Wjetšina statow za rezoluciju
New York (dpa/SN). Najebać hroženje prezidenta USA Donalda Trumpa, druhim krajam pomocne płaćenja šmórnyć, su čłonske staty UNO wčera z přemóžacej wjetšinu za rezoluciju wo statusu Jerusalema hłosowali. 128 ze 193 krajow, mjez nimi tež Němska, to podpěrowaše. Dźewjeć statow, mjez nimi USA a Israel, wupraji so přećiwo tomu. 35 krajow so hłosa wzda. Rezolucija pak njeje ludoprawnisce zawjazowaca. Palestinjenjo ju witachu, Israel ju raznje porokowaše.
Přiměr na Ukrainje witałoj
Moskau/Berlin (dpa/SN). W konflikće Ukrainy dla staj ruski prezident Wladimir Putin a zwjazkowa kanclerka Angela Merkel (CDU) dojednanje na přiměr wokoło swjatych dnjow a na proze do noweho lěta witałoj. Wobaj wuprajištaj w telefonaće nadźiju, zo mjelčenje bróni tež dlěši čas dźerži, kaž zwjazkowe knježerstwo wčera wječor informowaše. Ukraina a Ruskej přichileni separatisća w Donbasu běchu so srjedu na přiměr přez hody a Nowe lěto dojednali.
Stawk bjez wjetšich sćěhow
Prěni serbski zakoń hódnje wopominać
Chrósćicy (SN/at). Dźěłowe ćežišća lěta 2018 rozjimachu čłonojo Serbskeje lěwicy na swojim kónclětnym zetkanju wutoru w Chrósćicach. Jedne tajke je 70. róčnica schwalenja Zakonja wo zachowanju prawow serbskeje ludnosće 23. měrca 1948 w Sakskim krajnym sejmje. Kaž zapósłanc Hajko Kozel rozłoži, planuje frakcija Lěwicy w sakskim sejmje, z wustajeńcu tónle historiski podawk wopominać. Jako partnerow chce Domowinu, Załožbu za serbski lud a Serbski muzej zdobyć. W dalšim dypku wopominanja ma wo to hić, wuskutki prěnjeho serbskeho zakonja na žiwjenje našeho ludu wuhódnoćić a na zakładźe w Braniborskej płaćiweho aktualneho serbskeho zakonja konsekwency za móžne ponowjenje sakskeho zakonja wotwodźeć.
Hdyž zasady spušćiš
Dalše rozestajenja z Madridom hroža
Barcelona (dpa/SN). Katalanojo su wčera nowy regionalny parlament wuzwolili. Tři strony, kotrež wustupuja za njewotwisnosć Katalonskeje wot španiskeho stata, su sej znowa absolutnu wjetšinu 70 z cyłkownje 135 sydłow regionalneho parlamenta zdobyli. To zdźěli wólbny zarjad po wuličenju nimale wšitkich hłosow. Nětko hrozy nowe koło w rozestajenjach z centralnym knježerstwom w Madridźe. Nimale 82,5 procentow z 5,5 milionow wólbokmanych bě wolić šło.
Najsylniša strona w nowym parlamenće, liberalna Ciudadanos, ma 37 sydłow. Jeje načolna kandidatka Inés Arrimadas je poprawna wólbna dobyćerka. Wona pak nima žanu šansu knježerstwo wutworić, dokelž su móžni koaliciscy partnerojo prosće přesłabi.
Překwapjacy bě wuslědk aliancy w belgiskim eksilu přebywaceho bywšeho regionalneho prezidenta Carlesa Puigdemonta JuntsxCat. Wona docpě 34 mandatow.
To a tamne (22.12.17)
Nastupajo najwoblubowanišej předmjeni lěta 2017 móhłoj Marie a Paul cyle prědku stać, kaž prěnja prognoza Towaršnosće za němsku rěč we Wiesbadenje wěšći. Po wšěm zdaću budu tež Emilia a Emma, Ben a Alexander na načolnych městnach. W dźělnej probje wuhódnoćichu rěčewědnicy daty z dźesać stawnistwow po cyłej Němskej, při čimž su prěnje a dalše mjena runohódnje zapřijeli. Doskónčnu lisćinu prezentuje towaršnosć hakle nalěto.
Přejara z njewobeńdźomnymi hodownymi pěsnjemi nochce so policija w Kemptenje zaběrać. Twitterowała je tuž foto přijimarskeho wokna policajskeje straže z připrawjenym pokiwom: „Hodowne spěwy, kotrež na čuwy du, njejsu přičina, přizjewjenje zapodać. Waša policija.“ Mjenowanej stej předewšěm spěwaj „Last Christmas“ a „Feliz Navidad“.
Wjace energije přetrjebali
Berlin (dpa/SN). Přetrjeba energije w Němskej je lětsa wo 0,8 procentow wyša hač loni. To wujewi dźensa w Berlinje wozjewjene předwobličenje dźěłoweho zjednoćenstwa energijowe bilancy. Wjetšu přetrjebu energije – 461,5 milionow tonow kamjentnowuhlowych jednotkow – je předewšěm dobra konjunktura wuskutkowała. Cyłkownje su podźěle mineralneho wolija, zemskeho płuna a wobnowjomnych energijow přiběrali, jasnje woteběrała pak je přetrjeba jadroweje miliny a kamjentneho wuhla.
