Peters wustaja na Hrodowej

Budyšin. Galerija Budissin je wot dźensnišeho pjatka z hosćićelku wosebiteje wustajeńcy „Zelene a čorne – Kelko čłowjek trjeba?“ Hač do 24. julija přistupna přehladka pokazuje wubrane twórby Běłowodźanskeho mištra měšanych technikow a čłona Zwjazka serbskich wuměłcow Eberharda Petersa. Wernisaža z lawdatorku Angelu Paulke započnje so w 19 hodź., wo hudźbne wobrubjenje postara so klarinetist Tobias Witke.

Kralowska klasa šansona w fabrice

Wojerecy. Mcinley Black zahaji jutře, sobotu, lětuše Kulturne lěćo Wojerowskeje kulturneje fabriki. Spěwy z Bostona pochadźaceje a mjeztym w Berlinje bydlaceje wuměłče wotbłyšćuja jeje francosko-portugalske korjenje a posrědkuja „njepretencioznje sprawnosće, z kotrymiž so publikum nablaku identifikuje“. Po słowach kritikarjow słuša Black „do champions league šansona“. Koncert započnje so w 19.30 hodź., zastup je darmotny. Dary pak so njewotpokazuja.

Chór swjeći z chórami