Mnohe powšitkowne wuprajenja
Wšitke frakcije Krajneho sejma Braniborskeje su sej přezjedne, zo dyrbi kraj swojej zamołwitosći za zachowanje, spěchowanje a dalewuwiće delnjoserbšćiny wotpowědować. Na zhromadne wobzamknjenje pak njemóžachu so na wčerawšej debaće dojednać.
Podstupim (SN/at). Z hłosami koaliciskeju frakcijow SPD a Lěwicy je krajny sejm wčera wot wobeju zapodaty rozsudźenski namjet „Delnjoserbšćinu jako wot wotemrěća wohroženu mjeńšinowu rěč zachować a wožiwić“ schwalił. Wot frakcijow CDU a Zwjazka 90/Zelenych předpołoženy namjet „Serbšćina ma so zachować“, kotryž podpěrachu tež dalši zapósłancy opozicije, njeje trěbnu wjetšinu docpěł. Wuchadźišćo toho je zwada nastupajo minimalnu wulkosć wuknjenskeje skupiny w serbskej a bilingualnej wučbje w referentowym naćisku za nowe serbske šulske postajenje w Braniborskej.
Wo wuwiću jara pozitiwnje překwapjeny
Budyšin (SN/JaW). Zapósłanc zwjazkoweho sejma a čłon jeho etatoweho wuběrka dr. Reinhard Brandl (CSU) je wčera a dźensa Serbow wopytał. Přeprosyła bě jeho rozžohnowaca so zapósłanča zwjazkoweho sejma Marja Michałkowa (CDU). „Pozadk přebytka je, zo by so wón ze serbskimi institucijemi a wšitkim, štož nas wučinja, wosobinsce zeznajomił. Ja wšak hižo njekandiduju a njebudu z nim wjac hromadźe dźěłać. Tuž je wažne, zo wón wě, wo čo dźe“, Michałkowa rozłoži. Dr. Brandl dźě je w etatowym wuběrku zamołwity za pjenjezy zwjazkoweho nutřkowneho ministerstwa a tuž tež za spěchowanje Załožby za serbski lud.
Xi Jinping pola Trumpa
Washington (dpa/K/SN). Dźensa zetkataj so dwaj tuchwilu najmócnišej mužej swěta. W swojim priwatnym domicilu na Floridźe přijmje ameriski prezident Donald Trump prezidenta Chiny a stronskeho šefa Xi Jinpinga. Zasćinjeny je dwaj dnjej trajacy wjeršk wot napjatosćow, wuskutkowanych wot trajnych raketowych testow Sewjerneje Koreje. Wčera bě Trump znowa z němskej kanclerku Angelu Merkel (CDU) telefonował. Rěčałoj staj wonaj wo konflikće na wuchodnej Ukrainje kaž tež wo połoženju w Afghanistanje, rěka k tomu z Běłeho domu.
Tójšto „mortwych dušow“
Běłohród (dpa/SN). Při prezidentskich wólbach w Serbiskej měješe minjenu njedźelu po informacijach medijow znajmjeńša 800 000 njeeksistowacych ludźi wólbne prawo. W balkanskim kraju je 5,9 milionow połnolětnych. We wólbnym registru zapisanych pak bě 6,7 milionow, kaž nowina Blic rozprawja. Jeničce w stolicy bydleše 23 wosobow, rodźenych w 19. lětstotku. Młodźi ludźo demonstruja mjeztym hižo třeći dźeń přećiwo ministerskemu prezidentej Aleksandarej Vučićej, kiž bě wólby po jich měnjenju tež z pomocu „mortwych dušow“ jasnje dobył.
USA: Assad wina
Ćěkancow podpěrać
Na dobro strukturnje słabych kónčin
Berlin (dpa/SN). Bjezposrědnje do dźensnišeho zetkanja wuchodoněmskich ministerskich prezidentow z kanclerku Angelu Merkel (CDU) je zwjazkowe knježerstwo 150 milionow eurow wopřijacy program za inowacije w strukturnje słabych kónčinach připowědźiło.
