Drježdźany (dpa/SN). Afriska swinjaca mrětwa (ASP) je w dalokej měrje přewinjena. Tuchwilu njeje w swobodnym staće ani jenički aktiwny pad, socialne ministerstwo zdźěli. Posledni pad mrětwy bě so před dobrym lětom jewił. Zawrjene pasma, kotrež jenož hišće w Budyskim a Zhorjelskim wokrjesu eksistuja, chcedźa nětko postupnje pomjeńšić.

Po informacijach ministerstwa su po wudyrjenju mrětwy w oktobru 2020 cyłkownje 2 398 z wirusom ASP natyknjenych a zahinjenych dźiwich swini našli. Za bój přećiwo mrětwje je swobodny stat něhdźe 54 milionow eurow nałožował. Z toho su 30 milionow eurow za nastajenje a wottwar 850 kilometrow dołhich škitnych płotow wudali.

Afriska swinjaca mrětwa je wirusowa infekcija, kotraž jenož swinje potrjechi. Wona je njehojomna a kónči so w nimale wšěch padach smjertnje. Swinje, kiž su chorosć přewinyli, njejsu přećiwo wirusej imune, ale móža so znowa natyknyć. Dotal njeeksistuje žadyn srědk, z kotrymž móhli swinje šćěpić. Chorosć rozšěrja so přez direktny kontakt skoćećow abo přez kontaminowane wěcy a picu.

Drježdźany/Taipeh (dpa/SN). Sakski hospodarski minister Dirk Panter je so na rozmołwy ze zastupnikami industrije połwodźakow do Taiwana podał. W stolicy Taipeh chce politikar SPD mjez druhim hoberski koncern połwodźakow Foxconn wopytać, hospodarske ministerstwo zdźěla. Předewzaće produkuje na přikład nastroje za koncern Apple. Na dźensa so zahajacych wikach połwo­dźakow Semicon chcyše Panter němski pawiljon wotewrěć a při wječeri z taiwanskimi předewzaćelemi wo móžnych inwesticijach w Sakskej rěčeć.

Na fachowych wikach su tež firmy ze Sakskeje zastupjene. W zwisku ze zasydlenjom taiwanskeho zhotowjerja chipow TSMC w Drježdźanach nadźija so Panter rozmacha za rozmołwy wo dalšich inwesticijach. Twarnišćo TSMC je tuchwilu najwjetše w Němskej. „Wiki Semicon w Taiwanje su perfektne jewišćo, na kotrymž móžemy rólu Sakskeje jako wodźace městno industrije połwodźakow a z tym zwjazane šansy za druhe předewzaća podšmórnyć“, Panter rjekny. Fachowe wiki wotměwaja so 30. króć. Na nich prezentuje so 1 200 předewzaćow ze 56 krajow.

Sportowe awto Formule 2 su policisća na normalnej dróze w Čěskej zadźerželi. Druzy šoferojo běchu zastojnikow informowali, zo je tajke awto po puću. Na to při­jědźechu policisća z wjacorymi wozami a helikopterom. 51lětny šofer nochcyše so wuprajić. Alkohol a drogi njejsu zwěsćili. Policija je hižo wjele lět podarmo za awtom pytała, wo kotrymž stajnje zaso w interneće rozprawjeja. Wóz ma 600 PS a je hač do 300 km/h spěšny. Šofer dyrbi z wysokej pokutu a zakazom jězdźenja ličić.

Młody łós (Elch) je na swojim pućowanju na wuchodźe Awstriskeje jednu z najwažnišich železniskich čarow kraja wjacore hodźiny blokował. Kolije zwjazuja Wien ze zapadnej Awstriskej, Němskej a za­padnej Europu. Jako „Emil“ znate zwěrjo steješe pola St. Pöltena na kolijach a so njehibny, jako železnica přijědźe. Mała ­lokomotiwa Emila z kolijow storči.