Scholz liči z přihłosowanjom
SPD, Zeleni a FDP so na koaliciske zrěčenje dojednali – Lěwica kritiska
Berlin (dpa/SN). Po dojednanju wodźacych zastupnikow SPD, Zelenych a FDP na koaliciske zrěčenje wo wutworjenju po wšej Němskej prěnjeje tak mjenowaneje amploweje koalicije su nětko čłonojo a delegaća na rjedźe. Hižo dźensa chcychu so Zeleni swojich čłonow prašeć, hač koaliciskemu zrěčenju a personalnym planam nowe knježerstwo nastupajo přihłosuja. Wothłosowanje ma dźesać dnjow trać a digitalnje abo z listom móžne być. Za přihłosowanje dosaha jednora wjetšina. We wobłuku SPD a FDP maja delegaća spočatk decembra na stronskimaj zjězdomaj koaliciske zrěčenje wotžohnować.
Byrnjež w koaliciskich jednanjach wšitke tři strony kompromisam přizwolić dyrbjeli, je sej přichodny zwjazkowy kancler Olaf Scholz (SPD) wěsty, zo wšitke tři strony zrěčenju přihłosuja. „To sym jara optimistiski. Je to dobry wuslědk z wida wšitkich třoch stron“, rjekny wón wčera wječor w telewiziji ARD.
Swěca a sćin
To a tamne (25.11.21)
Najebać zawrjene adwentne wiki w Lipsku koronapandemije dla móža sej ludźo tež lětsa zaso woblubowane dźěćace šalki z motiwom pěskowčika kupić. Předawać chcedźa je, dołhož su na składźe, wot 1. decembra přez internetny portal abo w předawanišću na Lipšćanskim Hłownym torhošću. Nimo toho poskića tež normalne zelene winowe šalki. Lipšćanske hodowne wiki dyrbja runje tak kaž hižo loni korony dla wupadnyć.
Gitara Bruca Springsteena abo keyboard Eltona Johna: Za beneficnu akciju w Los Angelesu je tójšto sławnych hudźbnikow swoje instrumenty dariło. Přesadźować budu je 11. decembra, kaž awkciski dom zdźěli. Wunošk awkcije přewostaja organizaciji, kotraž hudźbne šule na juhu USA podpěruje, zo móhli tež chude dźěći na instrumentach hrać nawuknyć.
Strukturu za zaručene samopostajowanje wutworić
Budyšin (SN/bn). „Wutworić korporaciju zjawneho prawa je najbóle dowidźomna naprawa, kotraž by kolektiwnemu samopostajowanju Serbow najlěpje polěkowała. Wosobinsce tajki krok z wulkej sympatiju wobhladuju.“ Tak zjima fachowc za statne a ludowe prawo dr. Stefan Oeter z Hamburgskeje uniwersity swoje mysle nastupajo prašenje, kak hodźała so kulturna awtonomija Serbow zwoprawdźić a juristisce zaručić. Wosebity hósć a eksperta wčerawšeho seminara „Samopostajowanje Serbow w Sakskej“, internetnje wuhotowaneho wot wuběrka „wustawa a prawo“ Serbskeho sejma, poda pohódnoćenje wot iniciatiwy zestajeneho naćiska za „statne zrěčenje“, rjadowace poćahi mjez Zwjazkom kaž tež Sakskej a Braniborskej a serbskim ludom. „Rozdźělnych přičin dla je mi naćisk problematiski. Sprěnja złožuje so na zrěčenja mjez statom a cyrkwjemi, štož mam za tola trochu přehnaty narok. Kmańšo drje by było so na wotpowědnych dojednanjach, na přikład z uniwersitami abo hospodarskimi komorami, orientować. Zdruha měli jasnje mjez teritorialnej a personalnej awtonomiju rozeznawać.
