W padźe wólbneho dobyća chce sakski ministerski prezident Michael Kretschmer wobydlerjam Sakskeje zmóžnić, wo zakonjach, kotrež je krajny sejm schwalił, doskónčnje rozsudźić. To čitamy w aktualnym wudaću tydźenika Zeit. Wón pak rěči tam runje tak wo tym, kóždy zakonski naćisk přichodnje online wozjewić chcyć, zo móhła ludnosć swoje mysle k tomu wuprajić. Wobaj namjetaj měli w zwisku widźeć. Bóle na lud poskać chcyć a jeho argumenty do politiskeho dźěła přiwzać njeje žadyn špatny wotpohlad. Prašenje pak je, hač so jedyn namjet z dalšim prěkuje. Stanu so ludźo, kotrychž namjety njewobkedźbowane wostanu, z wosebitymi wabjerjemi za wothłosowanje wo wotpowědnym zakonju? A što rěka to wšo za krajny sejm jako zakonjedawarja?

Zo dyrbja strony swoju dźěławosć lěpje a transparentnišo rozłožić, poprawom žane nowe dopóznaće njeje. A tohodla njeměli jenož politikarjo předležace namjety wobšěrnje rozjimać. Axel Arlt

Čerstweho a wokřewjaceho wětřika dla je muž w braniborskim wokrjesu Märkisch-Oderland póndźelu dospołnje nahi z motorskim jěł. Jako jeho policistaj zadźerže­štaj, wón jimaj rjekny, zo dźě je ćopło. Z konsekwencami muž ličić njetrjeba, wšako měješe krute črije wobute a nahłownik. Nimo toho njeje so nichtó pola policije hóršił. Zastojnikaj zwě­sćištaj tuž jenož identitu muža a proše­štaj jeho, znajmjeńša so cholowy wobuć.

Jara njerozumny je so 85lětny muž minjenu njedźelu na awtodróze do Cuxhavena zadźeržał. Tak je wotjězdku skomdźił a so z awtom cyle jednorje na dróze zawróćił. Dalši 50lětny šofer móžeše zražce runje hišće tak zadźěwać, 85lětny pak dale jědźeše. Jako policistaj jeho doma nańdźeštaj, jimaj wuměnkar wotmołwi, zo wšak so ničo stało njeje. Zastojnikaj pak sćazaštaj jemu jězbnu dowolnosć. Nimo­ toho ma starc z chłostanskim jednanjom ličić.

Ewaluaciska rozprawa załožby Sakske wopomnišća nětko předleži

Drježdźany/Budyšin (UM/SN). Ewaluacija załožby Sakske wopomnišća, kotruž je institut Prognos přewjedł, je wotzamknjena. „Kónčna rozprawa wopřijima pozitiwne hódnoćenja runje tak kaž pokiwy k dalewuwiću załožby“, rozłožuje předsydka rady mjenowaneje załožby a mi­nisterka za wuměłstwo a wědomosć dr. Eva-Maria Stange (SPD). Hižo w dwój­nym etaće 2019/2020 Swobodneho stata Sakskeje su załožbje srědki přewostajene. Tak stupaja přiražki wot 2,45 milionow eurow na stajnje 3,046 milionow lětsa a klětu. To zmóžnja wjetše wudawki za personal, ale tež za wěcne zarjadniske nadawki, za srědki třećim kaž tohorunja za inwesticije.

W nowembru 2016 bu Susann Šenkec za předsydku rady Załožby za serbski lud wuzwolena. Lětsa w meji su ju radźi­ćeljo jednohłósnje w zastojn­stwje wobkrućili. Janek Wowčer je so z njej zetkał, je jej někotre prašenja zhladujo na minjenu wólbnu dobu rady stajił a so za wuhladami prašał.

Kak hódnoćiće dźěławosć załožboweje rady­ w minjenej legislaturnej dobje?

S. Šenkec: Wot lěta 1991 je Załožba za serb­ski lud nošny model za spěcho­wanje rěče, kultury kaž tež identity Serbow. 2016 smy 25. róčnicu jeje wobstaća swjećili. W februaru samsneho lěta bu 3. financne zrěčenje podpisane, kotrež zawěsća Serbam, serbskim institucijam, towarstwam a projektam hač do klětu­šeho wurunane spěchowanje, byrnjež trěbnu dynamizaciju parowali. Tak wobsteji na dobu pjeć lět – potajkim wot 2016 do 2020 – planowanska wěstota, ko­traž wotwěra zamołwitym móžnosće priority sadźeć, koncepty wuwiwać, změny přewjesć a do přichoda planować. Z projektom „Serbska rěč w nowych medi­jach“ dósta naš lud wot 2015 přidatne spěchowanske srědki, kotrež załožba w swójskej zamołwitosći wobhospodarja. To mam za wulki wuspěch.