Telewizijny magacin Wuhladko poda so w swojim nowemberskim wudaću na slědy serbskich wupućowarjow. Pytajo za lěpšim žiwjenjom su w 19. lětstotku miliony ludźi swoju domiznu w Europje wopušćili. Dźěchu do Awstralskeje abo do Sewjerneje a Južneje Ameriki. Tež mnozy Serbja podachu so na puć do njewěsteho přichoda. Jich jězba wjedźeše z Łužicy přez Atlantik hač do texaskeje prerije. Dokumentacija Romana Nuka a Clemensa Šmita rysuje slědy tutych wupućowarjow a jich potomnikow. W srjedźišću steji sydlišćo Serbin w Texasu, hdźež su serbske stawizny hač do dźensnišeho prezentne. Lěto wob lěto zetkawaja so potomnicy wupućowarjow na swjedźenju Wendish Fest, hdźež swoje tradicije pěstuja a so na zhromadne stawizny dopominaja.