Drježdźany (dpa/SN). Po hroženjach ze smjerću přećiwo sakskemu ministerskemu prezidentej Michaelej Kretschmerej (CDU) w komunikaciskej słužbje Telegram je policija dźensa rano w Drježdźanach wjacore objekty přepytowała. Wobdźělena bě tež specialna jednotka krajneho kriminalneho zarjada, dokelž wobsteješe podhlad, zo maja skućićeljo tež brónje. Po informacijach rěčnika policije koncentrowachu so přepytowanja na bydlenja. W zwisku z diskusiju wo móžnej winowatosći šćěpjenja přećiwo koronawirusej běchu so po informacijach telewizije ZDF hroženja přećiwo Kretschmerej jewili. Na to stej generalne statne rěčnistwo a kriminalny zarjad Sakskeje přepytowanja zahajiłoj.

Berlin (dpa/SN). Zwjazkowy kancler Olaf Scholz (SPD) chce so wo to starać, zo wšědne žiwjenje za ludźi w Němskej zapłaćomne wostanje. „Runje w časach stupacych płaćiznow energije chcemy na to dźiwać, zo so energija z luksusom njestanje“, rjekny Scholz w swojej prěnjej knježerstwowej deklaraciji dźensa dopołdnja w zwjazkowym sejmje w Berlinje. Změna do směra na klimje tyjace hospodarstwo a towaršnosć so jenož poradźi, hdyž „ju přemó­žaca wjetšina podpěruje“. Dołhodobnje budu fosilne žórła energije dróše, kancler zwurazni. „To pak njesmě ludźi ze snadnymi dochodami přežadać. Ćopłe bydlenje je zakładne prawo.“ Knježerstwo chce wobydlerjow pohnuć, zo so poněčim alternatiwnym energijam přiwobroćeja.

Berlin/Mühlheim (dpa/SN). Inwentura w składach šćěpiwa přećiwo koronawirusej je po słowach zwjazkoweho ministra za strowotnistwo Karla Lauterbacha (SPD) wunjesła, zo njezměje Němska w prěnim kwartalu 2022 dosć seruma k dispoziciji. To je mnohich překwapiło. „Tež mje“ rjekny Lauterbach wčera wječor w telewiziji ARD. Wón na tym dźěła njedostatk wotstronić. Prócowanja běža „přez wšě kanale“, tež direktnje k předewzaćam, zo móhli spěšnje wjace seruma wobstarać.

Předsyda zwjazka kasowych lěkarjow Andreas Gassen rěčeše wo fatalnym signalu za wšěch, kotřiž z wotmachom přećiwo pandemiji wojuja. „Smy w Němskej mjeztym rekordnu spěšnosć při šćěpjenju w praksach docpěli, a nětko tale powěsć“, rjekny Gassen nowinarjam. „Njemóžeš nikomu rozkłasć, zo njeje w kraju, w kotrymž bu serum wuwity, dosć šćěpiwa pře koronu.“

Zwjazkowe knježerstwo ma šćěpjensku kampanju za centralny element boja přećiwo koronawirusej.

Waršawa (dpa/SN). Nowe zwjazkowe knježerstwo chce w zwadźe wo prawostatnosć w Pólskej a Madźarskej ćišć z pomo­cu pjenježnych sankcijow wukonjeć. Pola móžnych instrumentow póńdźe tež wo prašenja etata a wo pomocne srědki k přewinjenju sćěhow koronapandemije, rjekny statna ministerka za europske naležnosće Anna Lührmann (Zeleni) wčera na kromje wuradźowanjow EU w Brüsselu. Zo bychu kročele k wuspěcham wjedli, měli nětko hladać, kak móhła Europska unija tele instrumenty dale wuwiwać. Zdobom je wažne z Pólskej a Madźarskej dale w dialogu wostać.

Nowe, ale dotal njewužiwane jednanje za škit prawostatnosće w EU předwidźi, zo čłonskim krajam srědki ze zhromadneho etata skrótša, hrozy-li strach, zo pjenjezy ranjenja prawostatnosće dla znjewužiwaja. Kritikarjo pólskemu a madźarskemu knježerstwu wumjetuja, zo swoju justicu přećiwo směrnicam Europskeje unije wobwliwujetej. Wobaj krajej wumjetowanja wotpokazujetej a mjeztym na Europskim sudnistwje přećiwo planam EU skoržitej, dokelž wone pječa europske prawo ranja.