To a tamne (17.08.22)
W stolicy Nepala Kathmandu tuchwilu žane wotpadki njewotwozyja, dokelž při wulkej deponiji bydlacy protestuja. Wobydlerjo wokoło Banchare Danda deponije hižo někotre tydźenje nakładne awta zadźerža, kotrež chcedźa tam wotpadki dowjezć, kaž lokalne medije rozprawjeja. Wobydlerjo strukturnje słabeje kónčiny wokoło smjećoweje deponije su chudźi a ćerpja pod smjerdom kaž tež zanjerodźenjom wulkeho mnóstwa wotpadkow dla, kotrež tam jenož deponuja a njerecycluja. Z protestom žadaja sej lěpše žiwjenske wuměnjenja.
Zwěrjeću překwapjenku mějachu minjeny kónc tydźenja wobydlerjo Berlinskeho bydlenja. Tam je jich liška wopytała. Ludźo su zwěrjo sobotu rano na balkonje našli, policija zdźěli. Potom pak je liška na třěchu domu ćeknyła. Policisća zamóžachu ju pak zaso na balkon wabić. Přez bydlenje a po schodach je zwěrjo potom zaso won na dróhu běžało. Liška bě spłóšiwa a njeje nikoho nadpadnyła, w zdźělence dale rěka.
Warnuje před katastrofu
Kijew (dpa/SN). Ukrainski prezident Wolodymyr Zelenskyj je Rusku znowa doraznje namołwjał, wojakow z atomoweje milinarnje Saporiššja cofnyć. Prezident warnowaše předewšěm hladajo na sćěhi móžneje nuklearneje katastrofy, kotraž potom wšitke kraje masiwnje poćežuje. Wot Ruskeje wobsadźenu najwjetšu jadrowu milinarnju Europy hižo dny dołho nadběhuja.
Scholz w Skandinawiskej
Oslo (dpa/SN). Na druhim dnju jězby po Skandinawiskej zetka so zwjazkowy kancler Olaf Scholz (SPD) dźensa wšwedskej stolicy Stockholmje z ministerskej prezidentku Magdalenu Andersson. W rozmołwje wobjednawatej mjez druhim planowany přistup k NATO. Němska je hižo přihłosowała, zo smětej Šwedska a tež Finska k NATO přistupić. Scholz je so wčera w Norwegskej hižo z tamnišim ministerskim prezidentom Jonasom Gahrom Støreom na wuše zhromadne dźěło nastupajo energijowy sektor dojednał.
Škitne naprawy podlěšili
Žane žiwe slěbro w rybach našli
Podstupim (dpa/SN). Přepytowanja wody Wódry na jědojte substancy hišće wotzamknjene njejsu. „To móže hišće wjacore dny trać, doniž njejsmy wšitke maćizny, kotrež móhli tajku situaciju zawinować, dokładnje přepytowali“, rjekny braniborski wobswětowy minister Axel Vogel (Zeleni) wčera w informaciskim radiju RBB. „Krajny labor pak zaměrnje na tym dźěła.“ Pokiwy z Pólskeje, zo je so wysoko jědojta maćizna Mesitylen do Wódry dóstała, njejsu so z Braniborskeje strony sem wobkrućili, Vogel wuswětli. Mjeztym su wobšěrne přepytowanja wody zahajili. „A štož ryby nastupa, to dźe w prěnim rjedźe wo to wuslědźić, hač su labory w nich ćežkometale namakali“, wobswětowy minister rozłoži. „Z pólskeje strony su signale, zo njejsu ćežkometale a wosebje tež žane žiwe slěbro w rybach našli, štož wšak tež změruje.“
Kritika přećiwo Woelkijej přiběra
Köln (dpa/SN). Wjace hač 60 fararjow, wosadnych referentkow a dalšich sobudźěłaćerjow Kölnskeho arcybiskopstwa je so zjawnje wot kardinala Rainera Marije Woelkija wotwobroćiło a wozjewjenje podpisało. „To je njesměrnje dynamiske wuwiće, mnozy chcedźa podpisać“, wuswětli farar Dirk Peters wčera w Kölnje powěsćerni dpa. We wozjewjenju mjez druhim rěka: „Žadamy sej woprawdźity nowozapočatk. K tomu słušeja tež personalne změny a změny systema.“
Kritika přećiwo Woelkijej w najwjetšim katolskim biskopstwje Němskeje hižo dołho přiběra. Zo pak so nětko tež telko sobudźěłaćerjow arcybiskopstwa přećiwo swojemu najwyšemu šefej stajeja, je překwapjace. „Nowe informacije hladajo na komunikacisku strategiju kardinala a jeho sobudźěłaćerjow wjednistwa nas rozhorjeja“, we wčera wozjewjenej zdźělence dale rěka. Woelki je prawdźepodobnje w lěće 2020 komunikacisku agenturu angažował, kotraž bě plany za jeho „přežiwjenje“ w zastojnstwje naćisnyła.
