Baletny wječor jako livestream
Budyšin. „Hdyž z pomocu pohiba komunikujemy, potom stej rum a bliskosć jara wažnej. Žiwjenske rumy so měnjeja, zwučeny swět so nadobo hinak wokoło wjerći. Mjenje zamołwitosćow, mjenje terminow, mjenje stresa, mjenje socialnych kontaktow; wjac časa, wjac měra – je to woprawdźe lěpše žiwjenje? Tele změny tworja městno za nowostki. Rejwarki a rejwarjo pod nawodom baletneje mišterki Serbskeho ludoweho ansambla Mije Facchinelli pokazuja změny na jewišću“, w zdźělence SLA rěka.
Baletny wječor „W stwičce“ wěnuje so wuwědomjenju zranitosće čłowjeka a njesměrnej mocy rejowanja. Dalše ćežišća su na přikład moralka, rozum kaž tež začuće, zo smy čas zhubili.