Dalše protesty
„Borzdźidło“ zakonske było
Karlsruhe (dpa/SN). W aprylu 2021 wukazane zwjazkowe nuzowe borzdźidło ze zakazami, dom w nocy wopušćić, z kontaktnymi wobmjezowanjemi a ze zawrjenjom šulow koronapandemije dla je wustawje wotpowědowało. Tole je zwjazkowe wustawowe sudnistwo dźensa wobzamknyło, wotpokazujo wjacore skóržby. Naprawy su drje wobšěrnje do wšelakich zakładnych prawow ludźi zasahnyli, „běchu pak hladajo na wulke wohroženje přez pandemiju“ zakonske. Hladajo na zawrjenje šulow připóznawaja sudnicy prěni króć scyła „prawo na šulske kubłanje dźěći a młodostnych napřećo statej“.
Wusud je wažny zakład dźensnišich wuradźowanjow zwjazkoweho knježerstwa ze zastupjerjemi zwjazkowych krajow wo móžnych nowych naprawach. W někotrych krajach wo tym rozmysluja, nuzowe borzdźidło znowa wukazać.
Minister: Přidatne brěmjo
Drježdźany (dpa/SN). Nowe tarifowe zrěčenje za zjawnu słužbu zwjazkowych krajow woznamjenja za swobodny stat Saksku za přichodnej lěće přidatne wudawki nimale 200 milionow eurow. Financne ministerstwo w Drježdźanach planuje po wčerawšich informacijach klětu něhdźe 85 milionow a 2023 něhdźe 112 milionow eurow wjace hač lětsa. Klětuše přidatne pjenjezy su hižo składowane, wudawki za 2023 chcedźa w přichodnych wuradźowanjach wo etaće kraja zaplanować, ministerstwo zdźěla.
„Tarifowe zwyšenja su stajnje trajace brěmjo do přichoda, a to při hižo nětko wobstejacym deficiće w etaće za přichodnej lěće“, rjekny financny minister Hartmut Vorjohann (CDU) powěsćerni dpa. Dołhodobne poćežowanje dale přiběra a zniža móžnosće kraja nastupajo wudawki na druhich městnach. Personalne kóšty wučinjeja hižo nětko 38 procentow. Po tarifowym dojednanju dóstanu přistajeni zjawneje słužby wot decembra 2022 wo 2,8 procentow wyšu mzdu a w měrcu 2022 premiju 1 300 eurow korony dla.
Incidenca dźeń a wyša
To a tamne (30.11.21)
Po třoch dnjach w zasněženej korčmje na sewjeru Jendźelskeje je něhdźe 60 hosći swój nachwilny kwartěr zaso wopušćić móhło, po tym zo bě so sněhowy płuh k wotležanemu domej předrěł. Ludźo běchu po koncerće w pubje wostać dyrbjeli, dokelž bě dróha sněhoweho wichora dla zaraćena. Korčmarka zaměstni někotrych hosći w pensiji, druzy dyrbjachu na matracach abo na zemi přenocować. Najebać to bě nalada mjez wopytowarjemi dobra. Nastachu samo nowe přećelstwa.
Jako pastyrjo wowcow su policisća w Sewjerorynsko-Westfalskej zaskočili. Swědcy běchu zastojnikow wo tym informowali, zo steji stadło něhdźe 150 wowcow na polu bjez kóždeho płota. Policisća na to k polu dojědźechu a njedohladowane stadło stražowachu. Akcija z „njewšědnym nazhonjenjom“ so skónči, jako wobsedźer stadła dojědźe.
Njewšědny puć měšnistwa šoł
Vatikan (B/SN). Bamž Jan Pawoł II. (1920–2005) je před 25 lětami prěnju awtobiografiju w nowšim času wozjewił. Jeho předchadnicy běchu skerje encykliki, wuwučowanske spisy abo prědowanja wozjewjeli. Jan Pawoł II. bě medijam jara přichileny. Hižo 1994 wozjewi wón wosebitu knihu w formje interviewa k aktualnym prašenjam wo cyrkwi. Składnostnje złoteho měšniskeho jubileja wuda tež knihu wo swojim njewšědnje wotměnjawym puću měšnistwa. Kóžde lěto 22. oktobra wopominamy Jana Pawoła II., kiž bě dlěje hač 26 lět hłowa katolskeje cyrkwje a bu jeničce dźewjeć lět po swojej smjerći swjatoprajeny.
