Pokiwy (05.07.19)

pjatk, 05. julija 2019
artikl hódnoćić
(0 )

Tango w radnicy

Budyšin. Po tym zo bě Orquestra Muni­cipal de Tango La Plata z Buenosa Airesa minjene dny w Smochćicach a Njebjelčicach dožiwić, witaja jón jutře, sobotu, w Budyskej radnicy. Pod hesłom „Tango bjez hranicow“ móža zajimcy wot 20 hodź. na woběmaj foyeromaj k argentinskim rytmam rejwać. Zastup płaći 14 eurow. Organizatorojo poručeja přiměrjenu drastu a rejwanske črije.

Blidarjo wustajeja

Kamjenc. Po swojim třilětnym wu­ku­błanju prezentuja młodźi blidarjo jutře­, sobotu, wot 14 do 15.30 hodź. swoje­ pruwowanske wudźěłki. Wobhladać móža­ sej je zajimcy w Kamjenskim ener­gijo­wym a wodowym zastaranju, Při mě­šćan­skich dźěłarnjach 2. Wopytowarjo budu wo mnohostronskosći a kreatiwiće bywšich wučomnikow překwapjeni.

Swjeća při haće

Jeńšecy. Wudźerske towarstwo Čornica přeproša jutře, sobotu, na swój towarstwowy swjedźeń při haće mjez Nowej Wsu pola Rakec a Jeńšecami (Johnsdof). Wot 15 hodź. poskića při zabawnej hudźbje kofej a tykanc. Při wubědźowanju z wudami kiwaja rjane myta. Nimo toho budu jězby z motorskim čołmikom po haće móžne. Wot 19 hodź. budu reje. Wo ćělne derjeměće staraja so z praženym swinjećom, kurjenej rybu, rybičkowymi całtami a rybjacej poliwku.

Koncertuja na torhošću

Kulow. Třeći raz prezentuje energijowy zastaraćel Čorny Halštrow (EVSE) jutře, sobotu, wot 20 hodź. na Kulowskim torhošću lětni openair. Při připowě­dźenych miłych temperaturach stara so kapała Turn Away z Połčnicy wo rockowu hudźbu. Do toho zahudźi Kulowska kapała­ Straßenfestband. Wopytowarjam poskića napoje a zakuski.

K pomnikam kolesować

Budyšin. Kulturnje zajimowani móža so jutře, sobotu, na kolesowansku jězbu k archeologiskim a domiznowědnym pomnikam w Budyšinje a wokolinje po­dać. Něhdźe 40 kilometrow dołha čara započnje so w 10 hodź. před Muzejom Budyšin a powjedźe po zapadnej a juhozapadnej kónčinje sprjewineho města. Jězdźerjo pozastanu mjez druhim na městnach, hdźež su něhdy wino plahowali. Ćežišćo jězby budu słowjanske hrodźišća. Wobdźělenje je darmotne, zajimcy pak měli so sami zastarać.

Powjedźe po wustajeńcy

Budyšin. Po wosebitej wustajeńcy „Kontext – Kontroverse“ w Muzeju Budyšinje powjedźe zajutřišim, njedźelu, wot 15 hodź. Iris Brankačkowa. Na přehladce wosom wuměłcow a wuměłčow z partnerskeju městow Heidelberga a Budy­šina je wona zastupjena ze swojim rjadom rysowankow „vermessen“. W nich roze­staja so z rasizmom. Wopytowarjam po­da Brankačkowa dohlad do swojeho kreatiwneho procesa tworjenja.

Na zjawny přednošk

Budyšin. Dalši zjawny přednošk w Budyskim Serbskim instituće wotměje so wutoru, 9. julija, w 14 hodź. Prof. Nicolas Houde z Uniwersity Quebec a Montreal přednošuje na temu „Zwadliwe suwerenity. Wróćožadanje kraja přez wutworjenje škitnych sydlenskich rumow za indigenych“. Přednošk budźe w jendźelšćinje.

Serbske blido w stolicy

Berlin. Přichodne Serbske blido w Berlinje budźe 11. julija w 16 hodź. w hosćencu EINSTEIN KAFFEE na Friedrichowej 206. Hosćenc je direktnje pódla by­wšeho namjezneho přechoda Check­point Charlie. Zajimcy su wutrobnje witani.

wozjewjene w: Pokiwy
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND