Telewizijny magacin Łužyca wěnuje hłowny měrcowski přinošk drje najsławnišemu Serbej Awstralskeje: Filmowc Donald­ Saischowa bě na slědach Lesa Kossatza po puću a je swoje zaćišće do reportaže zjimał. Dalše ćežišćo je nowa digitalna karta, kotraž ma serbskim kulturnym stawiznam Delnjeje Łužicy widźomnosć spožčeć. Mjez druhim wupraja so Hauke Bartels k prašenju, kak swěru geografiske karty serbski sydlenski rum zwobraznjeja. Měto Nowak w tym zwisku na to pokazuje, zo kartografija stajnje tež politiske poměry časa wotbłyšćuje. W rjedźe „Łužica w rozmołwje“ dopomina so Martina Nowakojc na swoje skutkowanje jako kuratorka Serbskeho muzeja. A Maja Šramojc wobswětluje, kak so najlěpje na aktualnu sezonu sadźenja přihotować.

Telewizija RBB wusyła Łužycu jutře, sobotu, w 13.10 hodź. Wospjetowanje na samsnym sćelaku slěduje zajutřišim, njedźelu, w 7.30 hodź. Telewizija MDR pokaza magacin sobotu, 28. měrca, w 12 hodź.

Byrnjež tačel a přiběrajcy tež zaso kaseta dźeń a woblubowanišej byłoj, dominuja aktualnje platformy, kaž na přikład Spotify, Apple Music abo Deezer, wiki hudźby. „Kak prezentna je serbska hudźba w digitalnym swěće?“ je tuž prašenje, kotrež telewizijny magacin Wuhladko w swojim měrcowskim wudaću hłownje wobswětluje. Dalši přinošk wotbłyšćuje wulět ně­hdźe 60 serbskich družkow do Roma, hdźež zetkachu so z bamžom a hdźež wukopachu so njejapcy jako woblubowany fotowy motiw za turistow. Nimo toho předstaja składnostnje 130. posmjertnych narodninow dr. Marje Grólmusec nowe rešerše, rysowace „diferencowany wobraz intelektualneje Serbowki, kotraž wosta w Radworju čas žiwjenja cuza“. Naposledk poda so dźěćacy reporter Mato pod hesłom „Wot kruwy hač k twarožkej“ do Krabatoweho mlokoweho swěta w Koćinje. Tamniše nazhonjenja zhusći na napjatu jězbu za wšitkich, kotřiž chcedźa wědźeć, kak mlokowe produkty nastawaja a kelko dźěła za tym tči!

Hłowne ćežišćo februarskeho wudaća telewizijneho magacina Łyžyca je „napjata situacija nastupajo wukubłanje wučerjow“ w Delnjej Łužicy. W tym zwisku portretuja Angelu Šurmanowu, kotraž so po wjelelětnym skutkowanju na Serbskimaj gymnazijomaj na wuměnk poda. Wo móžnym rozrisanju problema rozprawja z přinoškom wo planowanych změnach wuwučowanja pedagogiskeje sorabistiki na Uniwersiće Lipsk a ze stron Braniborskeje Techniskeje uniwersity Choćebuz-Zły Komorow na tymle polu přilubjenej kooperaciji. Nimo toho wěnuja so 150. zapustej w Janšojcach a prezentuja premjeru noweho hudźbneho wideja „Do teje Góle“. Titul spěwarki ­Juliany Baruck je drje prěni w Slepjanskej serbšćinje, za kotrejež awdijowu čaru bu wizuelne wudospołnjenje profesionelnje produkowane.

Telewizija RBB wusyła Łužycu jutře, sobotu, w 13.10 hodź. Wospjetowanje na samsnym sćelaku slěduje zajutřišim, ­njedźelu, w 7.30 hodź. Telewizija MDR pokaza magacin sobotu, 28. februara, w 12 hodź. W mediatece ARD je aktualna Łužyca wot jutřišeho cyłe lěto kóždy čas přistupna.

Telewizijny magacin Wuhladko wěnuje so jutře, 7. februara w 12 hodź. zym­skemu sportej a rozprawja wo wopyće w sněhakowarskim lěhwje. Městačko Janské Lázně w Krkonošach je hižo mnohe lěta cil mnohich šulerkow a šulerjow, kotřiž tam sněhakowanje wuknu. Serbske šule tam jeničce dobrych wuměnjenjow dla njejězdźa. Wšako su jako słowjanscy susodźa wosebje woblubowani hosćo.

Dalši přinošk wěnuje so pod hesłom „Pomjatk naroda“ Serbskemu institutej, kiž bu w lěće 1951 w Budyšinje załoženy. Wón je prěnje zarjadnišćo po cyłej Němskej, kotrež so na profesionalne wašnje sorabistice wěnuje. Dźensa slědźi něhdźe 60 sobudźěłaćerjow wo rěči, stawiznach a kulturje Serbow. Ze Serbskim kulturnym archiwom ma institut najwjetšu zběrku materialijow wo serbskich stawiznach. A dalši přinošk wusyłanja zaběra so z kwasom, při čimž su dźěći prominentneho hosća překwapili. 15 dźěći pěstowarnje „K wódnemu mužej“ z Worklec su lětsa w sakskej statnej kencliji w Drježdźanach ptači kwas swjećili. Mjez hosćimi bě sakski ministerski prezident Michael Kretschmer.