Antiksku baziliku wuhrjebali
Měli wušo hromadźe dźělać
Budyšin (SN). Dźěłowe zetkanje Radow za serbske naležnosće w Braniborskej a Sakskej je so minjeny pjatk popołdnju digitalnje wotměło. Ćežišćo wuradźowanja běštej předstajenje dźěławosće braniborskeho gremija, wosebje hladajo na jeho lěpše wuhotowanje z podpěrowacym personalom w krajnym sejmje a ministerstwje. Tak tamniša referentka za serbsku radu wot lětušeho hłownohamtsce z połnym městnom dźěła.
Dalša tema bě wothłosowanje mjez Sakskej a Braniborskej nastupajo přidatne srědki we wobłuku strukturneje změny, kaž z nowinskeje zdźělenki wuchadźa. Předsyda Domowiny Dawid Statnik rozłoži přitomnym stejišćo třěšneho zwjazka, tamniši referent za naležnosće Serbow Měto Nowak rysowaše situaciju kołowokoło serbskich projektow w Braniborskej. Přezjedni sej přitomni běchu, zo měli wšitke serbske gremije na tym polu hišće wušo hromadźe dźěłać. Naćisk koaliciskeho zrěčenja za nowe zwjazkowe knježerstwo stej serbskej radźe na wědomje wzałoj. Witatej, zo su tam eksplicitnje tež serbski lud a tamne připóznate mjeńšiny Němskeje mjenowane.
Jednanja dotal bjez wuslědka
Podstupim (dpa/SN). W zwadźe wo zwyšenje mzdow za wjace hač milion přistajenych zwjazkowych krajow prócuja so dźěłarnistwa a dźěłodawarjo wo rozrisanje. Kónc tydźenja stej wobě stronje w Podstupimje jednałoj, tola bjez wuslědka. Wčera wječor zdźělichu, zo chcedźa z jednanjemi dźensa pokročować. „To drje hišće traje“, rjekny šef dźěłarnistwa ver.di Frank Werneke. Zdobom pak wšitcy wobdźěleni potwjerdźichu, zo chcedźa so na kóždy pad dojednać.
Koaliciske zrěčenje předstajili
Berlin (dpa/SN). Dobrej měsacaj po wólbach Berlinskeho Domu zapósłancow chcychu SPD, Zeleni a Lěwica dźensa zhromadne koaliciske zrěčenje předstajić. Potom ma tež rozdźělenje ministerstwow jasne być. W křesle šefa sedźi přichodnje krajna předsydka SPD a bywša zwjazkowa swójbna ministerka Franziska Giffey (SPD). Kónc tydźenja běchu społnomócnjeni třoch stron wo rozdźělenju ressortow wuradźowali.
Poručenja žurnalistam
We wobłuku statow Visegrádskeje štyrki su so dźensa w madźarskej ...
Pacientow přepołožili
Mnichow (dpa/SN). Při dotal najwjetšej akciji přepołoženja pacientow intensiwnych stacijow su kónc tydźenja nimale 50 ćežko schorjenych z Bayerskeje, Durinskeje a Sakskeje do druhich zwjazkowych krajow dowjezli. Z přepołoženjom chcychu wot štwórteje žołmy koronapandemije wosebje potrjechenym zwjazkowym krajam pomhać, kotrež bědźa so z přećeženymi intensiwnymi stacijemi chorownjow. Lěkarjo wopisuja połoženje tam jako dramatiske.
Jeničce w Bayerskej leži po informacijach intensiwneho registra wjace hač tysac na covid-19 schorjenych na intensiwnych stacijach. Połojca z nich trjeba nastroj k zastaranju z kislikom. Mjeztym wo tym rozmysluja, pacientow tež do wukraja přepołožić, njedyrbjeli-li kapacity w Němskej hižo dosahać. Ze Sakskeje su cyłkownje 14 pacientow do druhich zwjazkowych krajow dowjezli.
