HZ Hórnikečanski jězor/Ćisk II – ST 1922 Radwor 2:4 (1:1)
Zestawa hosći: Grenzemann – Reineke, Šěrak, Róbl (82. Bauer), Schöne, Wjacławk (88. Mička), Nuk (90. Omran), Jendrewski, Seiler, Grubert, Pječak
K prěnjej hrě sezony 2020/2021 běchu Radworscy koparjo hósć we Wulkich Ždźarach. Tam měrjachu mocy z Hrajnym zjednoćenstwom Hórnikečanski jězor/Ćisk II. Při najrjeńšim wjedrje pokazachu woni přihladowarjam klasisku partiju wokrjesneje ligi: sylne dwuboje, horce diskusije z přećiwnikom a sudnikom, strašne situacije we woběmaj šěsnatkomaj kaž tež tu abo tamnu derje wuhratu scenu. Prěnje wrota hry třěli młody Radworski nowopřichad Lenny Schöne we 8. min. Hnydom po tym móhł wón samo hišće zwyšić, třělwa pak přećiwniske wrota snadnje misny. W 13. min. měješe domjace mustwo prěnju swójsku móžnosć z wólnym kopom z něhdźe 30 metrow, a tón wjedźeše k 1:1.
Po přestawce přińdźechu Radworčenjo z wjetšim elanom na hrajnišćo. Lukaš Pječak trjechi k nawjedowanju 2:1 w 52. min., Schöne zwyši na 3:1 w 60. min., a Johannesej Wjacławkej poradźi so mjeńšinje po tym 4:1. Domjacy móžachu drje hišće dalše wrota třělić, na poražce pak hižo ničo změnić njemóžachu.