Přetrjebarjow podpěrać
Zwjazkowe knježerstwo chce hladajo na płunowy wotedawk reagować
Berlin (dpa/SN). Zwjazk bydlenskich a imobilijowych předewzaćow (GdW) je sej wotedawka płuna dla podpěru financielnje sylnje poćeženych bydlenskich předewzaćow žadał. „Płunoweho wotedawka dla přiwótřa so financielne poćeženje socialnje orientowanych bydlenskich předewzaćow kaž tež domjacnosćow podružnikow“, rozłoži prezident zwjazka GdW Axel Gedaschko wčera w Berlinje.
To a tamne (16.08.22)
Předrasćeny jako policist je młody muž při hłownym dwórnišću Hagen wustupował. Policisća pak su 21lětneho w nocy na sobotu lepili, jako měješe wón dźěle policajskeje uniformy zwoblěkane, policija wčera zdźěli. Tak chcyše młody muž zaćišć zbudźić, zo je zastojnik. Jako wopodstatnjenje mjenowaše wón produkciju krótkich widejow za swój account w socialnych medijach. Při tym by so wosoby naprašował. Nětko pak je policija přećiwo 21lětnemu jednanje znjewužiwanja powołanskich pomjenowanjow a drasty dla zahajiła.
W Čěskej je wubědźowanski wóz formule 1 na awtodróze jěł a so wo kedźbnosć postarał. Policija je přepytowanja k pozdatnje ilegalnej jězbje zahajiła, zdźěli wčera rěčnica přisłušneho policajskeho prezidija w Praze. Zastojnicy zawěsćichu wšitke wideja podawka, kotrež buchu dotal w socialnych medijach wozjewjenje.
Z wulkeje wody 2002 wjele wuknyli
Drježdźany (SN). Aktualnje ma suchota Saksku kruće w horšći. W mnohich rěkach je lědma hišće wody, lěsy so pala. Před 20 lětami bě wobraz hinaši, jako wjedźechu njewidźane zliwki w Sakskej a Čěskej k žołmje njewočakowaneho rozměra. Krajny centrum za wulku wodu Sakskeho krajneho zarjada za wobswět, ratarstwo a geologiju (LfULG) sćehnje bilancu k róčnicy katastrofy wulkeje wody w Sakskej před 20 lětami.
Woblubowane zetkanja
Rom(B/SN). Do swojeje měšniskeje swjećizny je Michele Madonna jako DJ w diskotekach skutkował. Dźensa organizuje w problemowych štwórćach Neapela partyje, na kotrychž so sta młodostnych wobdźěla. Kaž katolska powěsćernja rozprawja, je bamž Franciskus z měšnikom telefonował a so jeho woprašał, kak móže wón před telko młodostnymi rěčeć. Madonna jemu wotmołwi, zo njeje to problematiske, dokelž su to swjedźenje za młodostnych z křesćanskej disko-hudźbu a z momentami modlenja. „Prošu informujće mje běžnje wo tym“, bamž rozmołwu z měšnikom zakónči.
Zmužiće sonić
Wysokosć wozjewili
Berlin (dpa/SN). Towaršnosć Trading Hub Europe (THE) chcyše dźensa wysokosć statneho wotedawka za płun wozjewić. Pjenjezy maja zastaraćelam płuna pomhać, kiž dyrbja za wysoke płaćizny narunanje za wuwostawace tuńše mnóstwa płuna z Ruskeje kupić. Hospodarske ministerstwo wuchadźeše naposledk z toho, zo budźe to 1,5 do 5 centow na kilowattowu hodźinu.
Wupowědźenje hnydom móžne?
Berlin (dpa/SN). W aferje wokoło intendantki RBB Patricijew Schlesinger zetka so dźensa popołdnju w Berlinje rozhłosowa rada RBB, zo by wo rozpušćenju jeje dźěłoweho zrěčenja wuradźowała. Gremij je po statnym zrěčenju kmany intendantku wotwołać. Na zeńdźenju maja prašenje rozrisać, hač dóńdźe k hnydomnemu wupowědźenju, tak kaž sej to krajni politikarjo a tež Němski zwjazk žurnalistow žadaja, abo hač přisteja Schlesinger wěste pjenježne přiražki.
Merz přećiwo winowatosći