Hač do kónca lěta 2019 zapołoženy program je specielnje za wuchod mysleny, rjekny zwjazkowa ministerka za kubłanje Johanna Wanka (CDU) nowinarjam. „Najpozdźišo hač do lěta 2020 měli wšitke strukturnje słabe kónčiny w Němskej z toho swoje lěpšiny měć“, wona zdźěli. Program pod hesłom „Změna přez inowacije“ chcedźa hišće lětsa zahajić.
Spěchować maja so na přikład kooperacije wysokich šulow a slědźenskich institucijow z małymi a srěnimi předewzaćemi. Zwjazk chcył při tym tematiske nastorki dawać. Regiony pak móža sej temy tež sami wupytać, na přikład při spěchowanju strukturnje słabych hórniskich kónčin.
Dalše spěchowanje trěbne
Ministerscy prezidenća wuchodoněmskich krajow z kanclerku wuradźowali
Mužakow (dpa/SN). Spěchowanje strukturnje słabych kónčin bě centralna tema dźensnišeho zetkanja wuchodoněmskich ministerskich prezidentow ze zwjazkowej kanclerku Angelu Merkel (CDU) w Mužakowje. Při tym dźěše wo to, „zo wuchodne kraje zhromadne wočakowanja formuluja, kak měło cyłoněmske spěchowanje po lěće 2020 wupadać“, rjekny sakski ministerski prezident Stanisław Tilich (CDU) jako hosćićel powěsćerni dpa do zahajenja posedźenja.
Z lěta 2001 wobzamknjenym solidarnym paktom II přewostaja Zwjazk wuchodoněmskim krajam hač do 2019 ně- hdźe 156,5 miliardow eurow. Kak móhło spěchowanje po tym wupadać, Zwjazk a kraje tuchwilu we wobłuku noworjadowanja financow rozjimuja.
Šansu wužił
To a tamne (06.04.17)
Kóčka je w Kamjenicy zasadźenje policije zawiniła. Wobydlerjo wjaceswójbneho domu běchu wočinjene durje bydlenja wuhladali. Dokelž na wołanje, klepanje a klinkanje nichtó njewotmołwi, wołachu susodźa policiju. Skónčnje so wukopa, zo bě kóčka na klinku skočiwši durje wočiniła a so na to po bydlenju rozhladowała. Policija kedźbliwych susodow chwaleše: Na wočinjenych durjach dźě njetrjeba w kóždym padźe kóčka wina być.
Z lětdźesatki starej kartu bywšeje Čěskosłowakskeje je so šofer z Finskeje podarmo po Čěskej republice orientować spytał. Nowych dróhow a změnjenych pomjenowanjow dla so wón w zapadočěskim Tachovje dospołnje zajědźe. Po tym zo bě so w swojej zadwělowanosći wopił, wobroći so na policistow. Woni wšak njemějachu za nimale dwaj promilej alkohola w jeho kreji žane zrozumjenje a napołožichu mužej pokutu 700 eurow.
Zettwitz budźe nowy nawoda
Budyšin (SN/CoR). Zhromadźizna regionalneho planowanskeho zwjazka Hornja Łužica-Delnja Šleska je na póndźelnym posedźenju Wolfganga Zettwitza za noweho nawodu zwjazkoweho zarjadnistwa powołała. To zdźěli Zhorjelski krajny rada a předsyda planowanskeho zwjazka Bernd Lange (CDU). Městno dyrbjachu znowa wobsadźić, dokelž bě so dotalny nawoda dr. Peter Heinrich 1. januara na wuměnk podał. Jörg Weichler zwjazk nětko komisarisce nawjeduje. Hdy Zettwitz zastojnstwo nastupi, njeje hišće jasne.
Z Mindena pochadźacy diplomowy geograf Wolfgang Zettwitz bydli a dźěła wot lěta 1994 w Hornjej Łužicy. W Budyskim zarjadnistwje stara so mjez druhim wo wubědźowanje „Rěčam přichilena komuna – serbska rěč je žiwa“ a wo spěchowanje towarstwow. 56lětny je ženjeny a nan dorosćeneje dźowki, kotraž bě šulerka Serbskeje zakładneje šule Budyšin.
Planowanski region wopřijima Budyski a Zhorjelski wokrjes na 4 500 kwadratnych kilometrach z 570 000 wobydlerjemi.
