Budyšin (SN/mwe). Wot pjatka do njedźele wotmě so w hali na Budyskim Trělnišću nadkonfesionalna konferenca Momentum. Na njej wobdźěli so 13 swobodnych křesćanskich wosadow, kotrež su tež jako powšitkownowužitne towarstwa Budyskeho wokrjesa zapisane. Hosćićelka zarjadowanja bě Budyska wosada Jozuwy. Něhdźe 600 přewažnje młodych ludźi z Budyšina, Ochranowa a wokoliny, z Wojerowskeje kónčiny, Kodersdorfa, Lubija, Žitawy a Běłeje Wody zwurazni na zarjadowanjach we wobłuku Momentuma swoje wěrywuznaće, zo bychu Bohu a jeho synej Jězusej hołdowali.

Pod hesłami kaž „Lubosć Wumóžnika je triumfowała“, „Kaž wón tež ja z rowa stanu“ abo „Jězuso, dźakuju so, zo sy nas wumóžił a zo njejsmy hižo winicy“ so holcy a hólcy druhdy samo hač do ekstazy spěwajo modlachu. K tomu běchu sej tež rěčnikow a prědarjow, mjez druhim ze Šwicarskeje, přeprosyli, prědowacych jim požadosć za „darjenjom, wodaćom abo sebjepytanjom bjez hrěcha“.

Drježdźany (dpa/SN). Sakski ministerski prezident Stanisław Tilich (CDU) je před tym warnował, wudobywanje brunicy po wokołopućach spěšnišo zakónčić hač planowane. Zwjazkowemu knježerstwu wón w tym zwisku wumjetuje, zo swoje přilubjenja njedodźerži. Pozadk su wot wuběrka komisije EU minjeny pjatk wobzamknjene­ směrnicy za dusykowe oksidy. Po tym móhli mějićeljo bruni­cowych milinarnjow we Łužicy nuzowani być, připrawy hižo hač do lěta 2030 zawrěć,­ sydom lět prjedy hač předwidźane. Zwjazkowe knježerstwo bě drje zasadnje přećiwo tomu hłosowało. Kaž Tilich rjekny, pak pobrachuje wotpowědny angažement, planam Europskeje unije woprawdźe zadźěwać. „To rani dowěru. Tak njemóže zwjazkowe knježerstwo swoje přilubjenja dodźeržeć“, rjekny Tilich­ powěsćerni dpa. „Směrnicy EU su na škodu łužiskeje brunicoweje kónčiny a zahubny hospodarskopolitiski signal přećiwo inwestoram, kotřiž maja jasny plan za Łu­žicu a na kotryž so ludźo spušćeja.“­

Kuriozna zwada wo předań praženych kołbaskow při płoće awtodróhoweho parkowanišća durinsku justicu dale zaběra. Tuchwilu čakaja na rozsud Weimarskeho wyšeho zarjadniskeho sudnistwa, hač rewiziju přećiwo rozsudej prěnjeho sudnistwa dopušća. Mějićelka předawanskeje budki při A 9 jězdźerjam wozydłow mjeztym dale kołbaski a kofej poskića, a to přez dwaj metraj wysoki płót. Wotpowědny zakaz města bě sudnistwo w Gerje w prěnjej instancy wob­krućiło.

Problemowy baćon Ronny, kotryž bě loni braniborsku wjes Glambeck ze swojimi atakami terorizował, tam zaso je, kaž wjesna předstejićerka wobkrući. Loni bě wón z pyskom stajnje zaso do awtow a woknow dypał, hdyž so tam w špihelu widźeše. Naposledk wěšachu ludźo płachty před wokna, zo bychu so škitali.

Drježdźany (dpa/SN). Sakscy Zeleni su hladajo na dźěło knježerstwoweje koalicije CDU a SPD přesłapjeni. Po wulkich nadźijach, kotrež běchu so po znowazaćahu SPD do wot CDU nawjedowaneho knježerstwa jewili, bilanca wostrózbja, rjekny frakciski šef Volkmar Zschocke po poł­času legislaturneje doby. Tójšto dojednanjow z koaliciskeho zrěčenja njeje zwoprawdźenych. SPD wón wumjetowaše, zo so přećiwo CDU njepřesadźa.

Granaty rozbuchnjene

Baršć (dpa/SN). Na wotpadkowej deponiji njedaloko awtodróhi A 15 mjez Rogoznom a Baršćom su dźensa dopołdnja dźewjeć granatow ze swětoweje wójny rozbuchnyli, kotrež běchu před dnjemi při twarskich dźěłach namakali. Wotrězk awtodróhi bě za to něhdźe hodźinu za­wrjeny. Třo wobydlerjo bliskeho wjesneho hotela dyrbjachu twarjenje wopušćić runje tak kaž dźewjeć dźěłaćerjow deponije. Tež płunowodaj běštej zawrjenej.

Prezident: Měr wobchować