Oslo (dpa/SN). Protestujo přećiwo dwělomnym reformam prawostatnosće w Pólskej je Norwegska ze srědkami Europskeho hospodarskeho ruma (EWR) financowany justicny program cofnyła. Politiska kontrola pólskich sudnistwow je mjeztym tak daloko postupowała, zo njeje hižo zastupujomne so na tajkim programje wobdźělić, zdźěli direktor norwegskeho sudniskeho zarjadnistwa Sven Marius Urke kónc tydźenja w Oslu.

Znjeměrnjaceje justicneje reformy w Pólskej dla Norwegska wotpowědne zrěčenje z Waršawu njepodpisa, kaž z tamnišeho knježerstwa rěkaše. Město toho chcedźa program, za kotryž bě něhdźe 70 milionow eurow ze srědkow EWR předwidźanych, znowa posudźować. Justicny program předwidźeše mjez druhim zhromadne dźěło na polu chłostanskeje justicy a w boju přećiwo domjacej namocy kaž tež kooperaciju mjez sudnistwami. Přetorhnjeny program pak nima so na druhe ze srědkow EWR financowane kooperacije z Pólskej wuskutkować.

Berlin (dpa/SN). Prěni króć je tež w Berlinje muž na nowu infekciju corona-wirusa dla schorjeł. To zdźěli tamniša senatorka za strowotnistwo Dilek Kalaycu. Po informacijach medijow je pacient w stabilnym stawje. Jeho lěkuja na izolaciskej staciji. Nětko chcedźa lěkarjo zwěsćić, hdźe bě so natyknył a z kim je hewak hišće kontakt měł.

W Němskej je dotal wjace hač 130 infekcijow z corona-wirusom znatych. Wirus móže schorjenje płucow zawinić. Dźensa ličachu z wuslědkom přepytowanja wšitkich sobudźěłaćerjow dožiwjenskeje kupjele Tropical Islands. Kupjel ­wopytał bě tež muž ze Sewjerorynsko-Westfalskeje, pola kotrehož běchu wirus pozdźišo zwěsćili.

Wirus rozšěrja so přez małe kapki w powětře, nastate při kašlowanju a rěčenju, a pochadźa z Chiny.

Noweje chorosće dla su mjeztym wjacore wulkozarjadowanja wotprajili. Kaž dźensa rano zdźělichu, so swětosławne Pariske knižne wiki lětsa njewotměja. Na nje běchu 160 000 ludźi wočakowali.

Mnohe njewočakowane wuslědki wothłosowanja w Słowakskej

Bratislava (SŽ/ČŽ/K/SN). Sobotne wólby parlamenta – mjeztym dźesate w samostatnej Słowakskej – wuskutkuja chcytu změnu politiskeje sceny kraja pod Tatrami. Jako najsylniša móc je z nich wušło hibanje Obyčajní ľudia a nezávislé osobnosti (OL’aNO) – Jednori ludźo a njewotwisne wosoby – předewzaćela Igora Matoviča, njenadźicy 25,02 procentaj hłosow wolerjow nažnjawši. Dotal knježaca a přichodnje opozicionelna strona Smer-sociálna demokracia dósta 18,29 procentow a tak njewočakowano tójšto wjac, hač běchu jemu naprašowanja naposledk přicpěwali. Třeće městno wobsadźi z 8,24 procentami hibanje Sme Rodina. Spochi přiběraceje ličby přiwiska dołho wyskaca ultraprawicarska L’udová strana Naše Slovensko ekstremista Mariana Kotleby spadny ze skromnymi 7,97 proc. na štwórtu poziciju. Do narodneje rady zaćahnu hišće Sloboda a Solidarita (SaS) ze 6,22 proc. kaž tež młoda strona bywšeho prezidenta Andreja Kiski Za l’udí z 5,77 proc. PS/Spolu dyrbi ze 6,96 proc. wonka wostać – jako zwjazk by sydom procentow trjebał.

Ze zwěrjećim kandidatom chce Lěwica ke komunalnym wólbam w Francoskej nastupić. Kóčka „Rec“ steji za lěwicarsku stronu La France Insoumise na lisćinje w bretoniskim měsće Renne. Z kóčku chcedźa škit zwěrjatow bóle tematizować, kaž strona zdźěli. Tuchwilu steji „Rec“ na 60. městnje wólbneje lisćiny a nima tuž žaneje šansy. Nimo toho dyrbi něchtó kmótřistwo za kóčku přewzać a so z mjenom zapisać, sej wólbne prawo žada.

Tykanc z 29 wobstatkami a 29 swěčkami su minjenu sobotu 17 dźěćom-narodninarjam na „party šaltowanskeho lěta“ w bayerskim Bad Hindelangu poskićili. Direktor turistiskeho zarjada zahaji swjedźeń z narěču, kotraž wobsteješe z 29 słowow a traješe 29 sekundow. Allgäuski dowolowy centrum wot lěta 1988 dnja 29. februara tajki swjedźeń zarjaduje a wšitke­ kóšty za njón zaruna.