Za winowatosć šćěpjenja
Berlin (dpa/SN). Wjetšina wobydlerjow Němskeje wupraja so za powšitkownu winowatosć šćěpjenja pře koronawirus. To je wuslědk naprašowanja slědźenskeho instituta YouGov. Tak by 69 procentow woprašanych tajki powšitkowny zawjazowacy škit přećiwo strašnemu wirusej witało. 23 procentow to wotpokazuje. Před tydźenjomaj bě so hišće 44 proc. za šćěpjensku winowatosć wuprajiło, loni 26. decembra hišće 33 proc.
Předstaja koaliciske zrěčenje
Berlin (dpa/SN). SPD, Zeleni a FDP chcychu dźensa popołdnju swoje koaliciske zrěčenje za zhromadne zwjazkowe knježerstwo předstajić. Dobre wosom tydźenjow po wólbach zwjazkoweho sejma měješe zjawnosć wo dotal dowěrliwje wujednanych nadrobnosćach zhromadneho dźěła zhonić. Dopołdnja su so hłowni zastupnicy jednanjow wšitkich třoch stron na swojim zakónčacym posedźenju schadźowali. Zahajili su koaliciske jednanja 21. oktobra, po tym zo běchu so strony tak mjenowaneje ample na to dojednali.
Chcedźa chorych přepołožić
Darrell Brooks, kiž bě w USA ze swojim awtom šěsć ludźi morił a ...
Wotnětka płaći w zawodach 3G
Berlin (dpa/SN). Nowy zakoń wo škiće před infekcijemi z prawidłom 3G na dźěłowym městnje je wot dźensnišeho płaćiwy. Přistup do zawodow maja jenož hišće šćěpjeni, wustrowjeni abo testowani. Šćěpjeni a wustrowjeni dyrbja to dopokazać, na přikład ze šćěpjenskim wupokazom, certifikatom na mobilnym telefonje abo z dokumentom, zo su wustrowjeni. Nješćěpjeni, kotřiž njemóža doma dźěłać, dyrbja dźěłodawarjej wšědny aktualny test abo najdlěje 48 hodźin stary laborowy test předpołožić. Tež přewjedźeny spěšnotest pod dohladom dźěłodawarja je móžny, ministerstwo za strowotnistwo zdźěla.
Dźěłodawarjo su zamołwići dopokazy přepruwować, prjedy hač dźěławi do zawoda přińdu. Předewzaća maja prawidło 3G wšědnje kontrolować a dokumentować. Dźěłodawarjo maja sobudźěłaćerjam tydźensce dwaj darmotnej testaj poskićić.
Zwjazki předewzaćelow kritizuja nawal dźěła při kontrolach a krótkodobne přesadźenje. Někotre firmy chcedźa najebać připowědźene pokuty prawidło jenož punktualnje kontrolować.
Mylenje abo ignoranca
Ratarjo demonstrowali
To a tamne (24.11.21)
Ekstremnaj krosnowarjej staj wčera po fasadźe wysokodomu w Frankfurće nad Mohanom horje lězłoj. Jako „spiderman“ znaty Alain Robert a Leo Urban, wobaj Francozaj, staj tam hač na třěchu 153metrowskeho „skypera“ w dwórnišćowej štwórći krosnowałoj. Njewužiwaštaj žane pomocne srědki. Na třěše pak čakaše policija a jeju nachwilnje zaja.
Wopačny „pater Don Romano“ dyrbi 30 měsacow do jastwa. To je sudnistwo w južnofrancoskim Saint-Raphaëlu wukazało. Pozdatny duchowny bě dobroćiwemu wěriwemu 2 500 eurow wulišćił, kotrež běchu pječa za dźěćacy dom w Africe postajene. Na mnicha předrasćeny wobšudnik je mjeztym dlěje hač dwaceći lět „aktiwny“ a sedźeše wospjet w jastwje. Najebać to je wěriwych a cyłe wosady jako pozdatny dušepastyr zas a zaso za nós wodźił.