Kretschmer optimistiski
Mnichow (dpa/SN). Sakski ministerski prezident Michael Kretschmer (CDU) je so po zetkanju ze šefom koncerna Siemens Joewom Kaeserom wčera w Mnichowje nastupajo zachowanje wot zawrjenja wohroženeju sakskeju twornjow w Zhorjelcu a Lipsku optimistisce wuprajił. Na prašenje, kotre stejnišća maja w přichodźe perspektiwu, ma so „fairnje a sprawnje“ wotmołwić.
Hodowne štomy z Danskeje
Njewšědny wólbny bój w Katalonskej
Barcelona (SN/at). 5,5 milionow wobydlerjow Katalonskeje je dźensa namołwjenych nowy regionalny parlament wolić. Wólby postajiło je španiske knježerstwo, po tym zo bě justica kraja w oktobrje referendum wo njewotnisnosći zakazała. Dotalne regionalne knježerstwo Carlesa Puigdemonta bě jón přiwšěm přewjedło, byrnjež centralne knježerstwo ze stolicy Madrida wulki ćišć wukonjało.
W Madridźe nadźijeja so přichodneho regionalneho knježerstwa w Barcelonje, kotrež so separatizma wotrjeknje. Aktualne naprašowanja pak rysuja hinaši wobraz: Separatistiske strony móhli sej najebać jara napjaty bój z přećiwnikami njewotwisnosće Katalonskeje móc zaso zdobyć. Hač to za absolutnu wjetšinu 68 sydłow w regionalnym parlamenće dosaha, njebě hač do dźensnišeho dnja jasne. Rěč bě samo wo hrožacym njerozsudnym połoženju, z dlijacymi so koaliciskimi jednanjemi.
Što móhli wobydlerjo wočakować
Unija a SPD stej so wčera dojednałoj, wot 7. do 12. januara sonděrować, hač dosahaja zhromadnosće, jednać wo koaliciji. Hač tajka budźe, je dale wotewrjene. Serbske Nowiny wobswětleja někotre z 15 temowych wobłukow, kotrež chcedźa strony rozjimać.
Dawkipłaćerjo: Wolóženja chcetej unija kaž tež SPD – unija za wšěch, SPD za mału a srěnju mzdu zasłužacych. Unija chce dochodowy dawk wo 15 miliardow eurow znižić a solidarnu přiražku za wšěch wot lěta 2020 wotstronić. SPD chce přiražku za snadne a srjedźne mzdy wotstronić a tak wotćeženje dźesać miliardow eurow docpěć. Dalšej miliardźe mjenje dochodoweho dawka maja dźěłopřijimarjo płaćić.
Dźěłodawarjo: Jich zwjazki boja so nowych rjadowanjow, jeli SPD sobu knježi. Unija lubi stabilne pódlanske mzdowe kóšty. Čorno-čerwjena koalicija měła na ćišć SPD snano wěcy nastorčić, kotrež wobmjezuja z wida dźěłodawarjow fleksibilitu na dźěłowych wikach, kaž na přikład prawo, so z dźělneho do połneho přistajenja wróćić.
To a tamne (21.12.17)
Z nuznikowej papjeru z hnoja pandow wuličeja sej w Chinje wulki wobrot. Firma Sichuan Qianwei Fengsheng je z centrumom za plahowanje pandow na juhozapadźe kraja zrěčenje wotzamknyła. Firma chce wšědnje wulke mnóstwa fekalijow a wupluwane zbytki žratwy wužiwać, zo by je na nuznikowu papjeru a druhe hygieniske wudźěłki předźěłała. Pica mjedwjedźow z čorno-běłym kožuchom – narodneho symbola Chiny – ma wulki podźěl bambusa a tuž wjele włoknin.
115 milionow lět stary wotćišć nohi dinosawriera su njeznaći w parku blisko awstralskeho města Melbourna nětko wobškodźili. Kaž sćelak ABC rozprawja, běchu skućićeljo kromy nimale 30 centimetrow wulkeho wotćišća z hamorom wotbili. Parkowi dohladowarjo mjenuja to „hruby wandalizm“ a chcedźa historisku wosebitosć zaso sporjadkować.
Serbska rozprawa mjenuje problemy
Plan naprawow za ministerstwo wuspěšny
Drježdźany (SN/bn). Sakske krajne knježerstwo je so wčera prěni raz po přetworjenju kabineta schadźowało. Hłownej temje běštej rozdźělenje financnych srědkow Zwjazka za wutwar šulow a 5. rozprawa wo połoženju serbskeho ludu.
Ministerka za wědomosć a wuměłstwo dr. Eva-Maria Stange (SPD) předstaji wčera tak mjenowanu serbsku rozprawu. „Škit a připóznaće narodneje mjeńšiny njejstej nam jeno zakonska winowatosć – smy hordźi, zo Serbja naš region wobohaćeja“, zjima dr. Stange wuchadźišćo za 85stronski dokument. Rozprawa wěnuje so połoženju Serbow w minjenych pjeć lětach. Wažne dypki w njej su staw kubłanja, financowanje, strukturna a energijowa změna kaž tež njepřećelskosć napřećo Serbam. „Powšitkownje mam połoženje narodneje mjeńšiny za pozitiwne“, bě facit ministerki.
