Runja zašłym lětam su sej čitarjo Serbskich Nowin tež wokoło minjenych hód chwile brali a našu hodownu křižowku wuhódali. Tójšto dopisow a mailkow z prawej wotmołwu „Měr cyłemu swětej“ smy do redakcije dóstali. Fortuna dyrbješe tuž rozsudźić, štó připowědźene myta dóstanje. Nad prezentom ze wšelakimi słódnymi kapkami z klóštra Marijina hwězda w Pančicach-Kukowje smědźa so Lucija Endersowa z Radworja, swójba Lorencec z Njebjelčic a Marka Pólkowa z Budyšina wjeselić. Prezenty je klóšterski wobchod jako přećelnu podpěru přewostajił. Wšitkim, kotřiž tónraz mjez dobyćerjemi njeběchu, móžemy poručić, jutry zaso křižowku wuhódać.

„Hdyž klanki běžeć wuknu – trikowe filmy a animacije DEFA z NDR“ rěka aktualna wosebita wustajeńca Muzeja hród a twjerdźizna Zły Komorow, Němskeho instituta za animaciski film a Drježdźanskich techniskich zběrkow. Přehladka na Złokomorowskim hrodźe je hišće hač do klětušeho 25. februara přistupna. Muzej hród a twjerdźizna Zły Komorow

Drje najwjetši adwentny wobłuk swěta nad modelom wjesneje cyrkwje hodźi so tele dny w Bärnsdorfje blisko Moritzburga wobdźiwać. Z měru něhdźe pjeć króć wosom króć dźesać metrow by sej bjezdwěla zapisk do Guinessoweje knihi rekordow zasłužił – by-li wotpowědna kategorija eksistowała. Zhotowili su jón blidarjej Carsten Winkler a René Schauer kaž tež třěchikryjer Steffen Ackermann. Foto: Jürgen Männel

Lube abonentki, lubi abonenća,

stupace kóšty w ćišćernjach tež Serbske Nowiny njewobeńdu. Za čas koronapandemije njebě połoženje nastupajo ćišćersku papjeru jenož přewšo napjate, jeje płaćizna je so runje toho­dla z městnami zwyšiła. Tymle wobstejnosćam so tež Ludowe nakładnistwo Domowina a redakcija Serbskich Nowin dlěje wuwinyć njemó­žetej.

Tohodla změja Serbske Nowiny wot 1. januara 2023 nowu płaćiznu. Lětny abonement za ćišćane wudaće płaći potom 79,20 eurow, abonement za digitalne wudaće 48,00 eurow, kombinowany abonement – ćišćana a digitalna wersija – 94,80 eurow a jednotliwe wudaće 0,50 eurow. Štóž jenož kónctydźenske wudaće w abonemenće čita, płaći na lěto 33,60 eurow, młodźinski abonement ćišćany a digitalny 36 eurow.

Prosymy wo zrozumjenje.

Ludowe nakładnistwo Domowina