Mejske wudaće Rozhlada započina so ze zawodnym tekstom Eera Balka, kiž rysuje, kelko dźěła měješe nadobo z přełožkami abo tołmačenjom z ukrainšćiny, po tym zo bě před wjace hač lětom wójna wudyriła, a kak je so w Finskej wid na a zajim za Ukrainu změnił. Wón pisa: „Po tołmačenju brutalnych dožiwjenjow ćěkancow běch měsacy dołho kóždu nóc na fronće abo w ewakuaciji.“ Marka Maćijowa pak je so z Měrćinom Wjenkom rozmołwjała, kiž dźěła za Serbski rozhłós a pisa literarne a druhe teksty za dorosćenych a dźěći. Wjenk wuznawa: „Nadźijam so jenož, zo wostanje nakładnistwo najebać aktualneho personalneho njeměra tež w přichodźe dźěłokmane. Jako serbsce pisacy awtor wšak njemóžu nihdźe druhdźe wozjewjeć hač w Ludowym nakładnistwje Domowina.“ Nicole Dołowy-Rybińska złožuje so w swojim přinošku na slědźenja, kotrež je zhromadnje z Cordulu Ratajczakowej 2017 a 2019 na Budyskim Serbskim gymnaziju přewjedła. Při tym wěnuje so zasadźe zdwórliwosće a jeje konsekwencam za dwurěčnosć w šuli a Hornjej Łužicy.