Rjadownje 1. do 6. lětnika su z toho wuwzate. Powšitkownu winowatosć wužiwanja nahubnika kaž w druhich krajach Prien wotpokazuje.
Přećiwo alkoholizmej
Waršawa (B/SN). Biskopska konferenca Pólskeje wěriwych namołwja tónle měsac so alkohola wzdać. „Alkoholizm potrjechi wjetšinu pólskeje ludnosće, ale w towaršnosći so problem lědma zjawnje jewi“, praji rěčnik biskopskeje konferency. Cyrkej přeje sej měsac strózbosće a wočakuje, zo biskopja to podpěraja. Alkoholikarjo sami sej zwjetša wjace pomhać njemóža, tež přiwuzni trjebaja pomoc. „Fachowcy definuja alkoholizm jako kompleksnu a lesćiwu chorosć z rozdźělnymi formami a symptomami“, wurěčnik wujasnja. W lěće 2011 wozjewi swětowa strowotniska organizacija WHO rozprawu wo wužiwanju alkohola na swěće. W Pólskej pije jednotliwc 12,5 litrow čisteho alkohola wob lěto. Přerězk na swěće leži pola šěsć litrow. Němcy lětnje 11,8 litrow čisteho alkohola pija.
Kemše wšědnje w interneće
Miliony na dobro Libanona
Paris (dpa/SN). Na mjezynarodnej konferency darićelow na dobro Libanona su 252,7 milionow eurow nazběrali. To zdźěli francoski prezidialny zarjad po widejowej konferency. Francoski prezident Emmanuel Macron bě konferencu zhromadnje ze zastupnikami UNO nawjedował. Němska přinošuje něhdźe 20 milionow eurow. Libanon ma po zahubnym rozbuchnjenju w Beiruće wosebje wulke hospodarske problemy.
Ministraj wotstupiłoj
Beirut (dpa/SN). Po přiběracej roznjemdrjenosći zahubneje detonacije w Beiruće z wjele mortwymi a zranjenymi dla libanonske knježerstwo dźeń a bóle chabła. Wčera staj dwaj ministraj wotstupiłoj. Ministerski prezident Hassan Diab spyta dalšich ministrow pohnuć, zo w knježerstwje wostanu. Knježerstwo kraja je rozpušćene, hdyž wjace hač třećina wšitkich 30 ministrow swoje zastojnstwo złoži. Wčera su sta ludźi přećiwo knježerstwu protestowali, dokelž by so po jich měnjenju katastrofje zadźěwać hodźało.
SPD zhromadnje z Lěwicu?
Trittin: Hroženja USA sej dlěje lubić njedać
Berlin (dpa/SN). Wonkowny politikar Zelenych Jürgen Trittin je hroženja ze sankcijemi ze stron USA přećiwo přistawej Sassnitz-Mukran noweho płunowoda Nord Stream 2 dla „hospodarsku deklaraciju wójny“ mjenował. „Tajkich hrožacych listow přećiwo němskim předewzaćam je mjeztym wjac hač dosć“, rjekny Trittin powěsćerni dpa. Hroženje republikanskich senatorow přećiwo přistawej je po europskim a mjezynarodnym prawje ilegalne. „Nutřtykanje USA do suwerenity Němskeje a Europskeje unije je dotal njesłyšanu agresiwitu docpěło, kotruž njesměmy sej dlěje lubić dać.“ Předewzaća, kotrež su z projektom zaběrane, trjebaja škit před tutymi „wildwest“-metodami.
Jürgen Trittin zwjazkowe knježerstwo namołwja, politiku wahanja skónčić. „Němska a EU dyrbjałoj robustnu wotmołwu na zadźerženje USA namakać. K tomu móhło hroženje ze swójskimi sankcijemi słušeć, na přikład import frackingoweho płuna z Ameriki.“
Lukašenko wólby pječa dobył
Minsk (dpa/SN). Wólbna komisija w Běłoruskej je statneho prezidenta Aleksandera Lukašenka za dobyćerja wčerawšich prezidentskich wólbow deklarowała. 65lětny je 80,23 procentow wšitkich hłosow dóstał, kaž dźensa z Minska rěkaše. Přećiwnica Lukašenka Swjetlana Tichanowskaja dósta porno tomu jeno 9,9 procentow, wólbna komisija zdźěli. Tichanowskaja je mjeztym připowědźiła, zo wólbny wuslědk njepřipóznaje. Jeje přiwisnicy běchu hižo minjenu nóc přećiwo Lukašenkej protestowali, wumjetujo jemu wólbne wobšudnistwo. Policija reagowaše z wodomjetakami a ze sylzopłunom. Tójšto demonstrantow je zajała.
Wólbne wobdźělenje w bywšej sowjetskej republice ze 6,8 milionami wólbokmanych wučinješe 84 procentow.
Po cyłej Běłoruskej bě wčera wječor k masiwnym protestam a zražkam z policiju dóšło. Opozicija na to skedźbnja, zo je Tichanowskaja w někotrych wólbnych lokalach cyle jasnje dobyła. Lukašenko bě hižo do wólbow připowědźił, zo chce zastojnstwo na kóždy pad wobchować.
