Ewangelsko-lutherska krajna cyrkej Sakskeje chce resp. ma lutować, a tak su strukturnu reformu w nowym lěće přesadźili, často přećiwo woli wosadow – tak stej wosa­dźe znateje Lipšćanskeje Mikławskeje a Tomašoweje cyrkwje přećiwo nanuzo­wanej fuziji sudnistwu skóržbu zapodałoj. Jasne je, zo njemóža cyrkwinske předstejićerstwa – potajkim wěriwi – we wulkowosadźe tak sobu postajeć kaž w małej. To płaći tež za nowozałoženu wosadu „Hornjołužiska hola a haty“, kotraž jednoći Ra­ke­cy, Njeswačidło, Minakał-Łupoj, Chwa­ćicy a Klukš. Přiwšěm móže so kriza jako šansa za wozrodźenje serbstwa w tutych wosadach wopokazać. „Hdyž a hdźež so ludźo dale za serbskosć angažuja, potom tež tu serbske cyrkwinske žiwjenje dale wostanje. Mamy serbske a dwurěčne kemše a mamy Serbsku bjesadu w Rakecach, a z nimi chcemy wězo pokročować. Wjeselimy so na wobdźělnikow z tamnych wosadow.“ Takle farar Robert Malink nowych wosadnych přeprošuje. Cordula Ratajczakowa

Wopak parkowane awto z traktorom preč storčił je muž w bayerskim Garmisch-Partenkirchenje. Wosobowy wóz so při tym wospjet přećisny a je dospołnje skóncowany. Hněwny wobydler bě jón přez blisku dróhu na parkowanišćo storčił. Dalši wobydler na třěše ležace awto wuhlada a wołaše policiju, tukajo na wobchadne njezbožo. Policija zawi­nowarja spěšnje namaka a přizjewi jeho wěcneho wobškodźenja dla.

Wjewjerčku z nuzy wuswobodźili su wohnjowi wobornicy w Drježdźanach. Wona bě nowe lěto z woknom do bydlenja zalězła a za wulkim kamorom tčacy wostała. Wobydlerjo njezamóchu ju wuhnać. Po tym zo běchu kameradojo kamor wurumowali a dźěru do zadnjeje sćěny wurězali, móžachu zatłusnjenu wjewjerčku skónčnje wuswobodźić. A nje­zranjene zwěrjo móžeše na swobodu.

Vatikan (B/SN). Druhi hodowny swjaty dźeń, swjateje swójby, je při składnosći tradicionalneho modlenja Jandźelknjeza na Pětrowym naměsće w Romje bamž Franciskus wobžarował: „Wjele mandźelstwow nochce žane abo jenož jedne dźěćo měć. To je tragedija.“ Nimo toho wobroći so bamž z listom na mandźelstwa po cyłym swěće, w kotrymž po­twjerdźi, zo trjebaja dźěći wěstotu, kotraž jim pomha dowěru k swojim staršim měć. Pontifeks pokaza zrozumjenje za přiwótřene połoženje swójbow w času pandemije a přeje sej, zo wostanje swójba „městnosć schadźowanja a zrozumjenja“. Loni w měrcu pod nawodom Vatikanskeho swójbneho zarjada zahajene lěto „Amoris-laetitia“ (lěto swójby) na swětowym zetkanju swójbow z bamžom w juniju w Romje zakónča.

K smjerći arcybiskopa

Berlin (dpa/SN). Najebać starosće koronawirusa dla su dźensa we wjacorych zwjazkowych krajach po zakónčenju hodownych prózdnin zaso wučbu w šulach zahajili. Byrnjež dokładny rozměr noweje warianty omikron hišće znaty njebył, su so šulerki a šulerjo w Braniborskej, Berlinje, Sakskej, Mecklenburgsko-Předpomorskej a Porynsko-Pfalcy do prezencneje wučby wróćili. W Durinskej je wona dźensa a jutře hišće distancna. Srjedu chcedźa tam rozsudźić, kak ma potom dale hić.

Razniše naprawy na sewjeru

Kiel (dpa/SN). W Schleswigsko-Holsteinskej płaća razniše škitne naprawy koronawirusoweje warianty omikrona dla. Wot jutřišeho je ličba wobdźělnikow na zarjadowanjach na 50 wosobow nutřka a sto pod hołym njebjom wobmjezowana, dotal bě jich najwjace tysac. Kontaktne wobmjezowanje za šćěpjenych a wustrowjenych na najwjace dźesać wosobow njepłaći jenož nutřka, ale tež w zjawnym rumje.

Biden přilubja Ukrainje pomoc